ചെന്നൈ: തമിഴ് സിനിമാതാരം രവി മോഹന്റെ ചെന്നൈയിലെ ഇഞ്ചമ്പാക്കത്തെ വസതി പുതിയ വിവാദത്തിന് വേദിയായി. വീട്ടില് നിന്ന് ലക്ഷങ്ങള് വിലമതിക്കുന്ന ആഭരണവും പണവും നഷ്ടമായെന്ന സംശയത്തെ തുടര്ന്ന് വീട്ടുജോലിക്കാരെ മണിക്കൂറുകളോളം തടഞ്ഞുവെച്ച സംഭവമാണ് ഇപ്പോള് ചര്ച്ചയാകുന്നത്.
ലഭ്യമായ വിവരങ്ങള് പ്രകാരം, ഏകദേശം 10 ലക്ഷം രൂപ വിലമതിക്കുന്ന വജ്ര നെക്ലേസും 40,000 രൂപ പണവും കാണാതായെന്നാണ് ആരോപണം. ഇതേ തുടര്ന്നാണ് രണ്ട് വനിതാ ജീവനക്കാരെയും ഒരു ആണ്കുട്ടിയെയും താരത്തിന്റെ സംഘത്തിലുള്ളവര് വീട്ടില് തന്നെ പിടിച്ചിരുത്തി സ്വകാര്യമായി ചോദ്യം ചെയ്തതെന്നാണ് റിപ്പോര്ട്ട്.
തിങ്കളാഴ്ച ജോലിക്കായി പോയവര് വീട്ടിലേക്ക് മടങ്ങിയെത്തിയില്ലെന്ന വിവരം ലഭിച്ചതിനെ തുടര്ന്ന് പോലീസ് കണ്ട്രോള് റൂമില് പരാതി ഉയര്ന്നു. ഇതിന്റെ അടിസ്ഥാനത്തില് നീലാങ്കരൈ പോലീസ് സ്ഥലത്തെത്തി പരിശോധന നടത്തിയപ്പോഴാണ് ജോലിക്കാരെ വീട്ടിനുള്ളില് തടഞ്ഞുവെച്ച നിലയില് കണ്ടെത്തിയത്.
മോഷണസംശയം ഉണ്ടായാല് നിയമപരമായി പോലീസിനെ സമീപിക്കുകയാണ് ശരിയായ നടപടിയെന്നും, വ്യക്തികളെ അനുമതിയില്ലാതെ തടഞ്ഞുവെച്ച് ചോദ്യം ചെയ്യാന് ആര്ക്കും അധികാരമില്ലെന്നും പോലീസ് വ്യക്തമാക്കി. ഉദ്യോഗസ്ഥരുടെ ഇടപെടലിനെ തുടര്ന്ന് ബന്ധപ്പെട്ടവരെ അവിടെ നിന്ന് മോചിപ്പിക്കുകയായിരുന്നു.
സംഭവത്തിന് പിന്നാലെ രവി മോഹന്റെ മാനേജര് മോഷണക്കേസുമായി ബന്ധപ്പെട്ട് വീട്ടുജോലിക്കാര്ക്കെതിരെ ഔദ്യോഗിക പരാതി പോലീസില് നല്കിയിട്ടുണ്ട്. അതേസമയം, ഈ സംഭവങ്ങള് നടക്കുമ്പോള് രവി മോഹന് വീട്ടിലുണ്ടായിരുന്നോയെന്ന കാര്യത്തില് വ്യക്തമായ വിവരങ്ങള് പുറത്തുവന്നിട്ടില്ല. വിഷയത്തില് നടനോ അദ്ദേഹത്തിന്റെ പ്രതിനിധികളോ ഇതുവരെ ഔദ്യോഗിക പ്രതികരണം നടത്തിയിട്ടില്ല.
