ന്യൂയോര്ക്ക് സിറ്റി: നിലവിലെ ചാമ്പ്യന്മാരായ അര്ജന്റീന ഗ്രൂപ്പ് ഘട്ടത്തില് ഇറങ്ങുമ്പോള് സമീപകാല ലോകകപ്പുകളുടെ കണക്കുകളുടെ അടിസ്ഥാനത്തില് പേടിക്കണം. 2006, 2010, 2014 ലോകകപ്പുകളില് ജേതാക്കളായ ടീം തൊട്ടടുത്ത ലോകകപ്പിന്റെ പ്രാഥമിക ഘട്ടത്തില്ത്തന്നെ പുറത്തായി എന്നതാണ് അര്ജന്റീനയ്ക്ക് ആശങ്കയാകുന്നത്. 2006ല് ജേതാക്കളായ ഇറ്റലി 2010ല് പരാഗ്വെ, സ്ലോവാക്യ, ന്യൂസിലാന്ഡ് എന്നിവരടങ്ങിയ ഗ്രൂപ്പില്നിന്ന് ഒരു മത്സരവും ജയിക്കാതെ പുറത്തായി. 2010ല് കിരീടമുയര്ത്തിയ സ്പെയിന് 2014ലെ ബ്രസീല് ലോകകപ്പില് നെതര്ലന്ഡ്സ,് ചിലി, ഓസ്ട്രേലിയ എന്നിവരടങ്ങിയ ഗ്രൂപ്പ് ബിയില്നിന്ന് പുറത്തായി. 2014ലെ ലോകജേതാക്കളായ ജര്മ്മനി 2018ലെ റഷ്യന് ലോകകപ്പില് ഗ്രൂപ്പ് എഫില് നിന്ന് ആദ്യ റൗണ്ടില് പുറത്തായി. മെക്സിക്കോയൊടും ദക്ഷിണ കൊറിയയോടും പരാജയപ്പെട്ട അവര് സ്വീഡനെ തോല്പ്പിച്ചെങ്കിലും ഗ്രൂപ്പില് നാലാം സ്ഥാനത്താണ് എത്തിയത്. 1998ലെ ചാമ്പ്യന്മാരായ ഫ്രാന്സ് 2002ല് ആദ്യ റൗണ്ടില്ത്തന്നെ പുറത്തായിട്ടുണ്ട്. ഇതിനിടയില് ബ്രസീല് മാത്രമാണ് ചാമ്പ്യന്മാരായിട്ട് തൊട്ടടുത്ത ലോകകപ്പില് ആദ്യ റൗണ്ടില് പുറത്താകാത്ത ടീം. 2002ലായിരുന്നു ബ്രസീല് ചാമ്പ്യന്മാരായത്.
