കൊച്ചി: സംസ്ഥാനത്ത് ആദ്യമായി കെഎസ്ആർടിസി സ്ത്രീകൾക്ക് സൗജന്യ ബസ് യാത്രയ്ക്കു ഡബിൾ ബെൽ മുഴങ്ങുന്പോൾ സൗജന്യ യാത്രാ പദ്ധതി തങ്ങളുടെ വരുമാനം ഇല്ലാതാക്കുന്നു എന്ന പരാതിയുമായി വേറിട്ടൊരു സമരത്തിനൊരുങ്ങുകയാണ് ഒരു സ്വകാര്യ ബസ് ഉടമ. മാഞ്ഞാലി-ആലുവ റൂട്ടിലോടുന്ന ‘ലിറ്റിൽ ഫ്ലവർ’ എന്ന ബസിലാണ് നാളെ വ്യത്യസ്തമായ ഈ പ്രതിഷേധം അരങ്ങേറുന്നത്. ബസ് ഉടമയായ വട്ടപ്പറമ്പ് സ്വദേശി ബി.ഒ. ഡേവിസ് സംഘടിപ്പിക്കുന്ന ഈ സമരത്തിൽ, നാളെ പുരുഷന്മാർക്ക് ഈ ബസിൽ ദിവസം മുഴുവൻ തികച്ചും സൗജന്യമായി യാത്ര ചെയ്യാം.
രാവിലെ 6.30 മുതൽ രാത്രി 8 വരെയുള്ള 7 ട്രിപ്പുകളിലും ലിറ്റിൽ ഫ്ലവർ ബസിൽ പുരുഷന്മാർക്ക് ടിക്കറ്റ് എടുക്കേണ്ടതില്ല. ഇതോടൊപ്പം പ്രതിസന്ധിഘട്ടത്തിലും സ്വകാര്യ ബസുകളെ കൈവിടാത്ത വനിതാ യാത്രക്കാർക്ക് മധുരം നൽകി സ്വീകരിക്കാനും ഡേവിസ് തീരുമാനിച്ചിട്ടുണ്ട്.
കഴിഞ്ഞ 25 വർഷത്തിലേറെയായി സർവീസ് നടത്തുന്ന തന്റെ ബസ് റൂട്ടിന്റെ ഭൂരിഭാഗവും കെഎസ്ആർടിസി സർവീസുകൾക്കൊപ്പമാണ് ഓടുന്നതെന്ന് ഡേവിസ് പറയുന്നു. കെഎസ്ആർടിസിയുടെ പുതിയ സൗജന്യ പദ്ധതി കാരണം സ്ഥിരം യാത്രക്കാരായ സ്ത്രീകളെ വലിയ തോതിൽ നഷ്ടപ്പെടുന്നുവെന്നും, ഇത് സ്വകാര്യ ബസ് മേഖലയുടെ നട്ടെല്ലൊടിക്കുന്നുവെന്നും ചൂണ്ടിക്കാണിച്ചാണ് ഈ വേറിട്ട പ്രതിഷേധം.
