കൊച്ചി:മാട്രിമൊണി സൈറ്റിലൂടെയും സമൂഹമാധ്യമങ്ങള് വഴിയും പരിചയപ്പെടുന്ന യുവാക്കളെ തട്ടിപ്പിനിരയാക്കിയ യുവതി പെരുമ്പാവൂര് പൊലീസിന്റെ പിടിയിലായി.ജീവിത പങ്കാളിയാക്കാമെന്നും ബിസിനസ് പാര്ട്ണര് ആക്കാമെന്നും പറഞ്ഞ് യുവാക്കളില് നിന്നും പണം തട്ടിയ ആലുവ എടത്തല സ്വദേശിനി ഷംല ഷമീര്(29) ആണ് പിടിയിലായത്.
വാഴക്കുളം മഞ്ഞപ്പെട്ടി സ്വദേശി യുവാവില് നിന്നും 50ലക്ഷം തട്ടിയെടുത്ത കേസിലാണ് ഇവരെ അറസ്റ്റ് ചെയ്തത്.2024 സെപ്തംബര് മൂന്ന് മുതല് 2024 നവംബര് 20 വരെയുള്ള കാലയളവില് പല ദിവസങ്ങളിലായാണ് ഇവര് പണം കൈക്കലാക്കിയത്. ബാങ്ക് അക്കൗണ്ട് വഴിയും ഗൂഗിള് പേ വഴിയും പണം കൈക്കലാക്കിയ ഇവര് യുവാവിനെ ബിസിനസ് പാര്ട്ണര് ആക്കുകയോ, പണം മടക്കി നല്കുകയോ ചെയ്തില്ല.
യുവാവ് നല്കിയ പരാതി പ്രകാരം കേസെടുത്ത പെരുമ്പാവൂര് പൊലീസ് പ്രതിയെ ഓടക്കാടിയിലെ വീട്ടില് നിന്നുമാണ് വിവാഹിതയായ യുവതിയെ അറസ്റ്റ് ചെയ്തത്. വയനാട്, കോഴിക്കോട്, മലപ്പുറം, കോതമംഗലം ആലുവ അടക്കമുള്ള വിവിധ പ്രദേശങ്ങളില് നിന്ന് സമൂഹമാധ്യമങ്ങള് വഴി പരിചയപ്പെട്ട യുവാക്കളില് നിന്നും സമാനമായി തട്ടിപ്പ് നടത്തിയതായാണ് വിവരം. സമൂഹമാധ്യമങ്ങളിലൂടെ പരിചയത്തിലാകുന്ന യുവാക്കളില് നിന്ന് ആദ്യം ചെറിയ തുക ആവശ്യപ്പെടും.പിന്നീടാണ് തന്ത്രപരമായി വാഗ്ദാനം നല്കി കൂടുതല് തുക വാങ്ങുക.
എറണാകുളത്തെ ഒരു മാളിലേക്ക് കാരിബാഗുകള് നല്കുന്നതിന് ഓര്ഡര് വാങ്ങി നല്കാമെന്ന് പറഞ്ഞ് കോതമംഗലം സ്വദേശിയില് നിന്ന് 20 ലക്ഷത്തോളം രൂപയും ആലുവ സ്വദേശിയില് നിന്ന് 11 ലക്ഷം രൂപയും തട്ടിയെന്നാണ് റിപ്പോര്ട്ട്.വിവരം. തട്ടിപ്പിലൂടെ കിട്ടുന്ന പണം ആഡംബര ജീവിതത്തിനാണ് ഇവര് ഉപയോഗിച്ചിരുന്നത്.
