ന്യൂയോര്ക്ക്: നാല് വര്ഷത്തിലൊരിക്കല് ലോകം ഒരേയൊരു പന്തിന്റെ പിന്നാലെ സഞ്ചരിക്കുന്ന അത്ഭുതകാലം വീണ്ടും വന്നെത്തിയിരിക്കുന്നു. യുദ്ധങ്ങളും രാഷ്ട്രീയ ഭിന്നതകളും ഭാഷകളും സംസ്കാരങ്ങളും അതിരുകളും ഒരു നിമിഷത്തേക്കെങ്കിലും മറന്ന് മനുഷ്യരാശി ഒരേ വികാരത്തില് ലയിക്കുന്ന അപൂര്വ വേദി ഒരുങ്ങുകയാണ്, ഫിഫ ലോകകപ്പ്. 1930-ല് ഉറുഗ്വേയില് ആരംഭിച്ച ഈ മഹായാത്ര ഇന്ന് നൂറ്റാണ്ടിനോട് അടുക്കുകയാണ്. ആ യാത്രയുടെ 23-ാമത് അദ്ധ്യായമായ 2026 ഫിഫ ലോകകപ്പിന് നാളെ മെക്സിക്കോസിറ്റി സ്റ്റേഡിയത്തില് തുടക്കം. ചരിത്രത്തിലെ ഏറ്റവും വലിയ ലോകകപ്പെന്ന വിശേഷണത്തോടെയാണ് അരങ്ങേറുന്നത്.
ആദ്യമായി 48 രാജ്യങ്ങള് പങ്കെടുക്കുന്ന ലോകകപ്പാണിത്. 104 മത്സരങ്ങളിലായി ഒരു മാസത്തിലേറെ ഫുട്ബോള് ഉത്സവത്തിന് ആതിഥേയത്വം വഹിക്കുന്നത് മൂന്ന് രാജ്യങ്ങള്, അമേരിക്ക, മെക്സിക്കോ, കാനഡ. 16 നഗരങ്ങള് വേദിയാകുന്ന ഈ ടൂര്ണമെന്റ്, ലോകകപ്പ് ചരിത്രത്തിലെ ഏറ്റവും വിപുലമായ ആഘോഷമായി മാറുകയാണ്. ഇതുവരെ ഒരു ലോകകപ്പിലും കാണാത്തത്ര രാജ്യങ്ങളും ആരാധകരും സംസ്കാരങ്ങളും ഒരേ ആഘോഷത്തില് പങ്കുചേരുന്ന അപൂര്വ നിമിഷം കൂടിയാണിത്.
ലോകകപ്പിന്റെ മഹത്വം കണക്കുകളിലോ റിക്കാര്ഡുകളിലോ മാത്രം ഒതുങ്ങുന്നില്ല. പച്ചപ്പുല്ലില് വിരിയുന്ന സ്വപ്നങ്ങളാണ് അതിന്റെ ആത്മാവ്. ഒരു ചെറിയ രാജ്യത്തിന്റെ അപ്രതീക്ഷിത മുന്നേറ്റം, ഒരു യുവതാരത്തിന്റെ ഉദയം, ഒരു ഇതിഹാസത്തിന്റെ അവസാന നൃത്തം, ഒരു ഗോളിന് ശേഷം പൊട്ടിയൊഴുകുന്ന കോടിക്കണക്കിന് മനുഷ്യരുടെ ആനന്ദലാവ… ഇവയൊക്കെയാണ് ലോകകപ്പിനെ വെറും കായികമത്സരത്തില് നിന്ന് മനുഷ്യവികാരങ്ങളുടെ മഹാകാവ്യമാക്കി മാറ്റുന്നത്.
നിലവിലെ ചാമ്പ്യന്മാരായ അര്ജന്റീന കിരീടം നിലനിര്ത്താനിറങ്ങുമ്പോള്, ബ്രസീല് ആറാം ലോകകിരീടത്തിനായുള്ള സ്വപ്നം പിന്തുടരുന്നു. ഫ്രാന്സ്, ഇംഗ്ലണ്ട്, സ്പെയിന്, ജര്മനി തുടങ്ങിയ വമ്പന്മാര് കിരീടപ്പോരാട്ടത്തിന് സജ്ജമാകുമ്പോള്, ആദ്യമായി ലോകകപ്പ് വേദിയിലെത്തുന്ന ഉസ്ബക്കിസ്ഥാന്, കുറസാവോ, ജോര്ദാന്, കേപ് ഡെ വെര്ദെ എന്നീ രാജ്യങ്ങള് ചരിത്രം രചിക്കാനുള്ള സ്വപ്നവുമായി എത്തുന്നു.
ഭൂമിയുടെ ഹൃദയമിടിപ്പിന് ഒരേ താളം
നാല് വര്ഷത്തിലൊരിക്കല് ഭൂമിയുടെ ഹൃദയമിടിപ്പുകള് ഒരേ താളത്തിലാകുന്ന ഒരു കാലമുണ്ട്. അതിര്ത്തികളെയും ഭാഷകളെയും സംസ്കാരങ്ങളെയും മറികടന്ന് കോടിക്കണക്കിന് മനുഷ്യരുടെ സ്വപ്നങ്ങള് ഒരു പന്തിനൊപ്പം ഉരുണ്ടുപോകുന്ന ദിനങ്ങള്. സ്റ്റേഡിയങ്ങളിലെ പച്ചപ്പുല്ലുകള് വെറും കളിക്കളങ്ങളല്ല; അവിടെ ചരിത്രം എഴുതപ്പെടുന്നു, ഇതിഹാസങ്ങള് ജനിക്കുന്നു, കണ്ണീരും ചിരിയും ഒരേ നിമിഷത്തില് ഇടകലരുന്നു.
പ്രതീക്ഷകളുടെ പതാകകള് ഉയരുകയാണ്. നഗരങ്ങളുടെ രാത്രികള് ആഘോഷങ്ങളുടെ വെളിച്ചത്തില് മുങ്ങുന്നു. ഓരോ രാജ്യത്തിന്റെയും ഹൃദയത്തില് ഒരു സ്വപ്നം മുളയ്ക്കുന്നു, ലോകത്തിന്റെ നെറുകയിലെത്താനുള്ള സ്വപ്നം. ഒരു ഗോളിന്റെ അകലത്തില് മഹത്വവും, ഒരു പിഴവിന്റെ അകലത്തില് നിരാശയും കാത്തു നില്ക്കുന്ന ഫുട്ബോളിന്റെ മഹാരംഗത്തേക്ക് ലോകം വീണ്ടും യാത്രതിരിക്കുകയാണ്.
ഇത് ഒരു ടൂര്ണമെന്റ് മാത്രമല്ല, മനുഷ്യവികാരങ്ങളുടെ ഏറ്റവും മനോഹരമായ ഉത്സവമാണ്. വീരന്മാര് ജനിക്കുകയും ഇതിഹാസങ്ങള് അമരത്വം നേടുകയും ചെയ്യുന്ന വേദി. ആ മഹോത്സവത്തിന്റെ തിരശ്ശീല ഉയരുമ്പോള്, ഫുട്ബോള് എന്ന മായാജാലത്തിന്റെ പുതിയ അദ്ധ്യായത്തിലേക്ക് നമുക്കും പ്രവേശിക്കാം.
ജന്മഭൂമി ഓണ്ലൈന്