റായ്പുർ: ഛത്തീസ്ഗഢിലെ കോറിയ ജില്ലയിൽ മണൽ ഖനന മാഫിയയെ എതിർത്തുനിന്നിരുന്ന ബിജെപി നേതാവിനെ വാഹനം തടഞ്ഞ് അക്രമികൾ ജീവനോടെ തീവെച്ചുകൊന്നു. മണൽ ഇടപാട് തർക്കവുമായി ബന്ധപ്പെട്ട ഞെട്ടിക്കുന്ന ഈ സംഭവത്തിൽ, ഒരു ബിജെപി നേതാവും മറ്റ് രണ്ട് പേരും സഞ്ചരിച്ച എസ്യു വി ട്രക്കുകൾക്കിടയിൽ തടഞ്ഞിട്ടശേഷം തീയിടുകയായിരുന്നു. തുടർന്ന് ജീവനോടെ കത്തിച്ചതായാണ് പോലീസ് പറയുന്നത്.
സോൺഹട്ട് പോലീസ് സ്റ്റേഷൻ പരിധിയിലുള്ള നൗഗൈൻ ഗ്രാമത്തിൽ രാത്രി വൈകിയാണ് സംഭവം നടന്നത്. ബിജെപി നേതാവും മുൻ ജൻപദ് പഞ്ചായത്ത് പ്രസിഡന്റുമായ ഭരത് സിംഗ് സഞ്ചരിച്ചിരുന്ന ടൊയോട്ട ഫോർച്യൂണർ, ദീർഘകാലമായി നിലനിൽക്കുന്ന തർക്കത്തെത്തുടർന്ന് ഒരു മീറ്റിംഗിനിടെ പതിയിരുന്ന് ആക്രമിച്ചതായി പറയപ്പെടുന്നു.
പോലീസും കുടുംബാംഗങ്ങളും പറയുന്നതനുസരിച്ച്, ഭരത് സിങ്ങിന്റെ വാഹനം ട്രക്കുകൾ കൊണ്ട് വളഞ്ഞ ശേഷം എല്ലാ രക്ഷപ്പെടാനുള്ള വഴികളെല്ലാം തടഞ്ഞ് പെട്രോൾ ഒഴിച്ച് തീയിടുകയായിരുന്നു. ഭരത് സിംഗ് ഉൾപ്പെടെ എസ്യുവിയിലുണ്ടായിരുന്ന മൂന്ന് പേർ ആക്രമണത്തിൽ മരിച്ചു.
വീരേന്ദ്ര സിംഗ്, ബിജെപി നേതാവിന്റെ അധ്യാപകനും ബന്ധുവുമായ നാഗേന്ദ്ര സിംഗ് എന്നിവരാണ് മരിച്ച മറ്റുള്ളവർ. ഗുരുതരമായ പരിക്കുകളോടെ മായങ്ക് സിംഗ് എന്നയാൾ ബിലാസ്പൂരിലെ അപ്പോളോ ആശുപത്രിയിൽ ചികിത്സയിലാണ്.
കൊലപാതകം, കൊലപാതകശ്രമം എന്നിവയുൾപ്പെടെ ഗുരുതരമായ കുറ്റങ്ങൾ ചുമത്തി പോലീസ് ഇതുവരെ നാല് പ്രതികളെ അറസ്റ്റ് ചെയ്യുകയും പേരുള്ള ഒമ്പത് പേർക്കെതിരെ കേസ് രജിസ്റ്റർ ചെയ്യുകയും ചെയ്തിട്ടുണ്ട്. ബാക്കിയുള്ള പ്രതികളെ പിടികൂടാൻ തിരച്ചിൽ ആരംഭിച്ചിട്ടുണ്ട്.
മേഖലയിലെ മണൽ ഖനന പ്രവർത്തനങ്ങളെയും ഗതാഗത പാതകളുടെ നിയന്ത്രണത്തെയും ചൊല്ലിയുള്ള ദീർഘകാല സംഘർഷമാണ് അക്രമത്തിന് കാരണമെന്ന് പ്രാഥമിക അന്വേഷണങ്ങൾ സൂചിപ്പിക്കുന്നു. ക്വാറി കരാറുകളെയും വരുമാനം പങ്കിടലിനെയും ചൊല്ലി രണ്ടുവിഭാഗക്കാർ തമ്മിൽ പല തർക്കങ്ങളും ഇവിടെ ഉണ്ടായിട്ടുണ്ട്.
സംഘർഷം നിലനിൽക്കുന്നതിനാൽ പ്രദേശത്ത് അധികൃതർ സുരക്ഷ ശക്തമാക്കിയിട്ടുണ്ട്, അതേസമയം സംഭവങ്ങളുടെ കൃത്യമായ ക്രമം നിർണ്ണയിക്കാൻ അന്വേഷണം തുടരുകയാണെന്ന് മുതിർന്ന ഉദ്യോഗസ്ഥർ സ്ഥിരീകരിച്ചു.
സംഭവം ശക്തമായ രാഷ്ട്രീയ പ്രതികരണങ്ങൾക്ക് കാരണമായിട്ടുണ്ട്, സിബിഐ അന്വേഷണം ഉൾപ്പെടെയുള്ള കർശന നടപടികളും സമഗ്രമായ അന്വേഷണവും പ്രാദേശിക നേതാക്കൾ ആവശ്യപ്പെട്ടു.
