ഫിഫ ലോകകപ്പ് ഫുട്ബോള് 2026ല് ഗംഭീര തുടക്കമിട്ടുകളയാം എന്ന് കരുതി വന്ന വമ്പന്മാര്ക്ക് മുന്നില് നെഞ്ചും വിരിച്ച് നിന്നത് ഗോള് കീപ്പര്മാര്. സ്പാനിഷ് ടീമിന്റെ ഉറപ്പായ വിജയം നിഷേധിച്ച കേപ് വെര്ദെ ഗോളി വൊസീഞ്ഞ ആണ് കൂട്ടത്തില് മുന്നില്. 40 വയസിലെത്തിയ വൊസീഞ്ഞ പതിനേഴുകാരനെക്കാള് ചുറുചുറുക്ക് തനിക്കുണ്ടെന്ന ഭാവത്തിലാണ് പോസ്റ്റിന് മുന്നില് പ്രകടനം തീര്ത്തത്. ഇരു ടീമുകളുടെയും പ്രകടന നില കണക്കിലെടുത്ത് മൂന്ന് ഗോള് മാര്ജിനിലുള്ള വിജയം ഉറപ്പായും പ്രതീക്ഷിച്ചു. പക്ഷെ മത്സരം തീര്ന്നപ്പോള് മുന് ലോക ചാമ്പ്യന്മാര്ക്ക് അക്കൗണ്ട് തുറക്കാന് പോലും കഴിയാതെ കരയ്ക്ക് കറയേണ്ടിവന്നു. സ്പാനിഷ് താരങ്ങളുടെ ബൂട്ടില് നിന്നും വെടിയുണ്ട കണക്കെ പാഞ്ഞെത്തിയ ഏഴ് കിക്കുകളാണ് വൊസീഞ്ഞ തടുത്തിട്ടത്.
ഇന്നലെ വെളുപ്പിന് നടന്ന മത്സരത്തില് സൗദി അറേബ്യയ്ക്കെതിരെ ഉറുഗ്വേയും ജയം അര്ഹിക്കുന്ന പ്രകടനം കാഴ്ച്ചവച്ചു. എതിര് ടീം ഗോള് കീപ്പര് മുഹമ്മദ് അല്-ഒവെയ്സ് കാഴ്ച്ചവച്ച മികവാണ് അവിടെയും പ്രശ്നമായത്. അര്ജന്റൈന് പരിശീലകന് മാര്സെലോ ബിയേല്സയ്ക്ക് കീഴില് മനോഹര നീക്കങ്ങളുമായി ഉറുഗ്വേ കളം പി
ടിച്ചെങ്കിലും കരുത്തന് ഗോളി കാവല് നിന്ന പോസ്റ്റില് ഒന്നും ചെയ്യാന് സാധിക്കുന്നുണ്ടായില്ല.
മത്സരത്തില് ഉറുഗ്വെ 27 മുന്നേറ്റങ്ങള് നടത്തി, പത്ത് ഓണ് ടാര്ഗറ്റ് ഷോട്ടുകള് ഉതിര്ത്തു. ഒരെണ്ണം ഒരുവിധത്തില് വലയില് കയറുകയായിരുന്നു. 80-ാം മിനിറ്റിലുണ്ടായ മുന്നേറ്റത്തില് മത്തിയാസ് ഒലിവേര തോടുത്ത ഷോട്ട് സൗദി ഗോളി അല്-ഒവൈസ് തടുത്തിട്ടു. റീബൗണ്ടിലേക്ക് പാഞ്ഞടുത്ത മാക്സിമിലിയാനോ അരോഹോയുടെ ഷോട്ടിന് മുന്നില് ഒരു ഗോളിക്കും ഒന്നും ചെയ്യാന് സാധിക്കില്ലായിരുന്നു. എട്ടു ഓണ് ടാര്ഗറ്റ് ഷോട്ടുകള് സൗദി ഗോളി തടുത്തു.
ഈജിപ്ത്-ബെല്ജിയം പോരാട്ടത്തില് രണ്ട് ടീമുകളും ഒപ്പത്തിനൊപ്പം നില്ക്കുന്ന പ്രകടനം കാഴ്ച്ചവച്ചപ്പോള് ഗോള് കീപ്പര്മാരും ഒന്നിനൊന്ന് മെച്ചമായി നിന്നു. ബെല്ജിയത്തിന്റെ കാവലാള് വിശേഷണങ്ങള് ആവശ്യമില്ലാത്ത തിബോ കുര്ത്വായായിരുന്നു. ബെല്ജിയം ഈജിപ്തിന് മുന്നില് തോല്ക്കാതെ രക്ഷപ്പെട്ടതില് കുര്ത്വായുടെ സേവുകള്ക്ക് വലിയ പങ്കുണ്ട്. മറുവശത്തേക്ക് ബെല്ജിയം നാല് ഓണ് ടാര്ഗറ്റുകളുമായി കരുത്തറിയിച്ചെങ്കിലും ഗോളി മൊസ്തഫ ഷൊബീര് കീഴടങ്ങിയില്ല. ഒരു ഗോള് വഴങ്ങിയത് സ്വന്തം ടീമിലെ പ്രതിരോധ താരത്തിന്റെ കാലില് തട്ടിയെത്തിയ പന്തിന് മുന്നിലാണ്.
