ലോസ് ആഞ്ചല്സ്: ബെല്ജിയത്തിനെതിരെയുള്ള മത്സരത്തില് 0-0 സമനിലയില് പിരിഞ്ഞശേഷം ഇറാന് സംഘം ലോസ് ആഞ്ചല്സിലെ സോഫി സ്റ്റേഡിയത്തിലെ ലോക്കര് റൂമില് എഴുതിവച്ച കത്ത് വലിയ ചര്ച്ചയാവുകയാണ്. ഇറാന് സംഘത്തിന് നല്കിയ ഊഷ്മള സ്വീകരണത്തിനും പിന്തുണയ്ക്കും സ്നേഹം അറിയിക്കുന്നുവെന്നും കുറിപ്പില് പറയുന്നു. സന്ദേശം പിന്നീട് ഇറാന്റെ ഫുട്ബോള് ഫെഡറേഷന് പുറത്തുവിട്ടു.
മത്സരത്തിലുടനീളം യാത്രാ നിയന്ത്രണങ്ങളും മറ്റ് വിസാ വെല്ലുവിളികളും സംഘം നേരിട്ടിരുന്നു. ലോസ് ആഞ്ചല്സിലെ ജനങ്ങളുടെ ആതിഥ്യമര്യാദയ്ക്ക് എങ്ങനെ നന്ദി പറയണമെന്നറിയില്ല, ലോകമെമ്പാടുമുള്ള രാജ്യങ്ങള്ക്കിടയില് സ്നേഹം, സമാധാനം, പരസ്പര ബന്ധം എന്നിവ നിലനില്ക്കട്ടെയെന്നും കുറിപ്പില് പറയുന്നു. ഞങ്ങള്ക്ക് ലോസ് ആഞ്ചല്സ് മറ്റൊരു വീടുപോലയാണ്. മത്സരത്തിനിടയില് സ്റ്റേഡിയത്തിലേക്ക് നോക്കിയാല് ഇറാനിയന് പതാകകള് കാണുന്നത് തന്നെ ഊര്ജമാണ്. എന്നാല് ചിലരില് രാഷ്ട്രീയ വ്യത്യാസങ്ങള് പ്രകടമായിരുന്നു, ഇറാന്റെ ഈ വാചകങ്ങള് ഏറെ ഹൃദയസ്പര്ശിയും ഊഷ്മള സ്നേഹത്തിന്റെ മാതൃകയും കൂടിയായിരുന്നു.
യാത്രാനിയന്ത്രണങ്ങള് ഇറാന്റെ ലോകകപ്പ് ഒരുക്കങ്ങളെ ബാധിച്ചിട്ടുണ്ട്. ഓരോ മത്സരവും കഴിഞ്ഞ ഉടനെ ഇറാന് മെക്സിക്കോയിലുള്ള ടിജുവാന ബേസ് ക്യാമ്പിലേക്ക് മടങ്ങണമെന്നായിരുന്നു അമേരിക്കയുടെ നിര്ദേശം. ലോകകപ്പിലെ മറ്റേതൊരു ടീമിനേക്കാളും കഠിനമായ കര്ശന നിര്ദേശങ്ങള് ഞങ്ങളുടെ ടീം നേരിട്ടിട്ടുണ്ടെന്ന് മുഖ്യ പരിശീലകന് ആമിര് ഗലെനോയ് പറഞ്ഞു. ബുദ്ധിമുട്ടുകള്ക്കിടയിലും കളിയില് ഉയര്ന്ന നിലവാരം പുലര്ത്തിയതിന് ടീം അംഗങ്ങളെ അദ്ദേഹം പ്രശംസിക്കുകയും ചെയ്തു.
