കോഴിക്കോട് : താമരശേരിയിലെ രണ്ടു സ്‌കൂളുകളിലെ ഒരു പെണ്‍കുട്ടി ഉള്‍പ്പെടെ മൂന്നു വിദ്യാര്‍ത്ഥികളെ ദുരൂഹത സാഹചര്യത്തില്‍ കാണാതായി. പത്താം ക്ലാസ് വിദ്യാര്‍ഥിനിയെയും പ്ലസ് ടു വിദ്യാര്‍ഥിയായ സുഹൃത്തിനെയും ഇയാളുടെ സുഹൃത്തായ പ്ലസ് വണ്‍ വിദ്യാര്‍ഥിയെയുമാണ് വ്യാഴാഴ്ച മുതല്‍ കാണാതായത്.മൂന്നു പേരുടെയും മാതാപിതാക്കളുടെ പരാതിയില്‍ താമരശേരി പൊലീസ് പ്രത്യേകം കേസുകളെടുത്ത് നടത്തുന്ന അന്വേഷണം പുരോഗമിക്കുന്നു.
പത്താം ക്ലാസുകാരിയെ കാണാതായ പരാതിയാണ് ആദ്യം പൊലീസിലെത്തിയത്. പതിവുപോലെ സ്‌കൂളിലേക്കെന്നു പറഞ്ഞാണ് വിദ്യാര്‍ത്ഥിനി വീട്ടില്‍ നിന്നിറങ്ങിയത്. ക്ലാസ് തുടങ്ങിയിട്ടും പെണ്‍കുട്ടിയെ കാണാതായതോടെ അധ്യാപിക വീട്ടില്‍ വിളിച്ച് അന്വേഷിച്ചപ്പോഴാണ് കുട്ടിയെ കാണാതായ വിവരം പുറത്തായത്.
തെരച്ചിലില്‍ പെണ്‍കുട്ടിയുടെ യൂണിഫോം സ്‌കൂളിന് സമീപത്തെ റബര്‍ തോട്ടത്തോടു ചേര്‍ന്നുള്ള പറമ്പില്‍ കണ്ടെത്തി.പെണ്‍കുട്ടിയുടെ സുഹൃത്തായ ഇതേ സ്‌കൂളിലെ പ്ലസ് ടു വിദ്യാര്‍ഥിയെയും കൂടി കാണാതായെന്ന വിവരം പിന്നീടാണ് പുറത്തു വന്നത്. ഇയാളുടെ ഉറ്റ സുഹൃത്തിനെയും ഇരുവരുടെയും ഇരുചക്രവാഹനവും കാണാതായി.
സ്‌കൂളിന് സമീപത്തെ പറമ്പില്‍ മൂന്ന് പേരും നില്‍ക്കുന്നത് അടുത്തുളള റബര്‍ തോട്ടത്തിലെ തൊഴിലാളി കണ്ടിരുന്നു. അസ്വാഭാവികമായി കുട്ടികളെ കണ്ട ഇയാള്‍ ഇവരുടെ ചിത്രം പകര്‍ത്തി.ഇവരെ കാണാതായെന്ന വിവരം പുറത്തായതോടെ ഈ ഫോട്ടോകള്‍ ഇയാള്‍ സ്‌കൂള്‍ അധികൃതര്‍ക്ക് കൈമാറി. ഇതില്‍ നിന്നാണ് വിദ്യാര്‍ത്ഥിനിയുടെ ഒപ്പമുള്ളവരുടെ വിവരം ലഭിച്ചത്.
പെണ്‍കുട്ടിയും സുഹൃത്തായ പ്ലസ് ടു വിദ്യാത്ഥിയും ഒരു ബൈക്കിലും സുഹൃത്ത് മറ്റൊരു സ്‌കൂട്ടറിലുമായി താമരശേരിയിലൂടെ പോകുന്ന ദൃശ്യങ്ങള്‍ സിസിടിവി ക്യാമറകളില്‍ നിന്ന് കിട്ടി.ഇരുചക്രവാഹനങ്ങള്‍ ലക്കിടി ചുരം കടന്നു പോയതായി പൊലീസിന്റെ സിസിടിവി ക്യാമറയില്‍ പതിഞ്ഞിട്ടുണ്ട്. മുത്തങ്ങ അതിര്‍ത്തി വഴി ഇവര്‍ കര്‍ണാടകയിലേക്ക് കടന്നതായാണ് വിവരം.
കാണാതായവരില്‍ ഒരു ആണ്‍കുട്ടിയുടെ 18,000 രൂപ വിലയുളള സ്മാര്‍ട്‌ഫോണ്‍ 10,000 രൂപയ്‌ക്ക് താമരശേരിയിലെ ഒരു കടയില്‍ വിറ്റതായി പൊലീസ് കണ്ടെത്തി. ഇതിന് ശേഷം മറ്റു രണ്ടു പേരുടെയും പക്കലുള്ള ഫോണുകള്‍ സ്വിച്ച് ഓഫ് ചെയ്താണ് ഇവര്‍ പോയതെന്നാണ് അറിയുന്നത്. കാണാതായ വിദ്യാര്‍ഥികളെ തേടി പൊലീസും വീട്ടുകാരും മൈസൂരുവിലും പരിസരപ്രദേശങ്ങളിലും തെരച്ചില്‍ നടത്തിവരികയാണ്.
