ജെവാര്: നോയിഡ അന്താരാഷ്ട്ര വിമാനത്താവളത്തിലെ വാണിജ്യ സര്വീസുകള്ക്ക് തുടക്കമായി. ഇന്നലെ രാവിലെ 8.05-ന് ലഖ്നൗവിലെ ചൗധരി ചരണ് സിങ് അന്താരാഷ്ട്ര വിമാനത്താവളത്തില് നിന്നുള്ള ആദ്യ വിമാനം ഇവിടെ വിജയകരമായി ലാന്ഡ് ചെയ്തതായി അധികൃതര് അറിയിച്ചു. ഇതിന്റെ മടക്ക സര്വീസായ ഇന്ഡിഗോ ഫ്ളൈറ്റ് (6ഇ2279) വൈകുന്നേരം 6.55-ന് നോയിഡയില് നിന്ന് പുറപ്പെട്ട് രാത്രി എട്ട് മണിയോടെ ലഖ്നൗവില് എത്തി.
നോയിഡ അന്താരാഷ്ട്ര വിമാനത്താവളത്തില് ഇറങ്ങിയ ആദ്യ വിമാനത്തിനുള്ളില് നിന്നുള്ള ദൃശ്യങ്ങളും പുറത്തുവന്നു. വിമാനം റണ്വേ തൊട്ട നിമിഷം യാത്രക്കാര് ആവേശത്തോടെ കൈയടിക്കുന്ന ദൃശ്യങ്ങളാണ് ഇതില്. നോയിഡ- ലഖ്നൗ യാത്രക്കാര് നിലവില് ദല്ഹിയിലെ ഇന്ദിരാഗാന്ധി വിമാനത്താവളവും റോഡ് മാര്ഗവുമാണ് ആശ്രയിക്കുന്നത്. പുതിയ വിമാനത്താവളം വന്നതോടെ ഇവര്ക്കത് വലിയ ആശ്വാസമാകും.
വിമാനത്താവളത്തില് നിന്ന് പുറപ്പെടുന്ന ആദ്യ യാത്രാ വിമാനത്തില് പദ്ധതിക്കായി ഭൂമി വിട്ടുനല്കിയ 172 കര്ഷകരും യാത്ര ചെയ്തു. ജെവാര് എംഎല്എ ധീരേന്ദ്ര സിങ്ങിനൊപ്പം ലഖ്നൗവിലെത്തി ഇവര് മുഖ്യമന്ത്രി യോഗി ആദിത്യനാഥിനെ കണ്ട് നന്ദി അറിയിക്കും. വിമാനത്താവള നിര്മാണത്തിന് കര്ഷകര് നല്കിയ സംഭാവനകളെ ആദരിക്കുന്നതിനായാണ് അവര്ക്കായി യാത്ര സംഘടിപ്പിച്ചത്.
നോയിഡ വിമാനത്താവളത്തില് നിന്ന് തുടക്കത്തില് ലഖ്നൗ, ബെംഗളൂരു എന്നീ നഗരങ്ങളിലേക്കാണ് സര്വീസുകള് നടത്തുക. ആദ്യ വര്ഷത്തില് 50 ലക്ഷം യാത്രക്കാരെയാണ് ലക്ഷ്യമിടുന്നത്. ഭാവിയില് ഇത് ഏഴ് കോടിയായി ഉയര്ത്തുമെന്നും വൈസ് ചെയര്മാന് ക്രിസ്റ്റോഫ് ഷ്നെല്മാന് അറിയിച്ചു.
