കൊച്ചി: പെരുമ്പാവൂരിൽ ഭർത്താവ് ഭാര്യയെ തലക്കടിച്ചു കൊലപ്പെടുത്തി. പോഞ്ഞാശേരി ചെമ്പരത്തുകുന്നിൽ വാടകയ്ക്ക് താമസിക്കുന്ന അസം നൗഗോൺ സ്വദേശിനി നർസീന ഖാത്തൂൻ ആണ് മരിച്ചത്. ഭർത്താവ് റാബുൽ അമീനെ പോലീസ് കസ്റ്റഡിയിലെടുത്തു.
ഇന്നലെ രാത്രിയിലാണ് സംഭവം. പെരുമ്പാവൂരിലെ പ്ലൈവുഡ് കമ്പനി തൊഴിലാളിയായ റാബുലും ഭാര്യയും തമ്മിൽ കഴിഞ്ഞ കുറച്ചു നാളുകളായി കടുത്ത കുടുംബപ്രശ്നങ്ങൾ ഉണ്ടായിരുന്നു. ഇന്നലെ രാത്രി ഇരുവരും തമ്മിലുണ്ടായ രൂക്ഷമായ തർക്കത്തിനൊടുവിൽ പ്രകോപിതനായ റാബുൽ കയ്യിൽ കിട്ടിയ ഇരുമ്പ് വടി ഉപയോഗിച്ച് നർസീനയുടെ തലയ്ക്കടിക്കുകയായിരുന്നു. ഗുരുതരമായി പരുക്കേറ്റ നർസീന സംഭവസ്ഥലത്തുതന്നെ മരണപ്പെട്ടു.
മൃതദേഹം പെരുമ്പാവൂരിലെ ആശുപത്രിയിൽ സൂക്ഷിച്ചിരിക്കുകയാണ്. ദമ്പതികൾക്ക് മൂന്ന് വയസ് പ്രായമുള്ള കുട്ടിയുണ്ട്. കുഞ്ഞ് ശിശുസംരക്ഷണ വകുപ്പിന്റെ സംരക്ഷണത്തിലാണ് ഉള്ളത്.
