തിരുവനന്തപുരം: ലഹരിമരുന്നിന്റെ ഉറവിടങ്ങള് കണ്ടെത്തി വേരറുക്കാനായി രൂപീകരിച്ച പ്രത്യേക പൊലീസ് സംഘം മികച്ച രീതിയിലാണ് മുന്നോട്ട് പോകുന്നതെന്ന് ആഭ്യന്തര മന്ത്രി രമേശ് ചെന്നിത്തല അറിയിച്ചു. ഇതിന്റെ ഭാഗമായി അന്താരാഷ്ട്ര ലഹരി സംഘത്തിലെ രണ്ട് പ്രധാന കണ്ണികളെ പൊലീസ് വലയിലാക്കിയെന്ന് അദ്ദേഹം പറഞ്ഞു.
രണ്ട് പ്രധാനപ്പെട്ട ക്യാച്ചാണ് ലഭിച്ചത്. പന്തളം പൊലീസ് സ്റ്റേഷനില് രജിസ്റ്റര് ചെയ്ത കേസുമായി ബന്ധപ്പെട്ടു നൈജീരയന് പൗരനെയും പെരുനാട് പൊലീസ് സ്റ്റേഷനില് രജിസ്റ്റര് ചെയ്ത കേസുമായി ബന്ധപ്പെട്ടു വിദേശ വനിതയെയും അന്വേഷണ സംഘം അറസ്റ്റ് ചെയ്തു. ദല്ഹി പൊലീസിന്റെ സഹായത്തോടെ വളരെ ശ്രമകരമായാണ് കേരള പൊലീസ് സംഘം നൈജീരയന് പൗരനെ അറസ്റ്റ് ചെയ്തത്. ബംഗളൂരുവില് നിന്നാണ് വിദേശ വനിതയെ പിടികൂടിയത്.
വിദേശത്തുനിന്ന് കേരളത്തിലേക്ക് മയക്കുമരുന്ന് എത്തിക്കുന്ന പ്രധാന കണ്ണികളാണ് ഇരുവരും. ഇവരെ പിടികൂടിയത് വലിയ നേട്ടമാണെന്ന് മന്ത്രി പറഞ്ഞു.
സംസ്ഥാന സ്പെഷ്യല് ബ്രാഞ്ചില് തൂഫാന് ഇന്റലിജന്സ് എന്ന പേരില് ഒരു സംഘത്തെ മയക്കുമരുന്നിന്റെ ഉറവിടം കണ്ടെത്താനായി മാത്രം നിയോഗിച്ചിട്ടുണ്ട്. മയക്കുമരുന്ന് വിപണനവുമായി ബന്ധപ്പെട്ട രഹസ്യങ്ങള് ആര്ക്ക് വേണമെങ്കിലും പൊലീസിന് കൈമാറാം.9497979794, 9497927797 എന്നീ നമ്പരുകളിലേക്ക് പൊതുജനങ്ങള്ക്ക് വിവരങ്ങള് കൈമാറാം. 9995966666 എന്നീ വാട്സ്ആപ്പ് നമ്പരിലേക്കും വിവരങ്ങള് നല്കാം. രഹസ്യവിവരങ്ങള് കൈമാറുന്നവരുടെ വിവരങ്ങള് വെളിപ്പെടുത്തില്ലെന്നും ചെന്നിത്തല അറിയിച്ചു.
