കോഴിക്കോട്: സെന്സസ് ഡ്യൂട്ടിക്ക് നിയോഗിക്കപ്പെട്ട അധ്യാപകര്ക്ക് പകരം ദിവസവേതന അദ്ധ്യാപകരെ നിയമിക്കണമെന്ന് ദേശീയ അദ്ധ്യാപക പരിഷത്ത്. സെന്സസ് ഡ്യൂട്ടിക്ക് നിയോഗിക്കപ്പെട്ട അദ്ധ്യാപകര് വിദ്യാലയസമയം മുഴുവന് അദ്ധ്യാപന പ്രവര്ത്തനങ്ങളില് ഏര്പ്പെട്ടതിന് ശേഷമാണ് സെന്സസ് ചുമതലകളും നിര്വഹിക്കേണ്ടതെന്ന നിര്ദേശം അദ്ധ്യാപക ദ്രോഹ നടപടിയും സാമാന്യ നീതിക്ക് നിരക്കാത്തതുമാണെന്ന് ദേശീയ അദ്ധ്യാപക പരിഷത്ത് സംസ്ഥാന ജനറല് സെക്രട്ടറി ടി. അനുപ്കുമാര് അഭിപ്രായപ്പെട്ടു.
രാജ്യത്തിന്റെ വികസന പദ്ധതികള്ക്കും ഭരണപരമായ തീരുമാനങ്ങള്ക്കും അടിസ്ഥാനമായ ജനസംഖ്യാ കണക്കെടുപ്പ് അതീവ പ്രാധാന്യമുള്ള ദേശീയ ചുമതലയാണ്. അതേസമയം, ഈ ഉത്തരവാദിത്വം അദ്ധ്യാപകരുടെ മേല് അധികഭാരമായി അടിച്ചേല്പ്പിക്കുന്ന സാഹചര്യം ഒഴിവാക്കണം. സ്കൂള് സമയത്തിന് ശേഷമായിരിക്കണം സെന്സസ് പ്രവര്ത്തനങ്ങള് നടത്തേണ്ടത് എന്നത് അദ്ധ്യാപകരുടെ ശാരീരികവും മാനസികവുമായ സമ്മര്ദം വര്ദ്ധിപ്പിക്കുകയും അവരുടെ ഔദ്യോഗിക ചുമതലകളുടെ കാര്യക്ഷമതയെ ബാധിക്കുകയും ചെയ്യും. സെന്സസ് ഡ്യൂട്ടിക്ക് നിയമിക്കപ്പെട്ട അദ്ധ്യാപകര്ക്ക് പകരമായി ദിവസവേതന അടിസ്ഥാനത്തില് അദ്ധ്യാപകരെ നിയമിച്ച് വിദ്യാലയങ്ങളിലെ പഠന പ്രവര്ത്തനങ്ങള് തടസപ്പെടാതിരിക്കാനും സെന്സസ് പ്രവര്ത്തനങ്ങള് സമയബന്ധിതമായി പൂര്ത്തിയാക്കാനും സര്ക്കാര് അടിയന്തരമായി ഉത്തരവിറക്കണമെന്നും അദ്ദേഹം ആവശ്യപ്പെട്ടു.
പുതിയ അദ്ധ്യയനവര്ഷം ആരംഭിച്ച് ഒരാഴ്ച് കഴിഞ്ഞിട്ടും സര്ക്കാര് വിദ്യാലയങ്ങളുടെ ഗുണനിലവാരം സംരക്ഷിക്കുന്നതിനും അദ്ധ്യാപകരുടെ തൊഴില് സാഹചര്യങ്ങള് മെച്ചപ്പെടുത്തുന്നതിനും അദ്ധ്യാപകരുടെ ട്രാന്സ്ഫര് നടപടികള്, പ്രധാന അദ്ധ്യാപക നിയമനങ്ങള്, പ്രിന്സിപ്പാള് നിയമനങ്ങള് എന്നിവയില് സര്ക്കാര് അടിയന്തിരമായി അനുകൂലമായ നിലപാട് സ്വീകരിക്കണമെന്നും പ്രസ്താവനയില് ടി. അനൂപ് കുമാര് ആവശ്യപ്പെട്ടു.
