ബെംഗളൂരു: കര്ണാടകയില് ആഗ്രഹിച്ച വകുപ്പ് കിട്ടാത്തതില് പ്രതിഷേധിച്ച് രാജി വച്ച രാമലിംഗ റെഡ്ഡി മന്ത്രിയായി തുടരും. രാജി പിന്വലിച്ചെന്ന് കര്ണാടകത്തിന്റെ ചുമതലയുള്ള എഐസിസി ജനറല് സെക്രട്ടറി രണ്ദീപ് സിംഗ് സുര്ജേവാല അറിയിച്ചു.
രാജി വെച്ചത് ചില തെറ്റിദ്ധാരണകളാലാണെന്നും രണ്ദീപ് സിംഗ് സുര്ജേവാല പറഞ്ഞു.രാമലിംഗ റെഡ്ഡിയെ അനുനയിപ്പിക്കുന്നതിനായി മുഖ്യമന്ത്രിയും കോണ്ഗ്രസ് ഹൈക്കമാന്ഡും നടത്തിയ നീക്കങ്ങള് ഒടുവില് ഫലം കണ്ടു.
ഇന്നലെ ബെംഗളൂരുവില് ഉണ്ടായിരുന്ന രാഹുല് ഗാന്ധിയുമായി ഡികെയും സിദ്ധരാമയ്യയും വിഷയം ചര്ച്ച ചെയ്തിരുന്നു. സംസാരിച്ച് പ്രശ്നം പരിഹരിക്കാനായിരുന്നു രാഹുലിന്റെ നിര്ദേശം. പരിഹാരമുണ്ടാകാത്ത പക്ഷം രാജി സ്വീകരിക്കണമെന്നും രാഹുല് നിലപാടെടുത്തു. തുടര്ന്നാണ് കര്ണാടകത്തിന്റെ ചുമതലയുള്ള എഐസിസി ജനറല് സെക്രട്ടറി രണ്ദീപ് സുര്ജേവാല രാമലിംഗ റെഡ്ഡിയുമായി ചര്ച്ച നടത്തിയത്.
