കോട്ടയം: കാലവര്ഷം രാജ്യത്തിന്റെ കൂടുതല് ഭാഗങ്ങളിലേക്ക് വ്യാപിക്കുന്നതിനൊപ്പം മഴയുടെ തീവ്രതയും കൂടുമെന്ന് കേന്ദ്ര കാലാവസ്ഥാ വകുപ്പിന്റെ (ഐഎംഡി)വിലയിരുത്തല്. സംസ്ഥാനത്ത് അടുത്ത ദിവസങ്ങളിലും അതിശക്തമായ മഴ തുടരുമെന്നാണ് പ്രവചനം. കോഴിക്കോട്, കണ്ണൂര്, കാസര്കോട് ജില്ലകളില് ചൊവ്വാഴ്ച അതിതീവ്ര മഴക്ക് സാധ്യതയുണ്ടെന്നും മുന്നറിയിപ്പുണ്ട്. തീരദേശ ജില്ലകളിലും മലയോര മേഖലകളിലും പ്രത്യേക ജാഗ്രത വേണമെന്ന് അധികൃതര് നിര്ദേശിച്ചു. കേരളം ഉള്പ്പെടെയുള്ള സംസ്ഥാനങ്ങളില് ഇടിമിന്നലോടുകൂടിയ ശക്തമായ മഴ ലഭിക്കും. അറബിക്കടലിലും ബംഗാള് ഉള്ക്കടലിലും ശക്തമായ കാറ്റിനും മോശം കാലാവസ്ഥക്കും സാധ്യതയുള്ളതിനാല് മത്സ്യത്തൊഴിലാളികള് പ്രത്യേകം ജാഗ്രത പാലിക്കണമെന്നും നിര്ദേശിക്കുന്നു.
കാലവര്ഷം നാലു ദിവസത്തിനകം മധ്യ അറബിക്കടലിന്റെ കൂടുതല് ഭാഗങ്ങളിലേക്കും മഹാരാഷ്ട്ര, കര്ണാടക, തെലങ്കാന, ആന്ധ്രാപ്രദേശ്, തമിഴ്നാട്, ഒഡിഷ, ഛത്തിസ്ഗഡ്, ബംഗാള്, സിക്കിം ഉള്പ്പെടെയുള്ള വടക്ക് കിഴക്കന് സംസ്ഥാനങ്ങള് എന്നിവിടങ്ങളിലേക്കും വ്യാപിച്ചേക്കുമെന്നും ഐഎംഡി പ്രവചിക്കുന്നു.
കോഴിക്കോട്, കണ്ണൂര്, കാസര്കോട് ജില്ലകളില് ഇന്ന് റെഡ് അലര്ട്ട്
അതിതീവ്ര മഴയ്ക്ക് സാധ്യതയുള്ളതിനാല് കോഴിക്കോട്, കണ്ണൂര്, കാസര്കോട് ജില്ലകളില് ചൊവ്വാഴ്ച കേന്ദ്ര കാലാവസ്ഥ വകുപ്പ് റെഡ് അലര്ട്ട് പ്രഖ്യാപിച്ചു. 24 മണിക്കൂറില് 204.4 മില്ലി മീറ്ററില് കൂടുതല് മഴ ലഭിക്കുമെന്നാണ് അതിതീവ്രമായ മഴ എന്നതുകൊണ്ട് അര്ത്ഥമാക്കുന്നത്.
അതിതീവ്ര മഴ അപകടങ്ങള് ഉണ്ടാക്കും. കുറഞ്ഞ സമയത്തില് വലിയ മഴയുണ്ടാകുന്ന പ്രവണതയാണ് പ്രതീക്ഷിക്കുന്നത്. ഇത് മലവെള്ളപ്പാച്ചിലിനും മിന്നല് പ്രളയത്തിനും ഇടയാക്കിയേക്കാം. നഗരപ്രദേശങ്ങളിലും പൊതുവെ താഴ്ന്ന പ്രദേശങ്ങളിലും വെള്ളക്കെട്ട് രൂപപ്പെടാനും സാധ്യതയുണ്ട്. മഴ തുടരുന്ന സാഹചര്യം മണ്ണിടിച്ചിലും ഉരുള്പൊട്ടലും സൃഷ്ടിച്ചേക്കാം. പൊതുജനങ്ങളും സര്ക്കാര് സംവിധാനങ്ങളും അതിജാഗ്രത പാലിക്കണമെന്നും ഐഎംഡി മുന്നറിയിപ്പ് നല്കുന്നു.
ഓറഞ്ച് അലര്ട്ട്
മലപ്പുറം, വയനാട് ജില്ലകളില് ചൊവ്വാഴ്ച ഓറഞ്ച് അലര്ട്ട് ആണ്.
ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
മഞ്ഞ അലര്ട്ട്
9ന് പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, പാലക്കാട്.
10ന് മലപ്പുറം, കോഴിക്കോട്, വയനാട്, കണ്ണൂര്, കാസര്കോട്.
11 ന് മലപ്പുറം, കോഴിക്കോട്, വയനാട്, കണ്ണൂര്, കാസര്കോട്.
12 ന് എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
