അറ്റ്ലാന്റ: ഗ്രൂപ്പിലെ അവസാന മത്സരത്തിന് ഇന്നലെ ഇറങ്ങുമ്പോള് കോംഗോ നോക്കൗട്ടില് കടക്കാതെ പുറത്താകുന്നതിന്റെ വക്കിലായിരുന്നു. ഏറ്റവും മികച്ച മൂന്നാം സ്ഥാനക്കാരായെങ്കിലും റൗണ്ട് ഓഫ് 32ല് പ്രവേശിക്കാന് ഉസ്ബക്കിസ്ഥാനെതിരായ അവസാന കളിയില് അവര്ക്ക് മികച്ച വിജയം അത്യന്താപേക്ഷിതമായിരുന്നു.
കളിയുടെ തുടക്കം മുതല് എതിര്ഗോള്മുഖം ലക്ഷ്യമാക്കി മികച്ച മുന്നേറ്റങ്ങളാണ് കോംഗോ നടത്തിയത്. പന്തടക്കത്തിലും ഷോട്ടുകള് പായിക്കുന്നതിലും അവര് മുന്നിട്ടു നിന്നു. പത്താം മിനിറ്റില് ഗോള് വഴങ്ങിയതോടെ കോംഗോ പിടഞ്ഞു.ഉസബെക്കിനായി എല്ദോര് ഷൊമുറോദോവ് ആണ് സ്കോര് ചെയ്തത്. ഈ ഗോളിന് 67-ാം മിനിറ്റ് വരെ അവര് പിന്നിട്ടുനിന്നു. 68-ാം മിനിറ്റില് ലഭിച്ച പെനാല്റ്റി യോനെ വിസ്സ ലക്ഷ്യത്തിലെത്തിച്ച് കോംഗോ സമനില നേടി. പിന്നീട് 78-ാം മിനിറ്റില് ഫിസ്റ്റണ് മയേലെയിലൂടെ ലീഡ് നേടിയ ശേഷം പരിക്ക് സമയത്തിന്റെ ആദ്യ മിനിറ്റിലും ലീഡുയര്ത്തി യോനെ വിസ്സ വീണ്ടും സ്കോര് ചെയ്തു. 3-1ന്റെ വിജയവും കോംഗോ നോക്കൗട്ട് ഉറപ്പിച്ചു. അബ്ബോസ്ബെക്ക് ഫയ്സുല്ലായേവിന്റെ ഉഗ്രന് പാസ് സ്വീകരിച്ച് ക്യാപ്റ്റന് എല്ദോര് ഷോമുറോദോവ്, കോംഗോ ഗോളി ലയണല് എംപാസിയുടെ തലയ്ക്ക് മുകളിലൂടെ പന്ത് മനോഹരമായി ചിപ്പ് ചെയ്തായിരുന്നു ആദ്യ ഗോള്. തൊട്ടുപിന്നാലെ കോംഗോയുടെ എംബുകു ബോക്സിന് വെളിയില് നിന്നു തൊടുത്ത ബുള്ളറ്റ് ഷോട്ടിലൂടെ സമനില ഉറപ്പിച്ചതാണ്. എന്നാല്, കോംഗോ പ്രതിരോധനിരതാരം ഉസ്ബക്കിസ്ഥാന് താരത്തിന്റെ മുഖത്ത് കൈകൊണ്ടടിച്ചെന്ന് വാര് പരിശോധനയില് കണ്ടെത്തിയ റഫറി ഗോള് നിഷേധിച്ചു.
രണ്ടാം പകുതിയില് കോംഗോ പരിശീലകന് സെബാസ്റ്റ്യന് ഡെസാബ്രെ കൂടുതല് അറ്റാക്കര്മാരെ കളത്തിലിറക്കി. 68-ാം മിനിറ്റില് അതിന്റ ഫലവും കണ്ടു. ഉസ്ബക് പ്രതിരോധ താരം അബ്ദുകാദിര് ഖുസനോവ് ബോക്സിനുള്ളില് വച്ച് വിസ്സയെ ഫൗള് ചെയ്തതിന് റഫറി പെനാല്റ്റി വിധിച്ചു. കിക്ക് എടുത്ത വിസ്സ പന്ത് അനായാസം വലയിലെത്തിച്ച് കോംഗോയ്ക്ക് സമനില നേടിക്കൊടുത്തു. സമനില പിടിച്ചതോടെ കോംഗോ ആക്രമണം ശക്തമാക്കി. 78-ാം മിനിറ്റില് അവര് ലീഡും നേടി. മെഷാക്ക് എലിയയുടെ ഷോട്ട് പ്രതിരോധത്തില് തട്ടിത്തെറിച്ചപ്പോള് ഓടിയെത്തിയ ഫിസ്റ്റണ് മായേലെ നല്ലെരു ഫ്ളിക്കിലൂടെ പന്ത് വലയിലെത്തിച്ചു.
90+1-ാം മിനിറ്റില് ബോക്സിന്റെ ഇടതുഭാഗത്തു നിന്ന് പന്തുമായി വെട്ടിത്തിരിഞ്ഞ് യോവാന് വിസ്സ തൊടുത്ത മനോഹരമായ ഒരു ഷോട്ട് ഉസ്ബക് വലയിലെത്തിയതോടെ വിജയവും നോക്കൗട്ട് ബര്ത്തും ഉറപ്പാക്കി.
