ഡാളസ്: ജോര്‍ദാനെതിരായ ലോകകപ്പ് മത്സരത്തിലൂടെ അര്‍ജന്റീന നായകന്‍ ലയണല്‍ മെസി മറ്റൊരു റിക്കാര്‍ഡ് സ്വന്തമാക്കി.
ജോര്‍ദാനെതിരെ 80-ാം മിനിറ്റില്‍ ഗോള്‍ നേടിയതിലൂടെ തുടര്‍ച്ചയായ ഏഴ് ഫിഫ ലോകകപ്പ് മത്സരങ്ങളില്‍ ഗോള്‍ നേടുന്ന ആദ്യ താരമായി ചരിത്രം സൃഷ്ടിച്ചു. രണ്ടാം പകുതിയില്‍ പകരക്കാരനായി ഇറങ്ങി ഫ്രീകിക്കിലൂടെ ഗോള്‍ നേടുകയും ചെയ്തു. പെനാല്‍റ്റി ഏരിയയ്‌ക്ക് തൊട്ടുപുറത്ത് ഫൗള്‍ ചെയ്യപ്പെട്ടതിനെത്തുടര്‍ന്ന് ലഭിച്ച അവസരത്തില്‍ രണ്ട് ജോര്‍ദാന്‍ പ്രതിരോധക്കാര്‍ക്ക് ഇടയിലൂടെ പായിച്ച പന്ത് വലയുടെ ഇടത് മൂലയില്‍ പതിച്ചു. ലോകകപ്പില്‍ മെസിയുടെ 19-ാം ഗോളാണിത്. ഇത്തവണ ആറ് ഗോളുകള്‍ നേടി മെസിയാണ് മുന്നില്‍. എര്‍ലിങ് ഹാലന്‍ഡ്, കിലിയന്‍ എംബാപ്പെ, ഔസ്മാന്‍ ഡെംബെലെ എന്നിവര്‍ പിന്നാലെയുണ്ട്.
കഴിഞ്ഞ ലോകകപ്പിന്റെ പ്രീക്വാര്‍ട്ടര്‍ മത്സരത്തില്‍ ഓസ്‌ട്രേലിയയ്‌ക്കെതിരെ ഗോള്‍ നേടാന്‍ തുടങ്ങിയതാണ്. തൊട്ടടുത്ത ക്വാര്‍ട്ടര്‍ പോരാട്ടത്തില്‍ നെതര്‍ലന്‍ഡ്‌സിനെതിരെയും സെമിയില്‍ ക്രൊയേഷ്യയ്‌ക്കെതിരായും ഗോള്‍ നേടിയെ മെസി ഫൈനലില്‍ ഫ്രാന്‍സിനെതിരെ രണ്ട് ഗോളുകള്‍ നേടി. ഇത്തവണ അള്‍ജീരിയക്കെതിരെ ഹാട്രിക്, ഓസ്ട്രിയക്കെതിരെ ഇരട്ടഗോള്‍, ഇന്നലെ ഒരു ഫ്രീക്കിക്ക് ഗോളും.
