ന്യൂദല്ഹി: മധുരമനോഹര മനോജ്ഞം എന്ന് ചൈനയെക്കുറിച്ച് പാടിയത് ഒഎന്വി കുറുപ്പാണ്. ചങ്കിലെ ചൈന എന്നാണ് ചൈനയെക്കുറിച്ച് ചിന്താ ജെറോം പാടിപ്പുകഴ്ത്തിയത്. ഈ രണ്ടു പേരും കമ്മ്യൂണിസ്റ്റ് പാര്ട്ടിക്കാരാണ്. എന്നാല് ഇതൊന്നുമല്ല ചൈനയെന്നും ചൈനയില് ജാതിയും ഉച്ചനീചത്വങ്ങളും ഉണ്ടെന്നും പണക്കാരനും പാവപ്പെട്ടവനും തമ്മിലുള്ള വിടവ് അതിഭയങ്കരമാണെന്നും എന്തും ചെയ്യാന് മടിയില്ലാത്ത ഏകാധിപതികളായ രാക്ഷസന്മാരാണ് കമ്മ്യൂണിസ്റ്റ് നേതാക്കളെന്നും പറയുന്ന ഒരു കൂട്ടം വീഡിയോകള് സോഷ്യല് മീഡിയയില് വൈറലായി പ്രചരിക്കുകയാണ്. ഇത് ചൈനയുടെ ഉറക്കം കെടുത്തുക മാത്രമല്ല, ചൈന എന്ന ആഡംബരമുഖം മൂടി പൊളിഞ്ഞുവീഴുകയും ചെയ്തിരിക്കുന്നു.
ചൈനയുടെ ആഡംബര, ആധുനികവുമായി മുഖംമൂടികള് പിച്ചിച്ചീന്തിയെറിഞ്ഞത് ഇന്ത്യയില് നിന്നുള്ള ഒരു പിടി വ്ളോഗര്മാരാണ്. ചൈനയിലെ പച്ചയായ സത്യങ്ങള് തുറന്നുകാണിക്കുന്ന ഇന്ത്യന് യൂട്യൂബര്മാര്. ചൈനയ്ക്ക് വലിയ നാണക്കേടായിരിക്കുകയാണ്. ചൈനയിലെ ഖനിത്തൊഴിലാളികളുടെ ശോചനീയാവസ്ഥകള്, തീരെ ശമ്പളം കുറഞ്ഞ ജോലിയില് തളഞ്ഞുകിടക്കേണ്ടി വരുന്ന പാവപ്പെട്ട ചില പാവപ്പെട്ട വിഭാഗക്കാര്…തുടങ്ങി ചൈന ഇതുവരെ മറച്ചുപിടിക്കാന് ശ്രമിച്ച സത്യങ്ങളാണ് പുറത്തുവന്നിരിക്കുന്നത്.
ചൈനയില് ഉച്ചനീചത്വങ്ങള് ഉണ്ടെന്നും ഇന്ത്യയിലെ ജാതിവ്യവസ്ഥപോലെ ചൈനയിലും ചില ജോലികള് ചില പ്രത്യേക വിഭാഗം ആളുകള് മാത്രമാണ് ചെയ്യുന്നത് എന്നും ഇത് ചൈനയിലെ ജാതി സൂചനയുടെ ലക്ഷ്ണമാണെന്നും വ്ളോഗര്മാര് ചൂണ്ടിക്കാട്ടുന്നു. ശൗചാലയങ്ങളില് താമസിക്കേണ്ടി വരുന്ന വൃദ്ധന്മാരുള്ള വൃദ്ധസദനങ്ങള്, അതുപോലെ അംബരചൂബിയായ ഒരു കെട്ടിടത്തിന്റെ ഉള്ളില് മുഴുവന് അതെത്ര ശോചനീയമായ കെട്ടിടമാണെന്ന് കാട്ടിത്തരുന്നു. ഒരാള് കിലോമീറ്ററോളം നടന്നുപോകുന്നത് കഴുത്തൊപ്പം വെള്ളത്തിലൂടെയാണ്. അതായത് വെള്ളം ഒഴുകിപ്പോകാനുള്ള ഓടകളൊന്നും കാര്യമായി ഇല്ലാത്ത നഗരങ്ങളിലാണ് ഇത്തരം വെള്ളപ്പൊക്കം കാണാന് കഴിയുക.
