കൊച്ചി: ബാലാവകാശ സംരക്ഷണത്തിനായി കേരളത്തില്‍ കാല്‍നൂറ്റാണ്ടിലേറെയായി പ്രവര്‍ത്തിക്കുന്ന സൗരക്ഷിക ഏര്‍പ്പെടുത്തിയ 2026-ലെ പഞ്ചമി പുരസ്‌കാരം പ്രശസ്ത സാമൂഹ്യപ്രവര്‍ത്തകന്‍ കെ.എസ്. രാജേന്ദ്രപ്രസാദിന് സമര്‍പ്പിച്ചു. പഞ്ചമി ദിനാചാരണത്തോടനുബന്ധിച്ച് ഇടപ്പള്ളി ചങ്ങമ്പുഴ പാര്‍ക്കില്‍ നടന്ന പ്രൗഢഗംഭീരമായ ചടങ്ങില്‍ കേരള ഹൈക്കോടതി റിട്ട. ജസ്റ്റിസ് വി.ജി. അരുണ്‍ പുരസ്‌കാര സമര്‍പ്പണം നിര്‍വ്വഹിച്ചു.
അട്ടപ്പാടി കേന്ദ്രീകരിച്ച് വര്‍ഷങ്ങളായി ആദിവാസി കുട്ടികളുടെ ക്ഷേമത്തിനായി വിവിധ ഇടപെടലുകള്‍ നടത്തുകയും ബാലാവകാശ സംരക്ഷണത്തിനായി സ്തുത്യര്‍ഹമായ സേവനം കാഴ്ചവെക്കുകയും ചെയ്തതിനാണ് രാജേന്ദ്രപ്രസാദിനെ ഈ വര്‍ഷത്തെ പുരസ്‌കാരത്തിന് തിരഞ്ഞെടുത്തത്.
സൗരക്ഷിക സംസ്ഥാന പ്രസിഡന്റ് അഡ്വ. എം. ശശിശങ്കറിന്റെ അധ്യക്ഷതയില്‍ കൂടിയ യോഗത്തില്‍ സംസ്ഥാന സെക്രട്ടറി അഡ്വ. എസ്. പ്രേംകുമാര്‍ സ്വാഗതം ആശംസിച്ചു. രാഷ്‌ട്രീയ-സാമൂഹ്യ നിരീക്ഷകന്‍ അഡ്വ. എ. ജയശങ്കര്‍ മുഖ്യാതിഥിയായി. ബാലഗോകുലം സംസ്ഥാന പ്രസിഡന്റ് ആര്‍. പ്രസന്നകുമാര്‍, കെപിഎംഎസ് സംസ്ഥാന കമ്മിറ്റി അംഗം എ. രവി ആശംസകള്‍ നേര്‍ന്നു. രാജേന്ദ്രപ്രസാദ് മറുപടി പ്രസംഗം നടത്തി. സൗരക്ഷിക എറണാകുളം ജില്ലാ പ്രസിഡന്റ് വിദ്യാധരന്‍ പി. മേനോന്‍ നന്ദി രേഖപ്പെടുത്തി.
