തിരുവനന്തപുരം: സ്വകാര്യ ബാങ്ക് മാനേജരെ ഒരു സംഘം തട്ടിക്കൊണ്ടുപോയെന്ന് പരാതി. പൂവച്ചല് ജംഗ്ഷനിലെ മുത്തൂറ്റ് ബാങ്കിന്റെ മാനേജര് കണ്ടല സ്വദേശി ഗിരീഷിനെയാണ് തട്ടിക്കൊണ്ടുപോയത്. വ്യാഴാഴ്ച ജോലി കഴിഞ്ഞ് വീട്ടിലേക്ക് പോകാനായി ഗിരീഷ് പുറത്തിറങ്ങിയപ്പോഴാണ് സംഭവം.
ബൈക്ക് കേടായതിനാല് സഹപ്രവര്ത്തകന്റെ സഹായത്തോടെ സ്റ്റാര്ട്ട് ചെയ്ത് കയറാന് തുടങ്ങിയപ്പോള് ഒരു കാര് അതിവേഗത്തില് പാഞ്ഞ് വന്ന് ബൈക്കിന് തൊട്ടുമുന്നിലായി നിന്നു. കാറില് നിന്ന് ഇറങ്ങിയ അഞ്ചുപേരും തൊട്ടുപിന്നാലെ ബൈക്കിലെത്തിയ രണ്ടുപേരും ചേര്ന്ന് ഗിരീഷ് തടഞ്ഞുവച്ചു.
പിന്നീട് ഇയാളെ ബലമായി കാറില് കയറ്റി കാട്ടാക്കട ഭാഗത്തേക്ക് അതിവേഗം ഓടിച്ചുപോവുകയായിരുന്നു. കൂടെയുണ്ടായിരുന്ന ബൈക്കും കാറിന് പിന്നാലെ പോയി. സംഭവമറിഞ്ഞ് കാട്ടാക്കട പൊലീസ് സ്ഥലത്തെത്തി അന്വേഷണം ആരംഭിച്ചു.
എന്നാല്, സംഘം രാത്രി തന്നെ ഗിരീഷിനെ അതേ സ്ഥലത്ത് വിട്ടയച്ചു. ഗിരീഷിനെ ബലമായി കാറില് കയറ്റുന്നതിന്റെ ദൃശ്യങ്ങള് ലഭിച്ചു.
