അവസാന നാളുകളില്‍ കരുത്തായത് അമ്മയുടെ അനുഗ്രഹം

കൊച്ചി: മാതാ അമൃതാനന്ദമയീ ദേവിയുടെ ഭക്തനായിരുന്നു സലിം കുമാര്‍. മാരകമായ രോഗം പിടിപെട്ട് അവശനായി വന്‍ തുക ചികിത്സക്ക് വേണ്ടി വന്നപ്പോള്‍ ഡോക്ടര്‍മാരുടെ നിര്‍ദേശത്തെ തുടര്‍ന്ന് അമൃതാനന്ദമയീ ദേവിയെ കാണാന്‍ പോയി ജീവിതം തിരിച്ചുപിടിച്ച കഥ പല വേദിയിലും പറയുകയുണ്ടായി. എന്റെ ഡീസല്‍ തീരുമ്പോഴാണ് അമ്മയെ ഓരോ പ്രാവശ്യവും കാണാന്‍ വരുന്നത്. ഡീസലടിച്ചിട്ട് ഞാന്‍ പോകും. മാനസികവ്യഥ അനുഭവിക്കുന്ന സമയങ്ങളില്‍ അമ്മ എവിടെയാണെങ്കിലും ഞാന്‍ കാണാന്‍ ചെല്ലും. തിരിച്ചുപോകുന്നത് നിറഞ്ഞ മനസോടും സന്തോഷത്തോടും കൂടിയായിരിക്കും. ഈ നില്‍ക്കുന്ന സലിം കുമാര്‍ ഇങ്ങനെ ഞെളിഞ്ഞ് നിന്ന് പ്രസംഗിക്കാന്‍ ഒരേയൊരു കാരണക്കാരിയേയുള്ളൂ. അത് അമ്മയാണ്, സലിം കുമാര്‍ കഴിഞ്ഞവര്‍ഷം അമ്മയെ സാക്ഷിയാക്കി പറഞ്ഞ വാക്കുകളാണ്.

മൂന്ന് നാല് വര്‍ഷങ്ങള്‍ക്ക് മുമ്പ് മാരകരോഗത്തിന് അടിമയായപ്പോള്‍ ഞാന്‍ ഒരുപാട് സഹായിച്ച എന്റെ ബന്ധുക്കള്‍പോലും കൈയൊഴിഞ്ഞ സമയമുണ്ടായിരുന്നു. അന്ന് ഞാന്‍ അമ്മയുമായി അത്ര ബന്ധമില്ല. അപ്പോള്‍ അമ്മയെ ചെന്ന് കാണാന്‍ ഡോക്ടര്‍മാര്‍ പറഞ്ഞു. എന്തെങ്കിലും സഹായത്തിന് വേണ്ടിയാണ് അവര്‍ ചെന്ന് കാണാന്‍ പറഞ്ഞത്. ഞാന്‍ ചെന്നപ്പോള്‍ എന്താ മോനെ വന്നതെന്ന് അമ്മ ചോദിച്ചു. അന്ന് എനിക്ക് 45 വയസേയുള്ളൂ. ആശുപത്രി രജിസ്റ്ററില്‍ 56 വയസെന്നാണ് എഴുതിയിരിക്കുന്നത്. അതൊന്ന് മാറ്റിത്തരണമെന്ന് അമ്മയോട് ഞാന്‍ പറഞ്ഞു. ആ സമയത്ത് അമ്മ കൊച്ചുകുട്ടിയെപ്പോലെ പൊട്ടിച്ചിരിച്ചു. ഞാന്‍ വേറൊന്നും പറഞ്ഞില്ല. അപ്പോള്‍ ധൈര്യമായി ആശുപത്രിയില്‍ പോയി ഓപ്പറേഷന്‍ ചെയ്യൂ മകനേ ഞാന്‍ കൂടെയുണ്ട് എന്ന് അമ്മ എന്നോട് പറഞ്ഞു. ഇരുട്ടില്‍ നിന്നിരുന്ന എന്നെയും എന്റെ കുടുംബത്തെയും വെളിച്ചത്തിലേക്ക് കൊണ്ടുവന്നത് അമ്മ തന്നെയാണ്. ജീവിതം മുഴുവന്‍ ഞാന്‍ അമ്മയോട് കടപ്പെട്ടിരിക്കുന്നു. അമ്മയുടെ ഒരു മകനായിട്ട് എന്റെ മരണം വരെ ജീവിക്കണമെന്നാണ് എന്റെ ആഗ്രഹം, സലിം കുമാര്‍ പറയാറുണ്ടായിരുന്നു.

അമൃത ആശുപത്രിയില്‍ കരള്‍ മാറ്റിവച്ച് ജീവിതം തിരിച്ചു പിടിക്കുകയും ഒടുവില്‍ അവിടെ വച്ചു തന്നെ സലിം കുമാര്‍ യാത്രയാവുകയും ചെയ്തു. ആ വിടവാങ്ങലിലും ഒരു യാദൃശ്ചികത കൂടി കടന്നുവന്നു. ശനിയാഴ്ച രാത്രി സലിം കുമാര്‍ തന്റെ അവസാനരംഗം ആടിതീര്‍ക്കുമ്പോള്‍ അമൃത ആശുപത്രിയില്‍ നിന്ന് അല്പം അകലെ ഇടപ്പള്ളി ബ്രഹ്‌മ സ്ഥാനത്ത് അമൃതാനന്ദമയീ ദേവി ഭക്തര്‍ക്ക് ദര്‍ശനം നല്‍കി അനുഗ്രഹവര്‍ഷം ചൊരിയുകയായിരുന്നു. നേരില്‍ കാണാനായില്ലെങ്കിലും അമ്മയുടെ അനുഗ്രഹം അപ്പോഴും സലിം കുമാറിന് ലഭിച്ചിരിക്കാമെന്നാണ് ഏവരും കരുതുന്നത്.