തിരുവനന്തപുരം: വിഴിഞ്ഞം തുറമുഖത്തിന്റെ ഓഹരി വില്‍പന വിവാദമായതോടെ വിഴിഞ്ഞവും പരിസര പ്രദേശങ്ങളിലും വീണ്ടും ആശങ്കയിലാകുന്നു. തുറമുഖം വില്‍ക്കുന്നു എന്ന തരത്തിലുള്ള വാര്‍ത്തകള്‍ മത്സ്യത്തൊഴിലാളികളുടെ ഇടയില്‍ വ്യാപകമായി പ്രചരിക്കുന്നു. മറ്റൊരു പോര്‍ട്ട് കൂടി പണിയുമെന്നും കുടിയൊഴിഞ്ഞ് കൊടുക്കേണ്ടിവരുമെന്ന പ്രചാരണവും വ്യാപകമായിട്ടുണ്ട്. ആശങ്ക പള്ളിക്കമ്മറ്റിയും ശരിവയ്‌ക്കുന്നു.
പദ്ധതി എന്താണെന്ന് സര്‍ക്കാര്‍ തലത്തില്‍ നിന്ന് വ്യക്തമാക്കുന്നില്ല. ഓഹരി വില്‍പന തങ്ങളെ അറിയിച്ചില്ലെന്ന് സര്‍ക്കാര്‍ പറയുമ്പോള്‍ വിഴിഞ്ഞത്തെ വില്‍ക്കുകയാണെന്ന് പ്രതിപക്ഷനേതാവ് പിണറായി വിജയന്റെ നേതൃത്വത്തില്‍ പ്രചാരണവും നടക്കുന്നു. ഇതോടെ അതിജീവനത്തിനായി മത്സ്യത്തൊഴിലാളികള്‍ക്ക് വീണ്ടും സമരമുഖത്തേക്ക് ഇറങ്ങേണ്ടിവരുമെന്ന ഭീതി ഉടലെടുത്തിട്ടുണ്ട്. ജനപ്രതിനിധികളോട് വിവരം തിരക്കുമ്പോഴും വ്യക്തമായ മറുപടി ലഭിക്കുന്നുമില്ല. വിഴിഞ്ഞം തുറമുഖനിര്‍മാണത്തിനെതിരെ ലത്തീന്‍ കത്തോലിക്ക സഭയുടെ നേതൃത്വത്തില്‍ നടന്ന സമരം 2022 നവംബര്‍ 22ന് രാത്രിയില്‍ സംഘര്‍ഷഭരിതമായിരുന്നു. പോലീസ് സ്റ്റേഷന്‍ ആക്രമണം ഉള്‍പ്പെടെ ഉണ്ടായി. പോലീസ് വാഹനങ്ങള്‍ അടിച്ച് തകര്‍ക്കുകയും തീയിടുകയും ചെയ്തു. ഗുരുതരമായി പരിക്കേറ്റ് നിരവധി പോലീസുകാരെ ആശുപത്രിയില്‍ പ്രവേശിപ്പിച്ചു. സമാധാനപരമായി ചര്‍ച്ച ചെയ്ത് പരിഹരിക്കാമായിരുന്ന വിഷയം ഇടതിന്റെയും വലതിന്റെയും രാഷ്‌ട്രീയക്കളിയിലായിരുന്നു അന്ന് അക്രമത്തിലെത്തിച്ചത്.
അദാനിയെ തങ്ങളുടെ ചൊല്‍പ്പടിക്ക് നിര്‍ത്താനുള്ള നീക്കത്തിന്റെ ഭാഗമായി പ്രദേശവാസികളെ ഇളക്കിവിട്ട് പ്രക്ഷോഭം നടത്തിയതിന് പിന്നിലും ഇരുകൂട്ടരുമായിരുന്നു.
