ഭോപ്പാൽ ; മധ്യപ്രദേശിലും ഏകീകൃത സിവിൽ കോഡ് നടപ്പാക്കാൻ തീരുമാനം. മൺസൂൺ സമ്മേളനത്തിൽ യുസിസി ബിൽ നിയമസഭയിൽ അവതരിപ്പിക്കാൻ ബിജെപി സർക്കാർ ഒരുങ്ങുകയാണ് . നേരത്തെ, ഉത്തരാഖണ്ഡിലെയും അസമിലെയും ബിജെപി സർക്കാരുകൾ യുസിസി നടപ്പിലാക്കിയിരുന്നു.
കഴിഞ്ഞ ദിവസം മധ്യപ്രദേശ് മുഖ്യമന്ത്രി ഡോ. മോഹൻ യാദവ് തന്നെ സംസ്ഥാന നിയമസഭയുടെ വരാനിരിക്കുന്ന മൺസൂൺ സമ്മേളനത്തിൽ യൂണിഫോം സിവിൽ കോഡ് ബിൽ അവതരിപ്പിക്കുമെന്ന് പറഞ്ഞിരുന്നു . ജൂലൈ 20 ന് സമ്മേളനം ആരംഭിക്കും.
ഈ വിഷയം പരിശോധിക്കുന്നതിനും ശുപാർശകൾ തയ്യാറാക്കുന്നതിനുമായി മുൻ സുപ്രീം കോടതി ജഡ്ജിയുടെ നേതൃത്വത്തിൽ ആറ് അംഗ സമിതിയെ മുഖ്യമന്ത്രി യാദവ് രൂപീകരിച്ചതിന് രണ്ട് മാസത്തിന് ശേഷമാണ് തീരുമാനം. “ഈ സമ്മേളനത്തിൽ യൂണിഫോം സിവിൽ കോഡ് ബില്ലും അവതരിപ്പിക്കും. ബാബ മഹാകാലിന്റെ അനുഗ്രഹത്തോടെ, ഈ സമ്മേളനത്തിൽ യുസിസി ബിൽ പാസാക്കും.” എന്നാണ് മാധ്യമങ്ങൾക്ക് മുൻപിൽ മുഖ്യമന്ത്രി വ്യക്തമാക്കിയത്.
വിവാഹം, വിവാഹമോചനം, ജീവനാംശം, അനന്തരാവകാശം, ദത്തെടുക്കൽ, ലിവ്-ഇൻ ബന്ധങ്ങൾ എന്നിവയുൾപ്പെടെ നിലവിലുള്ള പ്രത്യേക വ്യക്തിനിയമങ്ങൾക്ക് പകരമായി മധ്യപ്രദേശിൽ പുതിയ നിയമം നടപ്പിലാക്കും.
