രാജ്യത്തിന്റെ പരമാധികാരം വ്യക്തിസ്വാതന്ത്ര്യത്തേക്കാള്‍ പ്രധാനം: ഇക്കാര്യത്തില്‍ അര്‍ത്ഥശങ്കയില്ലെന്ന് പരമോന്നത നീതിപീഠം

ന്യൂദല്‍ഹി: രാജ്യത്തിന്റെ പരമാധികാരം വ്യക്തിസ്വാതന്ത്ര്യത്തേക്കാള്‍ പ്രധാനമാണെന്ന് സുപ്രിംകോടതി. ഹെറോയിന്‍ കടത്ത് കേസിലെ പ്രതിക്ക് ഹൈക്കോടതി അനുവദിച്ച ജാമ്യം റദ്ദാക്കിക്കൊണ്ടാണ് സുപ്രീം കോടതി ഈ നിരീക്ഷണം നടത്തിയത്. ‘രാജ്യത്തിന്റെ പരമാധികാരവും വ്യക്തിസ്വാതന്ത്ര്യവും തമ്മില്‍ തുലനം ചെയ്യപ്പെടുന്ന സാഹചര്യമുണ്ടായാല്‍, നിസ്സംശയമായും ആദ്യത്തേതിനാണ് മുന്‍ഗണന. പ്രത്യേകിച്ച് രാജ്യത്തിനെതിരെ യുദ്ധം നടക്കുമ്പോള്‍, അത് മയക്കുമരുന്ന് വിതരണത്തിന്റെ രൂപത്തിലായാലും, അത് ദേശീയ സമ്പദ്വ്യവസ്ഥയെയും ജനങ്ങളുടെ ആരോഗ്യത്തെയും സാരമായി ബാധിക്കുന്നു ‘ കോടതി പറഞ്ഞു.
ബല്‍രാജ് സിംഗ് എന്ന ബില്ലയെ ജാമ്യത്തില്‍ വിട്ടയച്ച ഹൈക്കോടതിയുടെ ഉത്തരവിനെതിരെ പഞ്ചാബ് സമര്‍പ്പിച്ച അപ്പീല്‍ അനുവദിച്ചുകൊണ്ടാണ് കോടതി ഇക്കാര്യം വ്യക്തമാക്കിയത്. ജാമ്യ ഇളവ് നല്‍കുന്നതിന് മുമ്പ് സെക്ഷന്‍ 37 പ്രകാരമുള്ള നിബന്ധനകള്‍ പാലിച്ചിട്ടുണ്ടോ എന്ന് ഹൈക്കോടതി പരിശോധിച്ചിട്ടില്ലെന്ന് സുപ്രിംകോടതി വിലയിരുത്തി.