വായന ചിന്താ സരണിക്കേകും
പോഷക മറിയേണം
ഇരുണ്ട മനസ്സില് നെയ്ത്തിരി
ചിന്തും പ്രകാശ ബിന്ദുക്കള്
നഞ്ഞു നിറഞ്ഞൊരു മനസ്സില് കരുണാ
ദീപം മിന്നീടും
പ്രകൃതീശ്വരിയുടെ വരദാനങ്ങള്
സ്മരണയില് നിന്നീടും
സമസ്ത ലോക പ്രണയം മനസ്സില്
തെളിഞ്ഞു വന്നീടും
വിശിഷ്ട ഗ്രന്ഥത്താളുകളില് നാം
തെരഞ്ഞു ചെല്ലുമ്പോള്
പുതു പുതു സംസ്ക്കാരങ്ങള് നല്കും
നവചേതന കാണാം
ജാതി, മതത്തിന് വേലികളില്ലാ
മനുഷ്യകുലം കാണാം
അഴിയാ ബന്ധനമറുത്തു മാറ്റിയ
സമൂഹമുണ്ടവിടെ
മനുഷ്യസഹോദര്യം തീര്ത്തൊരു
സ്നേഹ മതില്ക്കെട്ടില്
നിറഞ്ഞു നില്ക്കും ജീവിത കുസുമ
പരിമളവും നുകരാം
തുടച്ചു നീക്കാനെളുതല്ലാത്തൊരു
മാനവ സംസ്കൃതിയെ
വരച്ചുകാട്ടിയ മോഹനമാകും
ചരിതം തൊട്ടറിയാം
വായന, വായന, വായനയതിലൊരു
വാടാമലരുണ്ട്
മുത്തും പവിഴവുമൊത്തു തിളങ്ങും
മാല്ല്യവുമുണ്ടവിടെ
ഒരു നാള് പുഷ്പിച്ചാടിയുലഞ്ഞാല്
സ്ഥിരമായ് വര്ത്തിക്കും
ഈ മലര്വാടിയിലെന്നും മലരുകള്
പൂത്തുലസിച്ചീടാന്
വായ്ക്കമൃതായിത്തീരണ മല്ലാതില്ലാ
ചെറുമാര്ഗ്ഗം
വായന, ആചരണത്തിന് ചരടില്
കൊരുത്തു കെട്ടരുതേ
അറിവിന് നീര്നദി തടസ്സമില്ലാ-
തൊഴുകട്ടിവിടെന്നും.
കവിത: വായന
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.