ഗാന്ധി നഗര്: ആവശ്യമായ ചടങ്ങുകള് നടത്തിയിട്ടില്ലെങ്കില്, രജിസ്റ്റര് ചെയ്ത സര്ട്ടിഫിക്കറ്റ് മാത്രം ഹിന്ദു വിവാഹത്തെ സാധൂകരിക്കുന്നില്ലെന്ന് ഗുജറാത്ത് ഹൈക്കോടതി.
വിവാഹ സര്ട്ടിഫിക്കറ്റ് എന്നത് സാധുതയുള്ള വിവാഹത്തിന്റെ തെളിവ് മാത്രമാണെന്നും ഹിന്ദു വിവാഹ ചടങ്ങുകള് ഒരിക്കലും നടത്താത്ത ഒരു വിവാഹത്തിന് ഹിന്ദു വിവാഹ നിയമപ്രകാരമുളള സാധുത ഉറപ്പാക്കാന് കഴിയില്ലെന്നും ജസ്റ്റിസുമാരായ ഇലേഷ് ജെ വോറ , ആര് ടി വച്ചാനി എന്നിവരടങ്ങിയ ഡിവിഷന് ബെഞ്ച് പറഞ്ഞു.
ഹിന്ദു വിവാഹ നിയമത്തിലെ സെക്ഷന് 7 പ്രകാരം, ഇരു കക്ഷികളുടെയും ആചാരാനുഷ്ഠാനങ്ങള്ക്കനുസൃതമായി ഹിന്ദു വിവാഹം നടത്തണം.
അത്തരം ചടങ്ങുകളുടെ അഭാവത്തില്, നിയമത്തിന്റെ ദൃഷ്ടിയില് സാധുവായ ഒരു ഹിന്ദു വിവാഹമാകില്ല’ കോടതി നിരീക്ഷിച്ചു. യുകെയില് താമസിക്കുന്ന ഒരു പുരുഷനും സ്ത്രീയും തമ്മിലുള്ള വിവാഹം അസാധുവായി പ്രഖ്യാപിക്കാന് കുടുംബ കോടതി വിസമ്മതിച്ചതിനെത്തുടര്ന്ന് പുരുഷന് സമര്പ്പിച്ച അപ്പീലിലാണ് ഈ നിരീക്ഷണം.
ഭാര്യയാണെന്ന് അവകാശപ്പെട്ട് വിവാഹ സര്ട്ടിഫിക്കറ്റുമായി സ്ത്രീ തന്റെ മാതാപിതാക്കളെ സമീപിച്ചപ്പോഴാണ് താന് വിവാഹത്തെക്കുറിച്ച് അറിഞ്ഞതെന്ന് യുവാവ് ഹര്ജിയില് ചൂണ്ടിക്കാട്ടി.
താന് ഒരിക്കലും അവളെ വിവാഹം കഴിച്ചിട്ടില്ലെന്നും ഹിന്ദു ആചാരങ്ങളോ ചടങ്ങുകളോ നടത്തിയിട്ടില്ലെന്നും ഭാര്യാഭര്ത്താക്കന്മാരായി താമസിച്ചിട്ടില്ലെന്നും അയാള് വാദിച്ചു. സ്ത്രീയുടെ പിതാവിന്റെ ഉടമസ്ഥതയിലുള്ള കമ്പനിയില് ജോലി ചെയ്യുന്നതിനിടയില്, ജോലിയില് നിന്ന് പിരിച്ചുവിടുമെന്ന് ഭീഷണിപ്പെടുത്തി വിവാഹ രേഖകളിലെ തന്റെ ഒപ്പുകള് നേടുകയായിരുന്നുവെന്നായിരുന്നു ഹര്ജിക്കാരന്റെ വാദം.
വിവാഹ ചടങ്ങുകളോ ചടങ്ങുകള് നടത്തിയിട്ടില്ലെന്ന് സ്ത്രീ കോടതിയില് സമ്മതിച്ചു. ഇതേത്തുടര്ന്നാണ് ഹിന്ദു വിവാഹനിയമപ്രകാരമുള്ള വിവാഹ സര്ട്ടിഫിക്കറ്റ് അസാധുവായി കോടതി വിധിച്ചത്.
