ആലപ്പുഴ: ചക്ക ഒരു ഭക്ഷ്യ വസ്തു മാത്രമല്ല ഔഷധവുമാണെന്ന് വീണ്ടും ശാസ്ത്രീയമായി തെളിയിക്കപ്പെട്ടു. ആലപ്പുഴ മെഡിക്കല് കോളേജില് ഡോ. ബി. പദ്മകുമാറിന്റെ നേതൃത്വത്തില് 100 പ്രമേഹ രോഗികളില് മൂന്ന് മാസം നടത്തിയ പഠനത്തിലെ കണ്ടെത്തല് പ്രതീക്ഷ പകരുന്നതാണ്. പഴുക്കാത്ത പാകമായ ചക്കയുടെ പൊടി ആഹാരത്തില് കലര്ത്തി നല്കിയ രോഗികള്ക്ക് രക്തത്തിലെ പഞ്ചസാരയുടെ അളവ് കുറയുന്നതിന് പുറമേ കൊളസ്ട്രോളും കൊഴുപ്പ് ഘടകമായ ട്രൈഗ്ലിസറൈഡും കുറയുന്നതായും പഠനത്തില് കണ്ടെത്തി. ഉയര്ന്ന രക്തസമ്മര്ദവും കുറയും.
കേന്ദ്ര സര്ക്കാര് സ്ഥാപനമായ കായംകുളം കൃഷി വിജ്ഞാന കേന്ദ്രത്തില് നിന്ന് നല്കിയ പച്ച ചക്കപ്പൊടിയാണ് പഠനത്തിനുപയോഗിച്ചതെന്ന് ഡോ. പദ്മകുമാര് പറഞ്ഞു. അദ്ദേഹം നേതൃത്വം നല്കിയ ക്ലിനിക്കല് സ്റ്റഡി റിപ്പോര്ട്ട്, കറന്റ് ന്യൂട്രീഷന് ആന്ഡ് ഫുഡ് സയന്സ് എന്ന അന്താരാഷ്ട്ര മെഡിക്കല് ജേര്ണലിലാണ് പ്രസിദ്ധീകരിച്ചത്. ആലപ്പുഴ മെഡിക്കല് കോളജിലെ പ്രിന്സിപ്പലായിരുന്ന ഡോ. ബി. പദ്മകുമാര് അടുത്തിടെയാണ് വിരമിച്ചത്. ഡോ. ബിനോ ഡേവിഡ്, ഡോ. ലിബു. ജി. കെ, ഡോ. ഗോവിന്ദ്. എസ്., ഡോ. അബിഷ് ബി. മോഹന് തുടങ്ങിയവരും പഠനത്തില് പങ്കെടുത്തു.
ചക്കയില് സമൃദ്ധമായി അടങ്ങിയിരിക്കുന്ന നാരുകളാണ് രക്തത്തിലെ ഷുഗര് കുറയ്ക്കാന് സഹായകമാകുന്നത്. 100 ഗ്രാം ചക്കപ്പൊടിയില് 10 ഗ്രാം നാരുകളുണ്ട്. ദഹന പ്രക്രിയക്ക് വഴങ്ങാത്ത നാരുകള് ഗ്ലൂക്കോസിന്റെ ആഗിരണത്തെ തടയുന്നു. കൂടാതെ കൊഴുപ്പിന്റെ ആഗിരണത്തെയും മന്ദീഭവിപ്പിക്കുന്നു. ഇതാണ് ചക്ക കഴിച്ചതിനെ തുടര്ന്ന് രക്തത്തിലെ ഷുഗറും കൊളസ്ട്രോളും കുറയാന് കാരണം.
ചക്കയില് അടങ്ങിയിരിക്കുന്ന അന്നജം വളരെ സാവധാനം മാത്രം ദഹിക്കുന്നതും ആഗിരണം ചെയ്യുന്നതുമാണ്. ഇതും രക്തത്തിലെ ഷുഗര് കുറയാന് സഹായകമായി. ചക്കയുടെ ഉപയോഗം രക്തസമ്മര്ദം കുറയ്ക്കാനും ഉപകരിക്കുമെന്ന് പഠനത്തില് കണ്ടെത്തി.
