ന്യൂയോര്ക്ക്: ലോകകപ്പ് ഫുട്ബോളില് തകര്പ്പന് വിജയവുമായി ജപ്പാനും നെതര്ലന്ഡ്സും. ഇഞ്ചുറി സമയത്ത് നേടിയ ഗോളില് ഐവറികോസ്റ്റിനെ പരാജയപ്പെടുത്തി ജര്മ്മനി നോക്കൗട്ട് റൗണ്ടില് ഇടംപിടിച്ചു. ഇക്വഡോറിയന് ആക്രമണ തിരമാലകളെ തടഞ്ഞുനിര്ത്തി സമനില സ്വന്തമാക്കി കുറസാവോ. ഇന്നലെ ലോകകപ്പ് ഫുട്ബോളില് നടന്ന മത്സരങ്ങളിലെ രത്നച്ചുരുക്കം ഇതായിരുന്നു.
ഗ്രൂപ്പ് ഇയില് നിന്നാണ് തുടര്ച്ചയായ രണ്ടാം വിജയം സ്വന്തമാക്കി ജര്മനി നോക്കൗട്ട് റൗണ്ടിലെത്തിയത്. പകരക്കാരനായി ഇറങ്ങിയ ഉന്ഡാവയുടെ ഇരട്ട ഗോളാണ് ഐവറികോസ്റ്റിനെതിരായ കളിയില് ജര്മനിക്ക് വിജയം സമ്മാനിച്ചത്. ഇതോടെ രണ്ട് കളികളില് നിന്ന് ആറ് പോയിന്റുമായാണ് ജര്മനി അടുത്ത റൗണ്ടിലേക്ക് മുന്നേറിയത്. ഒരു ഗോളിന് പിന്നിട്ടുനിന്ന ശേഷമായിരുന്നു ജര്മനിയുടെ വിജയം. കഴിഞ്ഞ രണ്ട് ലോകകപ്പുകളിലും ഗ്രൂപ്പ് ഘട്ടത്തില് പുറത്തായ ജര്മനി 2014ന് ശേഷം ആദ്യമായാണ് നോ
ക്കൗട്ട് ഘട്ടത്തിലേക്ക് മുന്നേറുന്നത്.
ഗ്രൂപ്പിലെ മറ്റൊരു മത്സരത്തില് ഇക്വഡോറിയന് ആക്രമണ തിരമാലകളെ തകര്ത്തെറിഞ്ഞ് വിജയത്തോളം പോന്ന സമനില നേടി കുറസാവോ ചരിത്രം കുറിച്ചു. സമനിലയോടെ ഗ്രൂപ്പില് ഒരു പോയിന്റ് നേടാനും ആദ്യമായി ലോകകപ്പിനെത്തിയ കുറസാവോയ്ക്കായി. ഇക്വഡോര് ഓണ് ടാര്ഗറ്റിലേക്ക് മാത്രം പായിച്ച 15 ഷോട്ടുകളാണ് കുറസാവോ ഗോളി എലോയ് റൂം തടുത്തിട്ടത്. ഒറ്റയാനായി പോസ്റ്റിന് മുന്നില് നിലയുറപ്പിച്ച എലോയ് റൂമിന്റെ വ്യക്തിഗത മികവാണ് ഇക്വഡോറിനെ വിജയത്തില് നിന്ന് തടഞ്ഞുനിര്ത്തിയത്. 2014ലെ ലോകകപ്പില് ബെല്ജിയത്തിനെതിരെ അമേരിക്കയുടെ ടിം ഹൊവാര്ഡ് നടത്തിയ 16 സേവുകളാണ് നിലവിലെ റിക്കാര്ഡ്.
സേവുകളുടെ എണ്ണത്തില് രണ്ടാം സ്ഥാനത്തെത്താനും ഇന്നലെ കുറസാവോ ഗോളിക്കായി. ആദ്യ കളിയില് ഇക്വഡോര് 1-0ന് ഐവറികോസ്റ്റിനോടും കുറസാവോ 7-1ന് ജര്മനിയോടും പരാജയപ്പെട്ടിരുന്നു. സമനിലയോടെ ഇക്വഡോറിനും ഒരു പോയിന്റ് ലഭിച്ചു.
ഗ്രൂപ്പ് എഫിലെ മത്സരത്തില് നെതര്ലന്ഡ്സ് ഒന്നിനെതിരെ അഞ്ച് ഗോളുകള്ക്ക് സ്വീഡനെ തകര്ത്തെറിഞ്ഞപ്പോള് ജപ്പാന് മറുപടിയില്ലാത്ത നാല് ഗോളുകള്ക്ക് ടുണീഷ്യയെ പരാജയപ്പെടുത്തി.
ഈ ലോകകപ്പില് ജപ്പാന്റെയും ഡച്ചിന്റെയും ആദ്യ വിജയമാണിത്. വിജയത്തോടെ നാലു പോയിന്റുമായി നെതര്ലന്ഡ്സും ജപ്പാനും ഒന്നും രണ്ടും സ്ഥാനത്ത് നില്ക്കുന്നു.
