ന്യൂയോര്‍ക്ക്: ആഫ്രിക്കയില്‍ നിന്ന് മൊറോക്കോ, ദക്ഷിണാഫ്രിക്ക, ഐവറി കോസ്റ്റ്, ഈജിപ്ത്, കേപ് വെര്‍ദെ, സെനഗല്‍, ഘാന, അള്‍ജീരിയ, കോംഗോ എന്നീ 9 ടീമുകള്‍ റൗണ്ട് ഓഫ് 32ല്‍ ഇടം നേടി ചരിത്രം രചിച്ചു. ഏറ്റവും വലിയ പ്രാതിനിധ്യവുമായി യൂറോപ്പില്‍നിന്ന് 13 ടീമുകള്‍ നോക്കൗട്ടില്‍ ഇടം നേടി. ജര്‍മനി, നെതര്‍ലന്‍ഡ്സ്, ഫ്രാന്‍സ്, സ്പെയിന്‍, പോര്‍ച്ചുഗല്‍, ഇംഗ്ലണ്ട് എന്നീ ടീമുകള്‍ ഗ്രൂപ്പ് വിജയികളായും സ്വിറ്റ്സര്‍ലന്‍ഡ്, നോര്‍വെ, ബെല്‍ജിയം, ക്രൊയേഷ്യ, ഓസ്ട്രിയ എന്നീ ടീമുകള്‍ രണ്ടാം സ്ഥാനക്കാരായും നോക്കൗട്ടിലെത്തി. മികച്ച മൂന്നാം സ്ഥാനക്കാരായി ബോസ്നിയയ്‌ക്കും സ്വീഡനും ഇടം ലഭിച്ചു. തെക്കെ അമേരിക്കയില്‍നിന്ന് യോഗ്യത നേടിയ ആറ് ടീമുകളില്‍ അഞ്ച് ടീമുകളും റൗണ്ട് ഓഫ് 32ല്‍ ഉണ്ട്. ഉറുഗ്വെ മാത്രമാണ് പുറത്തായത്.
അര്‍ജന്റീന, ബ്രസീല്‍, കൊളംബിയ, ഇക്വഡോര്‍, പരാഗ്വെ എന്നീ ടീമുകളാണ് റൗണ്ട് ഓഫ് 32ല്‍ ഇടം നേടിയത്. ഏറ്റവും വലിയ ഭൂഖണ്ഡമായ ഏഷ്യ-ഓഷ്യാനിയ മേഖലയില്‍ നിന്ന് ഒമ്പതു ടീമുകളാണ് ലോകകപ്പിന് യോഗ്യത നേടിയത്. എന്നാല്‍, കേവലം 2 ടീമിനാണ് (ജപ്പാന്‍, ഓസ്ട്രേലിയ) നോക്കൗട്ടിലെത്താനായത്. വടക്കേ അമേരിക്കയില്‍നിന്ന് ആതിഥേയരാജ്യങ്ങളായ അമേരിക്ക, മെക്സിക്കോ, കാനഡ എന്നീ ടീമുകള്‍ യോഗ്യത നേടിയിട്ടുണ്ട്.
