ബോളിവുഡ് സിനിമകളിലൂടെയും ടെലിവിഷൻ ഷോകളിലൂടെയും ശ്രദ്ധേയയായ രാഖി സാവന്ത് എന്നും വിവാദങ്ങളുടെ ഉറ്റതോഴിയായിരുന്നു. അവരുടെ തുറന്നു പറച്ചിലുകളും പലപ്പോഴും മാധ്യമ ശ്രദ്ധ നേടിയിട്ടുണ്ട്.ഇന്ത്യയിലെ ഏറ്റവും ജനപ്രിയ റിയാലിറ്റി ഷോയായ ബിഗ് ബോസിന്റെ ഒന്നാം സീസണിലെ മത്സരാർഥിയായിരുന്നു രാഖി. പിന്നീട് ബിഗ് ബോസിന്റെ പല സീസണുകളിലും ചലഞ്ചറായും അതിഥിയായും എത്തി അവർ പ്രേക്ഷകരെ ഏറെ രസിപ്പിച്ചിട്ടുണ്ട്
അടുത്തിടെ ക്വീനി സിങ്ങിന്റെ പോഡ്കാസ്റ്റിൽ പങ്കെടുത്തപ്പോൾ രാഖി പണത്തെക്കുറിച്ച് നടത്തിയ പരാമർശങ്ങളാണ് അവരെ വീണ്ടും ശ്രദ്ധേയയാക്കിയത്.
എത്രത്തോളം പണം സമ്പാദിക്കാനാണ് ആഗ്രഹിക്കുന്നതെന്നും സ്വന്തം പണം എന്താണ് ചെയ്യാറുള്ളതെന്നും ബിഇ എന്ന ബ്യൂട്ടി ബ്രാൻഡിന്റെ സ്ഥാപകയും സിഇഒയുമായ ക്വീനി, രാഖിയോട് ചോദിച്ചു. പണമാണ് എല്ലാ പ്രശ്നങ്ങൾക്കുമുള്ള പരിഹാരമെന്ന രീതിയിലാണ് രാഖി മറുപടി നൽകിയത്. എത്രത്തോളം പണം വേണമെന്നാണ് ആഗ്രഹമെന്ന് അവതാരക ചോദിച്ചപ്പോൾ, പണത്തിന്റെ മെത്തയിൽ കിടന്നുറങ്ങാൻ എത്രയും പണം വേണോ അത്രമാത്രം പണം സമ്പാദിക്കണമെന്നാണ് തന്റെ ആഗ്രഹമെന്ന് രാഖി വ്യക്തമാക്കി.
“ഞാൻ അത് സ്റ്റൈലിംഗിനായി ചെലവഴിക്കും. ആഭരണങ്ങളിലേക്ക് വിരൽ ചൂണ്ടിക്കൊണ്ട് അവർ ചോദിച്ചു. ഇതൊക്കെ എവിടെ നിന്നാണ് വരുന്നത്? ശേഷം മുടിയിൽ പിടിച്ചുകൊണ്ട് പറഞ്ഞു. ഇത് എന്റെ റഷ്യൻ ഹെയർ ആണ്. ഒരു തവണ ചെയ്യാൻ 12 ലക്ഷം രൂപയാകും. ദുബായ്, ലണ്ടൻ, കാനഡ, അമേരിക്ക എന്നിവിടങ്ങളിൽ നിന്നാണിത് ചെയ്തത്. ഇത് ഇന്ത്യയിൽ ചെയ്യാൻ കഴിയില്ല.” തന്റെ നഖങ്ങൾ ഇന്ത്യയിലല്ല ചെയ്യാറുള്ളതെന്നും അവർ കൂട്ടിച്ചേർത്തു. കൺപീലികളിലേക്ക് ചൂണ്ടിക്കൊണ്ട് അത് ആഫ്രിക്കയിൽ നിന്നാണ് ചെയ്തതെന്ന് അവർ പറഞ്ഞു. “എന്റെ താടിയെല്ല് , കവിളുകൾ, ചുണ്ടുകൾ, മൂക്ക് എന്നിവ നോക്കൂ. ഇതെല്ലാം പണമാണ്. എനിക്ക് 10 ഭർത്താക്കന്മാരെ മാറ്റേണ്ടി വന്നാൽ പോലും ഞാൻ ഇനി ദാരിദ്ര്യത്തിലേക്ക് തിരികെ പോകില്ല. എനിക്ക് ദാരിദ്ര്യം അത്രയ്ക്ക് വെറുപ്പാണ്.” രാഖി സാവന്ത് പറഞ്ഞു.
വിവാഹം കഴിക്കാൻ മതം മാറിയ വ്യക്തിയാണ് രാഖി . നേരത്തെ ആദിൽ ഖാനുമായി രഹസ്യമായി വിവാഹം കഴിച്ച് മതം മാറിയ രാഖി സാവന്ത് പിന്നീട് ഭർത്താവ് തന്നെ സാമ്പത്തികമായും അല്ലാതെയും വഞ്ചിച്ചെന്നും കാട്ടി രംഗത്തുവന്നിരുന്നു. പിന്നാലെ ഭർത്താവിനെതിരെ പീഡന പരാതിയും നൽകി. ആദിലിനെ പോലീസ് അറസ്റ്റ് ചെയ്ത് ജയിലിലാക്കിയിരുന്നു
