വിക്ടോറിയ : സീഷെല്‍സിന്റെ പരമോന്നത ബഹുമതിയായ ഗാര്‍ഡിയന്‍ ഓഫ് ദി ബ്ലൂ ഹൊറൈസണ്‍ പ്രധാനമന്ത്രി നരേന്ദ്ര മോദിക്ക് സമ്മാനിച്ചു.കിഴക്കന്‍ ആഫ്രിക്കന്‍ ദ്വീപ് രാഷ്‌ട്രമായ സീഷെല്‍സ് സന്ദര്‍ശന വേളയില്‍ സീഷെല്‍സ് പ്രസിഡന്റ് ഡോ. പാട്രിക് ഹെര്‍മിനി ആണ് മോദിക്ക് ബഹുമതി സമ്മാനിച്ചത്.
പ്രധാനമന്ത്രി മോദിയുടെ ഹരിത നേതൃത്വം, വികസ്വര രാജ്യങ്ങളുടെ താല്‍പ്പര്യങ്ങള്‍ മുന്നോട്ട് കൊണ്ടുപോകുന്നതിനുള്ള അദ്ദേഹത്തിന്റെ ശ്രമങ്ങള്‍, സമുദ്ര സമ്പദ്വ്യവസ്ഥ, കാലാവസ്ഥാ പ്രവര്‍ത്തനം, സമുദ്ര വിഭവങ്ങളുടെ സുസ്ഥിര മാനേജ്മെന്റ്, ചെറിയ ദ്വീപ് രാജ്യങ്ങളുടെ വികസന അഭിലാഷങ്ങള്‍ എന്നിവ പ്രോത്സാഹിപ്പിക്കുന്നതിനുള്ള അദ്ദേഹത്തിന്റെ ദീര്‍ഘകാല പ്രതിബദ്ധത എന്നിവ മാനിച്ചാണ് ഈ ബഹുമതി അദ്ദേഹത്തിന് നല്‍കുന്നത്.ഇതാദ്യമാണ് ഈ വിശിഷ്ട ബഹുമതി സമ്മാനിക്കുന്നത്.
പരിസ്ഥിതി സംരക്ഷണത്തിനും കാലാവസ്ഥാ വ്യതിയാനത്തിനെതിരെ പോരാടുന്നതിന് പ്രതിജ്ഞാബദ്ധരായ എല്ലാ രാജ്യങ്ങള്‍ക്കും ഈ ബഹുമതി സമര്‍പ്പിക്കുന്നതായി നരേന്ദ്രമോദി പറഞ്ഞു.അന്താരാഷ്‌ട്ര സൗര സഖ്യം, മിഷന്‍ ലൈഫ്, ഏക് പെഡ് മാ കേ നാം, ഇന്റര്‍നാഷണല്‍ ബിഗ് ക്യാറ്റ് അലയന്‍സ് എന്നിവയുള്‍പ്പെടെ ഹരിത ഭൂമിക്കായുള്ള പ്രധാനമന്ത്രിയുടെ ദീര്‍ഘകാല പ്രതിബദ്ധതയെ ഈ ബഹുമതി അടയാളപ്പെടുത്തുന്നു. സുസ്ഥിര വികസനം പ്രോത്സാഹിപ്പിച്ചതിന് പ്രധാനമന്ത്രിക്ക് ലഭിച്ച നിരവധി ബഹുമതികളില്‍ ഏറ്റവും പുതിയതാണ് ഈ അംഗീകാരം.എഫ്എഒയുടെ അഗ്രിക്കോള മെഡല്‍, സിയോള്‍ സമാധാന സമ്മാനം, യുഎന്‍ ചാമ്പ്യന്‍ ഓഫ് ദി എര്‍ത്ത് അവാര്‍ഡ് എന്നിവ ഇതില്‍ ഉള്‍പ്പെടുന്നു.
