ന്യൂദല്ഹി: ഭാരതത്തിലെ ഏറ്റവും വലിയ ശാസ്ത്ര സംഘടനമായ വിജ്ഞാന് ഭാരതിയുടെ ഏഴാം ദേശീയ സമ്മേളനം 13നും 14നും വാരാണസിയില്.
ബനാറസ് ഹിന്ദു സര്വകലാശാലയില് നടക്കുന്ന സമ്മേളനത്തില് ശാസ്ത്രജ്ഞര്, ഗവേഷകര്, അക്കാദമിക വിദഗ്ധര്, നയരൂപകര്ത്താക്കള് എന്നിവരുള്പ്പെടെ 1200 പ്രതിനിധികള് പങ്കെടുക്കും. ആരോഗ്യം, വികസിത ഭാരതത്തിന് നെറ്റ് സീറോ, കൃത്രിമബുദ്ധിയും ധാര്മികതയും ഉള്പ്പെടെയുള്ള വിഷയങ്ങളിലെ ചര്ച്ചകളില് സമ്മേളനം ശ്രദ്ധ കേന്ദ്രീകരിക്കും. 13ന് രാവിലെ 10ന് നടക്കുന്ന ചടങ്ങില് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് സമ്മേളനം ഉദ്ഘാടനം ചെയ്യും. ആയുഷ് മന്ത്രാലയം സെക്രട്ടറി വൈദ്യ രാജേഷ് കൊട്ടെച്ച വിശിഷ്ടാതിഥിയാകും. വിജ്ഞാന്ഭാരതി ദേശീയ പ്രസിഡന്റ് ഡോ. ശേഖര് മാണ്ഡെ അധ്യക്ഷനാകും.
നാഷണല് മെഡിക്കല് കമ്മിഷന് ചെയര്പേഴ്സണ് ഡോ. ബി.എന്. ഗംഗാധര്, മധ്യപ്രദേശ് സര്ക്കാരിന്റെ ഊര്ജ, നവ, പുനരുപയോഗ ഊര്ജ വകുപ്പ് പ്രിന്സിപ്പല് സെക്രട്ടറി മനു
ശ്രീവാസ്തവ, ശാസ്ത്ര സാങ്കേതിക വകുപ്പ് മുന് സെക്രട്ടറിയും ഇന്ത്യന് നാഷണല് സയന്സ് അക്കാദമിയുടെ പ്രസിഡന്റുമായ പ്രൊഫ. അശുതോഷ് ശര്മ്മ എന്നിവര് വിവിധ ചര്ച്ചകള് നയിക്കും.
ആര്എസ്എസ് സഹസര്കാര്യവാഹ് ഡോ. കൃഷ്ണഗോപാല്, അഖില ഭാരതീയ പ്രചാര് പ്രമുഖ് സുനില് ആംബേക്കര്, പ്രമുഖ സാമ്പത്തിക ശാസ്ത്രജ്ഞനും നിതി ആയോഗ് മുന് വൈസ് ചെയര്മാനുമായ ഡോ. രാജീവ് കുമാര് എന്നിവര് പ്രഭാഷണം നടത്തും. 14ന് ചേരുന്ന സമാപന സമ്മേളനത്തില് കേന്ദ്രപ്രതിരോധ സഹമന്ത്രി സഞ്ജയ് സേത്ത് മുഖ്യാതിഥിയാകും. നിതി ആയോഗ് അംഗങ്ങളായ പ്രൊഫ. അഭയ് കരണ്ടികര്, പ്രൊഫ. ഗോബര്ധന് ദാസ് എന്നിര് വിശിഷ്ടാതിഥികളായി പങ്കെടുക്കും.
