റിക്കാര്‍ഡിട്ട് മുട്ട വില; മത്സ്യം, ഇറച്ചി വിലയും വര്‍ധിച്ചു

മട്ടാഞ്ചേരി: ഉത്പാദനം കുറഞ്ഞതിന് പിന്നാലെ സംസ്ഥാനത്ത് മുട്ടവില റിക്കാര്‍ഡിട്ടു. കോഴിമുട്ട മൊത്ത വിപണി വില 8 – 10 രൂപയിലും ചില്ലറവില 11-14 രൂപയിലെത്തി. കഴിഞ്ഞ വര്‍ഷം ജൂണില്‍ കോഴിമുട്ട ചില്ലറ വില 8 രൂപയായിരുന്നു.
താറാവ് മുട്ട മൊത്തവില 9-12 രൂപയിലും ചില്ലറ വില 12-15 രൂപയുമായി. നാടന്‍ കോഴിമുട്ടയ്‌ക്ക് 12- 14 രൂപ വരെയാണ് വില. കാടമുട്ട വില മൂന്നില്‍ നിന്ന് 3.50 രൂപയുമായി. സംസ്ഥാനത്ത് 250 കോടി കോഴി മുട്ടയാണ് പ്രതിവര്‍ഷം ഉത്പാദിപ്പിക്കുന്നത്.

മഴ കനത്തതോടെ സംസ്ഥാനത്ത് മുട്ട ഉല്പാദനത്തില്‍ കുറവുണ്ടായതും കോഴിത്തീറ്റ വില വര്‍ദ്ധനവുമാണ് വില ഉയരാന്‍ പ്രധാന കാരണം. ഇതര സംസ്ഥാനങ്ങളില്‍ നിന്ന് എത്തുന്ന മുട്ടയുടെ വില കൂടിയതും വര്‍ദ്ധനവിന് കാരണമായി. ഇറച്ചിക്കും മത്സ്യത്തിനും വില കൂടിയതോടെ ഉപഭോക്താക്കള്‍ മുട്ടയിലേക്ക് തിരിഞ്ഞതും വില കൂടാന്‍ കാരണമായെന്ന് കച്ചവടക്കാര്‍ പറയുന്നു.

തമിഴ്‌നാട്ടിലെ നാമക്കലില്‍ നിന്നാണ് കേരളത്തിലേയ്‌ക്ക് കൂടുതല്‍ മുട്ട എത്തുന്നത്. നാമക്കല്‍ വിപണിയില്‍ നിന്ന് പ്രതിവര്‍ഷം 560 കോടി മുട്ടയാണ് കേരളത്തിലെത്തുന്നത്. കഴിഞ്ഞവാരം നാമക്കല്‍ വിപണിയില്‍ കോഴിമുട്ട വില 6.50 രൂപയായിരുന്നു. കഴിഞ്ഞ ദിവസം മൊത്തവില 8.50 രൂപയായി വര്‍ധിച്ചു.

ചെന്നൈ, ബെംഗളൂരു എന്നിവിടങ്ങളില്‍ നിന്ന് 20 – 30 കോടി മുട്ടയും പ്രതിവര്‍ഷം എത്താറുണ്ട്. വില വര്‍ധന ചെറുകിട ഹോട്ടല്‍ മേഖലയിലും തട്ടുകട ഉടമകളെയും ആശങ്കയിലാഴ്‌ത്തിയിട്ടുണ്ട്. മുട്ടക്കറി, ഓംലെറ്റ്, ബുള്‍സൈ തുടങ്ങിയവയുടെ വില വര്‍ധനക്കിടയാക്കുമെന്നാണ് ഇവര്‍ പറയുന്നത്. ഗ്യാസ് ക്ഷാമത്തിന്റെ പേരില്‍ നേരത്തെ തന്നെ ഇവയ്‌ക്കെല്ലാം വില കൂടിയിരുന്നു.