ഏതൊരു ജനാധിപത്യ രാജ്യത്തിന്റെയും അടിസ്ഥാനം അതിന്റെ സുരക്ഷയും സാമ്പത്തിക ഭദ്രതയും സ്വയംഭരണാധികാരവുമാണ്. ലോകവേദിയില് ഭാരതം ആഗോള ശക്തിയായി വളര്ന്നുവരുമ്പോള്, രാജ്യത്തിന്റെ വികസനത്തെയും സാമൂഹിക ഐക്യത്തെയും തകര്ക്കാന് ബാഹ്യശക്തികള് നടത്തുന്ന ശ്രമങ്ങളെ ചെറുക്കേണ്ടത് ദേശീയ താല്പര്യത്തിന് അത്യന്താപേക്ഷിതമാണ്. വിദേശത്തുനിന്ന് ഒഴുകിയെത്തുന്ന ധനം ജീവകാരുണ്യത്തിന്റെ മറവില് രാജ്യത്തിന്റെ കെട്ടുറപ്പിനെയും ഭരണഘടനാ മൂല്യങ്ങളെയും തകര്ക്കാന് ഉപയോഗിക്കുന്നില്ലെന്ന് ഉറപ്പാക്കണം. ഈ പശ്ചാത്തലത്തിലാണ് രാജ്യസ്നേഹത്തിലും സുതാര്യതയിലും ഊന്നിക്കൊണ്ട് ‘എഫ്സിആര്എ ഭേദഗതി ബില് 2026’ എന്ന ചരിത്രപരമായ നിയമനിര്മ്മാണം ഭാരതം മുന്നോട്ടുവെക്കുന്നത്.
ഭാരതത്തിലേക്ക് എത്തുന്ന വിദേശ ഫണ്ടുകള് സുതാര്യവും ഉത്തരവാദിത്തമുള്ളതും രാജ്യത്തിന്റെ നിയമങ്ങള്ക്ക് അനുസൃതവുമാണെന്ന് ഉറപ്പാക്കുക എന്ന ലളിതമായ തത്ത്വത്തെ അടിസ്ഥാനമാക്കിയാണ് എഫ്സിആര്എ ഭേദഗതി ബില്, 2026 വരുന്നത്. ഏതൊരു പരമാധികാര ജനാധിപത്യ രാജ്യത്തെയും പോലെ, സ്വന്തം വികസന മുന്ഗണനകള്, സാമൂഹിക ഐക്യം, ദേശീയ സുരക്ഷ എന്നിവ സംരക്ഷിക്കുന്നതിന് വിദേശ സ്വാധീനം നിയന്ത്രിക്കാന് ഭാരതത്തിന് അവകാശമുണ്ടെന്ന കര്ത്തവ്യബോധമാണ് ഈ നിയമനിര്മ്മാണത്തിന് ആധാരം.
വിദേശ ഫണ്ടുകളും അവയുടെ ദുരുപയോഗവും
2019-നും 2022-നും ഇടയില് 13,500-ലധികം സംഘടനകള്ക്കായി 55,741 കോടി രൂപയാണ് വിദേശ സംഭാവനയായി ഭാരതത്തിലേക്ക് എത്തിയത്. എന്നാല്, വികസനം തടസ്സപ്പെടുത്തുന്നതിനും ഭീകരപ്രവര്ത്തനങ്ങള്ക്ക് പിന്തുണ നല്കുന്നതിനും ദുര്ബല വിഭാഗങ്ങളെ ലക്ഷ്യമിട്ടുള്ള സംഘടിത മതപരിവര്ത്തനങ്ങള്ക്കും ഈ വിദേശ ഫണ്ടുകള് ഉപയോഗിക്കുന്നതായി ഒന്നിലധികം അന്വേഷണങ്ങളില് കണ്ടെത്തിയിട്ടുണ്ട്.
ഗുരുതരമായ ഈ സാഹചര്യത്തിലാണ് ഉത്തരവാദിത്തവും നിയമപാലനവും കൂടുതല് ശക്തമാക്കാന് ലക്ഷ്യമിട്ട് പുതിയ ഭേദഗതി ബില് അവതരിപ്പിച്ചത്.
ദേശീയ സുരക്ഷയെയും വികസനത്തെയും ബാധിക്കുന്ന ഭീഷണികള്
വിദേശ ഫണ്ട് സ്വീകരിച്ച് പ്രവര്ത്തിക്കുന്ന വ്യത്യസ്ത പ്രത്യയശാസ്ത്ര ശൃംഖലകളെ രഹസ്യാന്വേഷണ ഏജന്സികള് തിരിച്ചറിഞ്ഞിട്ടുണ്ട്:
ഈ സംഘടനകളുടെ ലക്ഷ്യങ്ങള് വ്യത്യസ്തമായിരിക്കാമെങ്കിലും, ഇവരുടെ പ്രവര്ത്തനങ്ങള് രാജ്യത്തിന്റെ വികസനം തടസ്സപ്പെടുത്തുന്നതിനും സാമൂഹിക ഐക്യം തകര്ക്കുന്നതിനും ഭരണഘടനാ സ്ഥാപനങ്ങളുടെ സ്ഥിരതയെ ബലഹീനമാക്കുന്നതിനും കാരണമാകുന്നു. പ്രധാന ഇന്ഫ്രാസ്ട്രക്ചര്, ഊര്ജ്ജ പദ്ധതികള് എന്നിവയെ എതിര്ക്കുന്നതിനായി പരിസ്ഥിതി പ്രവര്ത്തനങ്ങളെ ചില സംഘടനകള് ദുരുപയോഗം ചെയ്തതായും കണ്ടെത്തലുകളുണ്ട്.
പുതിയ ഭേദഗതി ബില്ലിലെ പ്രധാന വ്യവസ്ഥകള്
ആസ്തികള് കസ്റ്റഡിയിലെടുക്കല്: ഒരു സംഘടനയുടെ എഫ്സിആര്എ രജിസ്ട്രേഷന് റദ്ദാക്കുകയോ, അടിയറവ് വെയ്ക്കുകയോ, കാലാവധി അവസാനിക്കുകയോ ചെയ്താല് വിദേശ സഹായത്തോടെ നേടിയ ആസ്തികള് താല്ക്കാലികമായി കസ്റ്റഡിയിലെടുക്കാന് ഒരു നിയുക്ത അതോറിറ്റിയെ ബില് ചുമതലപ്പെടുത്തുന്നു. അധികാരികള് നടപടിയെടുക്കുന്നതിന് മുമ്പ് ആസ്തികള് വിറ്റഴിക്കാനോ കൈമാറ്റം ചെയ്യാനോ ഉപയോഗിച്ചിരുന്ന നിയമപരമായ വിടവ് ഇത് അടയ്ക്കുന്നു.
വ്യക്തിഗത ഉത്തരവാദിത്തം: കാലാവധി കഴിഞ്ഞ രജിസ്ട്രേഷനുകളെ റദ്ദാക്കപ്പെട്ടവയായി കണക്കാക്കുന്നതിലൂടെ അനിശ്ചിതകാലത്തേക്ക് ആസ്തികള് കൈവശം വെയ്ക്കുന്നത് തടയുന്നു. കൂടാതെ, വിദേശ ഫണ്ടുകളുടെ ഉപയോഗത്തില് പ്രധാന ഭാരവാഹികളെ വ്യക്തിപരമായി ഉത്തരവാദികളാക്കുന്നു.
മതപരിവര്ത്തനത്തിനുള്ള നിരോധനം: മതപരിവര്ത്തനത്തിനായി വിദേശ ഫണ്ട് ഉപയോഗിക്കുന്നത് ബില് പൂര്ണ്ണമായി നിരോധിക്കുന്നു. അതേസമയം, മതാധിഷ്ഠിത വിദ്യാഭ്യാസ പഠനം, വിശ്വാസ സംരക്ഷണം തുടങ്ങിയ മതപരമായ പ്രവര്ത്തനങ്ങള്ക്കുള്ള ധനസഹായം തുടരാന് അനുവദിക്കുകയും ഏറ്റെടുക്കുന്ന ആരാധനാലയങ്ങളുടെ മതപരമായ സ്വഭാവം സംരക്ഷിക്കപ്പെടണമെന്ന് വ്യവസ്ഥ ചെയ്യുകയും ചെയ്യുന്നു.
ലംഘനങ്ങളുടെ മുന്കാല ചരിത്രം
വിദേശ ഫണ്ടിങ്ങില് ശക്തമായ മേല്നോട്ടം വേണമെന്ന വാദത്തിന് തെളിവായി ചൂണ്ടിക്കാണിക്കുന്ന പ്രധാന കേസുകള് ഇവയാണ്;
ഗ്രീന്പീസ് ഇന്ത്യ: ഫണ്ട് കൈമാറ്റം, നിയമാനുസൃതമായ വീഴ്ചകള്, ഭാരതത്തിന്റെ സാമ്പത്തിക താല്പര്യങ്ങള്ക്ക് ഹാനികരമായ പ്രചാരണങ്ങള് എന്നിവ മുന്നിര്ത്തി ഇവരുടെ രജിസ്ട്രേഷന് റദ്ദാക്കി.
ആംനസ്റ്റി ഇന്റര്നാഷണല് ഇന്ത്യ: എഫ്സിആര്എ നിയന്ത്രണങ്ങള് മറികടക്കാന് കോര്പ്പറേറ്റ് ഘടന ഉണ്ടാക്കി യുകെയില് നിന്ന് എഫ്ഡിഐ, കണ്സള്ട്ടന്സി ഫീസ് എന്നീ പേരുകളില് 36 കോടി രൂപ മാറ്റിയതിന് സിബിഐ കേസെടുത്തു.
ലോയേഴ്സ് കളക്ടീവ്: വിദേശ ഫണ്ട് ദുരുപയോഗം ചെയ്തതിന് 2019 ല് സിബിഐ ഈ സംഘടനയ്ക്ക് എതിരെ കേസെടുത്തിരുന്നു.
പോപ്പുലര് ഫ്രണ്ട് ഓഫ് ഇന്ത്യ: 2022ല് നിരോധിക്കപ്പെട്ട പിഎഫ്ഐ, 13,000ത്തിലധികം വിദേശ പ്രവര്ത്തകരെ വച്ച് 620 മില്യണിലധികം രൂപ വെളുപ്പിച്ചു. പള്ളികള്, മദ്രസകള്, പെണ്കുട്ടികളുടെ വിദ്യാഭ്യാസം എന്നിവയ്ക്കായി ശേഖരിച്ച പണം തീവ്രവാദം, ആയുധ പരിശീലനം എന്നിവയ്ക്കായി വഴിതിരിച്ചുവിട്ടു. നിരോധനത്തിന് ശേഷം ഇതേ ശൃംഖല എസ്ഡിപിഐക്ക് കീഴില് പുനഃസംഘടിപ്പിക്കപ്പെട്ടു.
രാജീവ് ഗാന്ധി ഫൗണ്ടേഷന്: ചൈനീസ് സര്ക്കാരുമായി ബന്ധമുണ്ടെന്ന് ആരോപിക്കപ്പെടുന്ന സ്ഥാപനങ്ങളില് നിന്നുള്ള ഫണ്ടിംഗ് ഉള്പ്പെടെയുള്ള സുരക്ഷാ ആശങ്കകള് കാരണം രജിസ്ട്രേഷന് സസ്പെന്ഡ് ചെയ്തു.
വിവിധ പ്രത്യയശാസ്ത്ര പശ്ചാത്തലമുള്ള ഗ്രൂപ്പുകള് ഈ ഭേദഗതികളെ എതിര്ക്കുന്നുണ്ടെങ്കിലും, ശക്തമായ മേല്നോട്ടം രാജ്യത്തിന്റെ കെട്ടുറപ്പിന് അത്യന്താപേക്ഷിതമാണ്. വിദേശ സംഭാവനകളുടെ സുതാര്യതയും ഉത്തരവാദിത്തവും ഉറപ്പാക്കാനും, വിദേശ ഫണ്ടുകള് ദുരുപയോഗം ചെയ്യുന്നത് തടഞ്ഞ് രാജ്യത്തിന്റെ ദേശീയ താല്പര്യങ്ങളും സുരക്ഷയും സംരക്ഷിക്കാനും എഫ്സിആര്എ ഭേദഗതി ബില് 2026 പാസാക്കേണ്ടത് അനിവാര്യമാണ്.
ജന്മഭൂമി ഓണ്ലൈന്