ചെന്നൈ: കോണ്ഗ്രസിന്റെ വഞ്ചനയില് പ്രതിഷേധിച്ച് ഇന്ത്യാമുന്നണിയോഗത്തില് പങ്കെടുക്കില്ലെന്ന് ഡിഎംകെ വ്യക്തമാക്കി. ജൂണ് എട്ടിന് ദല്ഹിയില് ചേരുന്ന ഇന്ത്യാമുന്നണി യോഗത്തില് പങ്കെടുക്കില്ലെന്ന് ഡിഎംകെ പ്രത്യേക വാര്ത്താക്കുറിപ്പ് പുറത്തിറക്കിയാണ് അറിയിച്ചത്. രണ്ട് പതിറ്റാണ്ടിലേറെയായി നിലനില്ക്കുന്ന ഡിഎംകെ-കോണ്ഗ്രസ് ബന്ധമാണ് തകര്ന്നത്.
തമിഴ്നാട്ടില് ഡിഎംകെയുടെ സഖ്യകക്ഷിയായി മത്സരിച്ച കോണ്ഗ്രസ് പിന്നീട് ഡിഎംകെയോട് പോലും അനുവാദം ചോദിക്കാതെ വിജയിന്റെ ടിവികെയുടെ സഖ്യകക്ഷിയാവുകയും മന്ത്രിസ്ഥാനങ്ങള് സ്വീകരിക്കുകയും ചെയ്തിരുന്നു. കഴിഞ്ഞ ദിവസം കോണ്ഗ്രസിന് തമിഴ്നാട്ടില് നിന്നുള്ള രാജ്യസഭാ സീറ്റ് നല്കാനും ജോസഫ് വിജയ് സമ്മതിച്ചിരുന്നു.
രാജ്യസഭാ സീറ്റിന്റെ കാര്യത്തില് രാഹുല് ഗാന്ധിയും സ്റ്റാലിനും തമ്മില് നടന്ന വഴക്കാണ് ഡിഎംകെയും കോണ്ഗ്രസും തമ്മില് തെറ്റാന് കാരണമായത്. രാജ്യസഭാസീറ്റ് കോണ്ഗ്രസിന് വേണമെന്ന അവകാശവാദം സ്റ്റാലിന് അനുവദിച്ചില്ല. അതുപോലെ തമിഴ്നാട്ടില് ഡിഎംകെ സര്ക്കാര് അധികാരത്തില് വന്നാല് കോണ്ഗ്രസിന് മന്ത്രിസ്ഥാനങ്ങള് നല്കണമെന്ന രാഹുല് ഗാന്ധിയുടെ വാദവും സ്റ്റാലിന് അംഗീകരിച്ചിരുന്നില്ല. സഖ്യകക്ഷിയാകാമെന്നല്ലാതെ അധികാരസ്ഥാനങ്ങള് നല്കില്ലെന്നായിരുന്നു സ്റ്റാലിന്റെ നിലപാട്. ഇതിന്റെ ഭാഗമായി തമിഴ്നാട്ടില് തെരഞ്ഞെടുപ്പ് പ്രചാരണങ്ങല്ക്ക് വന്ന രാഹുല് ഗാന്ധി സ്റ്റാലിനുമായി വേദി പങ്കിട്ടിരുന്നില്ല. ഡിഎംകെ പിന്തുണയോടെ കോണ്ഗ്രസ് അഞ്ച് സീറ്റുകള് നേടി.
പക്ഷെ പിന്നീട് വിജയിന്റെ ടിവികെയ്ക്ക് സര്ക്കാര് രൂപീകരിക്കാന് എംഎല്എമാര് കുറവായതിനാല് കോണ്ഗ്രസ് പിന്തുണയ്ക്കുകയായിരുന്നു. പക്ഷെ സ്റ്റാലിനോട് അനുവാദം പോലും ചോദിക്കാതെയാണ് രാഹുല് ഗാന്ധി ടിവികെയ്ക്ക് പിന്തുണ പ്രഖ്യാപിച്ചത്. 2004 മുതലാണ് ഡിഎംകെയും കോണ്ഗ്രസും തമ്മില് അടുക്കുന്നത്. ഈ ബന്ധം 2013 വരെ തുടര്ന്നു. പിന്നീട് ഇവര് തമ്മില് പിരിഞ്ഞു. അതിന് ശേഷം 2019ന് വീണ്ടും ഡിഎംകെ കോണ്ഗ്രസിന്റെ സഖ്യകക്ഷിയായി. ഈ ബന്ധം വീണ്ടും 2026ല് പിരിഞ്ഞിരിക്കുകയാണ്.
