പട്ന : വിചാരണയ്ക്ക് മുമ്പ് ഒരു കേസിലെ പ്രതി കുറ്റക്കാരനാണെന്ന് മാദ്ധ്യമങ്ങള് വിധിക്കേണ്ടെന്ന് പട്ന ഹൈക്കോടതി. ക്രിമിനല് കേസുകളുമായി ബന്ധപ്പെട്ട വസ്തുതാപരമായ സംഭവവികാസങ്ങള് റിപ്പോര്ട്ട് ചെയ്യാന് മാദ്ധ്യമങ്ങള്ക്ക് സ്വാതന്ത്ര്യമുണ്ട്. എന്നാല് പ്രതി കുറ്റക്കാരനാണോ അല്ലയോ എന്ന് കോടതി തീരുമാനിക്കുന്നതിന് മുമ്പ് ഒരു വ്യക്തിയുടെ പ്രശസ്തിക്ക് ദോഷം വരുത്താന് കഴിയില്ലെന്ന് കോടതി വ്യക്തമാക്കി. പ്രതി കുറ്റക്കാരനാണെന്ന് സൂചിപ്പിക്കുന്ന വിശേഷണങ്ങള് ഉപയോഗിക്കരുത്.
ഒരു വ്യക്തിയുടെ ന്യായമായ വിചാരണയ്ക്കുള്ള അവകാശത്തെ ദുര്ബലപ്പെടുത്തും വിധം മാധ്യമ വിചാരണ നടത്താന് കഴിയില്ലെന്ന് ജസ്റ്റിസ് അന്സുല് ചൂണ്ടിക്കാട്ടി.
ടെന്ഡര് അഴിമതിയുമായി ബന്ധപ്പെട്ട് എഫ്ഐആര് റദ്ദാക്കണമെന്ന് ആവശ്യപ്പെട്ട് സമര്പ്പിച്ച ഹര്ജി പരിഗണിക്കവെയാണ് കോടതി ഈ ഉത്തരവ് പുറപ്പെടുവിച്ചത്.
ഭരണഘടനയുടെ ആര്ട്ടിക്കിള് 19(1)(a) പ്രകാരമുള്ള മാദ്ധ്യമ സ്വാതന്ത്ര്യം ന്യായമായ നിയന്ത്രണങ്ങള്ക്ക് വിധേയമാണെന്ന് കോടതി ആവര്ത്തിച്ചു. ഇക്കാര്യത്തില്, മാദ്ധ്യമങ്ങളുടെ വിചാരണയ്ക്കെതിരെ മുന്നറിയിപ്പ് നല്കിയ സുപ്രീം കോടതിയുടെ മുന്വിധികളെക്കുറിച്ച് ഹൈക്കോടതി ഓര്മ്മിപ്പിച്ചു.
