മുംബൈ: ബോളിവുഡ് താരം അമീർ ഖാൻ ജീവിതത്തിലെ മറ്റൊരു പുതിയ അധ്യായത്തിന് തയ്യാറെടുക്കുകയാണ്. ദീർഘനാളായി പ്രണയത്തിലായിരുന്ന സുഹൃത്തും പങ്കാളിയുമായ ഗൗരി സ്പ്രാറ്റിനെ താരം ജൂലൈ 5-ന് വിവാഹം കഴിക്കുമെന്നാണ് റിപ്പോർട്ടുകൾ. ആഘോഷങ്ങളൊന്നുമില്ലാതെ അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ ലളിതമായ ചടങ്ങായിരിക്കും വിവാഹമെന്നാണ് റിപ്പോർട്ടുകൾ.
ഈ വിവാഹത്തിലെ ഏറ്റവും ശ്രദ്ധേയമായ കാര്യം, അമീറിന്റെയും ഗൗരിയുടെയും മുൻ വിവാഹങ്ങളിലെ നാല് മക്കളും ചടങ്ങിന്റെ ഭാഗമാകുമെന്നതാണ്. റീന ദത്തയുമായുള്ള വിവാഹത്തിലെ മക്കളായ ജുനൈദ് ഖാനും ഇറ ഖാനും, കിരൺ റാവുമായുള്ള വിവാഹത്തിലെ മകൻ ആസാദും, ഗൗരിയുടെ മുൻ വിവാഹത്തിലെ മകനും ഒരുമിച്ച് വിവാഹത്തിന് എത്തുമെന്നാണ് റിപ്പോർട്ടുകൾ.
മുംബൈയിലെ ബാന്ദ്രയിലുള്ള അമീർ ഖാന്റെ വസതിയിൽ വച്ചായിരിക്കും വിവാഹ രജിസ്ട്രേഷനും ലളിതമായ ചടങ്ങുകളും നടക്കുക. ഇരു കുടുംബങ്ങളിലെയും ഏറ്റവും അടുത്ത ബന്ധുക്കളും സുഹൃത്തുക്കളും മാത്രമായിരിക്കും പങ്കെടുക്കുക.
അമീറിന്റെ കസിൻ നുസ്രത് ഖാൻ വഴിയാണ് ബെംഗളൂരുവിൽ വച്ച് അമീറും ഗൗരിയും ആദ്യമായി പരിചയപ്പെടുന്നത്. തുടർന്ന് ഒരു വർഷത്തോളം ഇരുവരും പ്രണയത്തിലായിരുന്നു. കഴിഞ്ഞ വർഷം തന്റെ 60-ാം ജന്മദിനത്തിന് മുന്നോടിയായാണ് ഗൗരിയെ അമീർ മാധ്യമങ്ങൾക്ക് മുന്നിൽ തന്റെ ജീവിതപങ്കാളിയായി പരിചയപ്പെടുത്തിയത്. നിലവിൽ ഇരുവരും മുംബൈയിലെ ബാന്ദ്രയിലെ അമീറിന്റെ വസതിയിലാണ് താമസം.
ഗൗരി ഇപ്പോൾ അമീർ ഖാൻ പ്രൊഡക്ഷൻസിന്റെ പ്രവർത്തനങ്ങളിലും സജീവമാണ്.
ഒരിക്കൽ ‘ഈ പ്രായത്തിൽ വിവാഹം കഴിക്കുന്നത് എനിക്ക് ചേരില്ല’ എന്ന് തമാശയായി പറഞ്ഞിരുന്ന അമീർ ഖാൻ, ഗൗരിക്കൊപ്പം ജീവിതത്തിൽ ഏറെ സന്തോഷവാനാണെന്ന് പിന്നീട് തുറന്നുപറഞ്ഞിരുന്നു. കഴിഞ്ഞ മാസം ജൂലൈ 5ന് വിവാഹിതരാകുമെന്ന് അമീർ തന്നെയാണ് ഔദ്യോഗികമായി സ്ഥിരീകരിച്ചത്.
