കൊച്ചി: മാസപ്പടിക്കേസില്‍ പ്രതിപക്ഷനേതാവ് പിണറായി വിജയന്റെ മകള്‍ വീണാ വിജയനെ ഇ ഡി ഇന്നലെ 9 മണിക്കൂറിലേറെ ചോദ്യം ചെയ്തു. രാവിലെ പത്തരയോടെ ഭര്‍ത്താവും സിപിഎം നേതാവുമായ മുഹമ്മദ് റിയാസിനൊപ്പമാണ് വീണ ഇ ഡി ഓഫീസില്‍ എത്തിയത്. എന്നാല്‍ റിയാസ് കാറില്‍ നിന്ന് പുറത്തേക്കിറങ്ങിയല്ല. വീണ ഇറങ്ങിക്കഴിഞ്ഞപ്പോള്‍ തിരിച്ചുപോവുകയായിരുന്നു. കറുത്ത മാസ്‌കണിഞ്ഞുവന്ന വീണ വാര്‍ത്തലേഖകര്‍ക്ക് മുഖം കൊടുക്കാതെ ഇ ഡി ഓഫീസിലേക്ക് കയറിപ്പോയി.
പതിനൊന്ന് മണിയോടെയാണ് ചോദ്യം ചെയ്യല്‍ ആരംഭിച്ചത്. തെളിവുകള്‍ നിരത്തിയുള്ള ചോദ്യങ്ങള്‍ക്കു മുന്‍പില്‍ വീണ പലപ്പോഴും പതറി. പല ചോദ്യങ്ങള്‍ക്കും വ്യക്തമായ ഉത്തരം നല്‍കാനായില്ല. ഐടി കണ്‍സള്‍ട്ടന്‍സി സേവനങ്ങളൊന്നും നല്‍കാതെ സിഎംആര്‍എല്‍ കമ്പനിയില്‍ നിന്നും വീണയുടെ എക്‌സാലോജിക് സൊല്യൂഷന്‍സ് 2.78 കോടി രൂപ കൈപ്പറ്റിയെന്നാണ് ഇ ഡിയുടെ പ്രധാന കണ്ടെത്തല്‍. എന്ത് സേവനങ്ങളാണ് നല്‍കിയതെന്ന് ചോദ്യത്തിന് വ്യക്തമായ മറുപടി നല്‍കാന്‍ വീണയ്‌ക്കായില്ല. റെയ്ഡില്‍ ലഭിച്ച തെളിവുകളും നിരത്തിയായിരുന്നു ചോദ്യം ചെയ്യല്‍. രാത്രി 7.50 ഓടെ വീണ മടങ്ങി. കഴിഞ്ഞ ദിവസങ്ങളില്‍ സിഎംആര്‍എല്‍ എംഡി ശശിധരന്‍ കര്‍ത്തയുടെ ഭാര്യ ജയ കര്‍ത്തയെയും മക്കളായ ശരണ്‍ എസ്. കര്‍ത്തയെയും ഷിബി കര്‍ത്തയെയും ചോദ്യം ചെയ്തിരുന്നു. ഇവരില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ വീണയോട് വ്യക്തത വരുത്തിയിരുന്നു. ചോദ്യം ചെയ്യല്‍ വീണ്ടും ഉണ്ടാകുമെന്നാണ് സൂചന. റെയ്ഡിനിടയില്‍ വീണയെ പ്രാഥമികമായി ഇ ഡി ചോദ്യം ചെയ്തിരുന്നു. രണ്ടാംഘട്ട ചോദ്യം ചെയ്യലാണ് ഇന്നലെ നടന്നത്. ഇനി ചോദ്യം ചെയ്യലിനുശേഷം വീണയെ അറസ്റ്റ് ചെയ്യാനുള്ള സാധ്യതയും തള്ളിക്കളയാനാവില്ല.
കഴിഞ്ഞ വെള്ളിയാഴ്ച വീണയോട് ഹാജരാകാന്‍ ആവശ്യപ്പെട്ട് നോട്ടീസ് നല്‍കിയിരുന്നെങ്കിലും ആരോഗ്യപ്രശ്‌നങ്ങള്‍ ചൂണ്ടിക്കാട്ടി ചോദ്യം ചെയ്യലില്‍ നിന്നും ഒഴിയുകയായിരുന്നു. ആവശ്യപ്പെട്ട രേഖകള്‍ അഭിഭാഷകന്‍ വഴി സമര്‍പ്പിക്കാമെന്ന് വീണ ഇ ഡിയെ അറിയിച്ചിരുന്നു. എന്നാല്‍ ഇന്നലെ നേരിട്ട് ഹാജരാകാന്‍ ഇ ഡി പുതിയ നോട്ടിസ് നല്‍കുകയായിരുന്നു.
സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫീസ് (എസ്എഫ്‌ഐഒ) നടത്തിയ അന്വേഷണത്തില്‍ സിഎംആര്‍എല്‍ കഴിഞ്ഞ 15 വര്‍ഷത്തിനിടെ 182 കോടി രൂപയുടെ വ്യാജ ചെലവുകള്‍ കാണിച്ചതായി കണ്ടെത്തിയിരുന്നു.
സിഎംആര്‍എല്‍, എക്‌സാലോജിക്ക് ഇടപാടിലെ നിര്‍ണായക രേഖകള്‍ ഇ ഡിക്ക് നല്‍കണമെന്ന് കൊച്ചിയിലെ പ്രത്യേക പിഎംഎല്‍എ കോടതി കഴിഞ്ഞ ദിവസം ഉത്തരവിട്ടിരുന്നു. 54 വാല്യങ്ങളിലായി സൂക്ഷിച്ചിരിക്കുന്ന 134 നിര്‍ണായ രേഖകള്‍ ഇ ഡിക്ക് ഇന്ന് ലഭിക്കുമെന്നാണ് പ്രതീക്ഷ. എക്സാലോജിക്കുമായി ഉണ്ടാക്കിയ കരാറുകള്‍, ബാങ്ക് സ്റ്റേറ്റ്മെന്റുകള്‍, വീണയുടെ ഐടി റിട്ടേണ്‍സ് എന്നിവയെല്ലാം ഈ പട്ടികയില്‍ ഉള്‍പ്പെടും. ഇതിന്റെയെല്ലാം അടിസ്ഥാനത്തിലായിരിക്കും വീണയെ വീണ്ടും ചോദ്യം ചെയ്യുക. തിരുവനന്തപുരത്തുണ്ടായ സംഭവങ്ങളുടെ പശ്ചാത്തലത്തില്‍ വന്‍ സുരക്ഷയായിരുന്നു ഇ ഡി ഓഫീസില്‍ കേന്ദ്രസേനയും പുറത്ത് പോലീസും ഒരുക്കിയിരുന്നത്.
