ന്യൂജേഴ്സി: ഗോള് മഴ പെയ്ത ദിവസത്തില്, ലോകത്തെ ഏറ്റവും മികച്ച സ്ട്രൈക്കര്മാരില് ഒരാളായ എര്ലിങ് ഹാലന്ഡിനും മഴ നനയാതിരിക്കാനായില്ല. ലോകകപ്പിലെ ഗ്രൂപ്പ് ഐ മത്സരത്തില് ആഫ്രിക്കന് കരുത്തരായ സെനഗലിനെ രണ്ടിനെതിരെ മൂന്ന് ഗോളുകള്ക്ക് (3-2) പരാജയപ്പെടുത്തി നോര്വേ ലോകകപ്പിന്റെ നോക്കൗട്ട് ഘട്ടത്തിലേക്ക് യോഗ്യത നേടി.
ഗില്ലറ്റ് സ്റ്റേഡിയത്തില് നടന്ന ആവേശകരമായ പോരാട്ടത്തില് സൂപ്പര് താരം എര്ലിങ് ഹാലന്ഡിന്റെ ഇരട്ട ഗോള് മികവിലാണ് നോര്വേ ജയം. ഇതോടെ 1998ന് ശേഷം ആദ്യമായി നോര്വേ ലോകകപ്പിന്റെ നോക്കൗട്ട് ഘട്ടത്തിലേക്ക് പ്രവേശിച്ചു. 4-3-3 ശൈലിയില് നോര്വേയും 4-2-3-1 രീതിയില് സെനഗലും ഇറങ്ങി. പോരാട്ടത്തിന്റെ ആദ്യ പകുതിയില് ഇരുടീമുകള്ക്കും നിരവധി അവസരങ്ങള് ലഭിച്ചു. എന്നാല്, ഇടവേള അടുക്കുമ്പോള് നോര്വേ മികച്ച മുന്നേറ്റങ്ങളിലൂടെ കളം നിറഞ്ഞു. 43-ാം മിനിറ്റില് കാലിഡോ കൗലിബാലിയുടെ പിഴവ് മുതലെടുത്ത് പകരക്കാരനായെത്തിയ ഹോംഗ്രെന് പെഡേഴ്സണ് ഗോള് നേടിയതോടെ നോര്വേ മുന്നിലെത്തി. പരിക്കേറ്റ ജൂലിയന് റയേഴ്സണിന് പകരക്കാരനായാണ് ഹോംഗ്രെന് പെഡേഴ്സണ് ഇറങ്ങിയത്. രണ്ടാം പകുതിയുടെ മൂന്ന് മിനിറ്റിനുശേഷം ഹാലന്ഡിന്റെ ആദ്യഗോള്. മാര്ട്ടിന് ഒഡെഗാഡിന്റെ പെര്ഫെക്റ്റ് പാസില് നിന്നായിരുന്നു ഗോള്. നോര്വേയ്ക്കായി തന്റെ അവസാന 12 മത്സരങ്ങളിലും ഹാലന്ഡ് ഗോള് നേടി.
53-ാം മിനിറ്റില് ഇസ്മായില സാര് സെനഗലിനായി ഒരു ഗോള് മടക്കി. എന്നാല് അഞ്ച് മിനിറ്റിനുശേഷം ഹാലന്ഡ് വീണ്ടും ഗോള് നേടിയതോടെ നോര്വേയുടെ ഗോള് നേട്ടം മൂന്നായി. സ്റ്റോപ്പേജ് സമയത്ത് വീണ്ടും ഗോളടിച്ച് സാര് നോര്വേയെ ഞെട്ടിച്ചെങ്കിലും വിജയിക്കാന് അതുപോരായിരുന്നു. ഗ്രൂപ്പ് ഘട്ടത്തില് ഒരു മത്സരം ബാക്കി നില്ക്കെ നോക്കൗട്ട് സ്ഥാനം ഉറപ്പാക്കാന് ആവശ്യമായ വിജയം സ്റ്റേല് സോള്ബാക്കന്റെ ടീം നിലനിര്ത്തി.
