കഴിഞ്ഞ തവണ ഖത്തറില്‍ ആദ്യ മത്സരത്തില്‍ സൗദിയോട് തോറ്റ ശേഷം പിന്നീട് ഓരോ മത്സരത്തിലും ഗംഭീര പ്രകടനത്തോടെ മുന്നേറിയ അര്‍ജന്റൈന്‍ കുതിപ്പ് എത്തി നിന്നത് അവരുട മൂന്നാം കിരീട നേട്ടത്തില്‍. അന്നത്തെ ടീമില്‍ പ്രധാന താരമായിരുന്ന ഏഞ്ചല്‍ ഡി മരിയ ഇപ്പോള്‍ ടീമിനൊപ്പമില്ല. പിന്നെ ചെറിയ ചില മാറ്റങ്ങളല്ലാതെ അര്‍ജന്റീന ഇക്കുറിയും അതേ ശക്തിയോടെയാണ് ഒരുങ്ങുന്നത് ലയണല്‍ സ്‌കലോനിക്ക് കീഴില്‍. 1930ലെ പ്രഥമ ലോകകപ്പില്‍ റണ്ണറപ്പുകളായി. 1938 മുതല്‍ തുടര്‍ച്ചയായ മൂന്ന് ലോകകപ്പുകളില്‍ നിന്ന് വിട്ടുനിന്നു. പിന്നീട് 1970ല്‍ യോഗ്യത നേടാന്‍ സാധിച്ചില്ല. 1978ല്‍ ആദ്യമായി ജേതാക്കളായി 1986ല്‍ രണ്ടാം തവണയും കിരീടം ചൂടി. ആദ്യ ലോകകപ്പിന് ശേഷം 1990ലും 2014ലും റണ്ണറപ്പുകളായി. സെമി ഫൈനല്‍ മത്സരങ്ങളില്‍ ഇതേ വരെ തോറ്റിട്ടില്ലാത്ത ടീം കൂടിയാണ് അര്‍ജന്റീന.
അള്‍ജീരിയ
അള്‍ജീരിയയുടെ അഞ്ചാം ലോകകപ്പ് ഫുട്‌ബോള്‍ ആണിത്. ഇതിന് മുമ്പ് 1982, 1986, 2010, 2014 വര്‍ഷങ്ങളില്‍ കളിച്ചിട്ടുണ്ട്. 1962 വരെ ഈ ടീം ഫ്രഞ്ച് കോളനിയായിരുന്നു. 2014 ബ്രസീല്‍ ലോകകപ്പില്‍ പ്രീക്വാര്‍ട്ടറില്‍ പ്രവേശിച്ചതാണ് ഏറ്റവും വലിയ നേട്ടം. ബ്രസീലിനോട് പരാജയപ്പെട്ടാണ് പുറത്തായത്.
ഓസ്ട്രിയ
ലോകകപ്പില്‍ രണ്ട് തവണ സെമി വരെ മുന്നേറിയ ടീം ആണ് ഓസ്ട്രിയ. 1934ല്‍ ആദ്യമായി പങ്കെടുത്തു നാലാമതായി ഫിനിഷ് ചെയ്തു. പിന്നീട് 1954ല്‍ ജര്‍മനിയില്‍ മൂന്നാം സ്ഥാനക്കാരായി. 1978ലെ അര്‍ജന്റൈന്‍ ലോകകപ്പ് ക്വാര്‍ട്ടര്‍ വരെ മുന്നേറിയതാണ് അതിന് ശേഷം കൈവരിച്ച വലിയ നേട്ടം. ഇത് ഏഴാം തവണയാണ് ഈ ടീം ഫിഫ ലോകകപ്പ് കളിക്കാന്‍ അര്‍ഹരാകുന്നത്.
ജോര്‍ദാന്‍
ഇത്തവണ കന്നിക്കാരായി കളിക്കളത്തിലിറങ്ങുന്ന ടീമുകളില്‍ ഒന്ന് ജോര്‍ദാന്‍ ആണ്. ലോകകപ്പിന് കൃത്യം ഒരുവര്‍ഷം മുമ്പ് ഈ ടീം യോഗ്യത ഉറപ്പാക്കി. കഴിഞ്ഞ വര്‍ഷം ജൂണില്‍ ഒമാനെതിരായ എവേ മത്സരത്തില്‍ 3-0ന്റെ വിജയത്തോടെയാണ് ടീം ആദ്യത്തെ ഫിഫ ലോകകപ്പ് യോഗ്യത ഉറപ്പിച്ചത്.
