ജനീവ: 2026ലെ ‘ദി എര്ത്ത് പ്രൈസ്’ സ്വന്തമാക്കി ഭാരതത്തില് നിന്നുള്ള മൂന്നംഗ സംഘം. വാളന്പുൡയുടെ കുരു ഉപയോഗിച്ച് ജലം ശുദ്ധീകരിക്കുന്ന നൂതനവിദ്യ വികസിപ്പിച്ചതിനാണ് പതിനാറുകാരായ വിവാന് ചൗച്ഛാരിയ, അവ്യാന മേത്ത, അരിയാന അഗര്വാള് എന്നിവര് പുരസ്കരാത്തിന് അര്ഹരായത്.
ജനീവയില് നടന്ന ചടങ്ങില് 23,000 പേര് പങ്കെടുത്ത പൊതു വോട്ടെടുപ്പിലൂടെയാണ് ഏഴ് ഫൈനലിസ്റ്റുകളില് നിന്ന് ഈ സംഘത്തെ ആഗോള വിജയികളായി പ്രഖ്യാപിച്ചത്. ആദ്യമായാണ് ഭാരതത്തില് നിന്നൊരു സംഘം ദി എര്ത്ത് പ്രൈസ് സ്വന്തമാക്കുന്നത്.
വൈദ്യുതിയുടെയോ യന്ത്രങ്ങളുടെയോ ആവശ്യമില്ലാത്ത ഈ വിദ്യ ഗ്രാമീണ മേഖലകളെ ലക്ഷ്യംവെച്ചാണ് രൂപകല്പന ചെയ്തിരിക്കുന്നത്. വാളന്പുളിയുടെ കുരു പൊടിച്ച് വെള്ളത്തില് കലര്ത്തുമ്പോള് അതിലെ മൈക്രോപ്ലാസ്റ്റിക് കണികകള് ഒട്ടിപ്പിടിക്കും. പിന്നീട് അത് ചെറിയ കാന്തം ഉപയോഗിച്ച് നീക്കം ചെയ്യാന് സാധിക്കും. പ്ലാസ്- സ്റ്റിക് എന്നാണ് ഈ നൂതന വിദ്യക്ക് നല്കിയിരിക്കുന്ന പേര്.
ഐഐടി ഗുവാഹത്തിയിലെ ഗവേഷകരുടെ സഹായത്തോടെയാണ് ഈ വിദ്യ വികസിപ്പിച്ചത്. 8,000ത്തിലധികം വിദ്യാര്ത്ഥികളിലേക്കും അദ്ധ്യാപകരിലേക്കും ഇതിനോടകം ഈ സാങ്കേതിക വിദ്യ എത്തിക്കാന് കഴിഞ്ഞിട്ടിട്ടുണ്ട്. 2026 അവസാനത്തോടെ 40,000 പേരിലേക്ക് ഇത് വ്യാപിപ്പിക്കാനും ഇവര് ലക്ഷ്യമിടുന്നുണ്ട്. മൈക്രോപ്ലാസ്റ്റിക്കുകള് ഉയര്ത്തുന്ന ഭീഷണിക്ക് മൂന്നംഗ സംഘത്തിന്റെ ഈ കണ്ടുപിടിത്തം ഒരു പരിഹാരമാണ്.
