കൊച്ചി: ആര്‍ എസ് എസ് സംഘടിപ്പിച്ച പരിപാടിയില്‍ സംസ്ഥാനത്തെ മൂന്ന് വൈസ് ചാന്‍സലര്‍മാര്‍ പങ്കെടുത്തതില്‍ മുഖ്യമന്ത്രി വി ഡി സതീശന്റെ താക്കീതിന് പിന്നാലെ കടുപ്പിച്ച് ഉന്നത വിദ്യാഭ്യാസ മന്ത്രി റോജി എം ജോണും. സര്‍സംഘചാലക് മോഹന്‍ ഭാഗവത്തിന്റെ പ്രഭാഷണ സഭയില്‍ വി സി മാര്‍ പങ്കെടുത്തത് അത്യന്തം ഗുരുതരമായ പ്രശ്‌നമാണെന്നാണ് മന്ത്രിയുടെ നിലപാട്.
അക്കാദമിക സ്ഥാപനങ്ങളുടെ തലപ്പത്തിരിക്കുന്നവര്‍ ഇത്തരം വേദികള്‍ പങ്കിടുന്നത് തെറ്റായ സന്ദേശമാണ് നല്‍കുന്നത്. വൈസ് ചാന്‍സലര്‍ പദവി സര്‍വകലാശാലകളുടെ നിഷ്പക്ഷതയുടെ പ്രതീകമാണ്.പ്രത്യയശാസ്ത്ര ധ്രുവീകരണങ്ങള്‍ക്ക് ഈ പദവികള്‍ വഴിമാറുന്നത് അനുവദിക്കാനാവില്ലെന്ന് മന്ത്രി പറഞ്ഞു.
ചെയ്തത് തെറ്റായിപ്പോയി എന്ന് പൊതുസമൂഹത്തോട് ഏറ്റുപറയാനുള്ള മാന്യത വി സിമാര്‍ കാട്ടണം! ഇത് ആവര്‍ത്തിക്കാതിരിക്കാനുള്ള സാമൂഹിക ബോധവും വി സിമാരില്‍ നിന്ന് ഉണ്ടാകണമെന്നും മന്ത്രി ഫേസ്ബുക്ക് കുറിപ്പില്‍ ആവശ്യപ്പെട്ടു.
