തിരുവനന്തപുരം: എസ് എന് ഡി പി യോഗം ജനറല് സെക്രട്ടറി വെള്ളാപ്പള്ളി നടേശനെയും മകന് എന്.ഡി.എ കണ്വീനര് തുഷാര് വെള്ളാപ്പള്ളിയെയും മുഖ്യമന്ത്രി അടക്കം മന്ത്രിമാര് കണ്ടതിനെ ചൊല്ലി കോണ്ഗ്രസിലും യുഡിഎഫിലും അഭിപ്രായ ഭിന്നത രൂക്ഷം.കെ.പി.സി.സി അംഗം റിജില് മാക്കുറ്റിയാണ് ഏറ്റവും ഒടുവില് വിമര്ശനവുമായി രംഗത്തെത്തിയത്.
നാടിനെ ഭിന്നിപ്പിക്കാന് ശ്രമിച്ച വെള്ളാപ്പള്ളി നടേശന് പറഞ്ഞിട്ട് ഒരു ഈഴവനും ഇടതുപക്ഷത്തിന് വോട്ട് ചെയ്തില്ലെന്ന് പറഞ്ഞ് റിജില് മാക്കുറ്റി അതൃപ്തി പരസ്യമാക്കി.ഈ യാഥാര്ഥ്യം തിരിച്ചറിഞ്ഞില്ലെങ്കില് തിരിച്ചടി വലുതായിരിക്കും- റിജില് മാക്കുറ്റി ഫേസ്ബുക്കില് കുറിച്ചു.
എന്ഡിഎ കണ്വീനര് തുഷാര് വെള്ളാപ്പള്ളി ഏതാനും ദിവസം മുമ്പ് വി ഡി സതീശനെ സന്ദര്ശിച്ചിരുന്നു.കഴിഞ്ഞ ദിവസം മന്ത്രി ബിന്ദു കൃഷ്ണ വെള്ളാപ്പള്ളി നടേശനെ സന്ദര്ശിച്ച് അനുഗ്രഹം തേടിയിരുന്നു. ആഭ്യന്തര മന്ത്രി രമേശ് ചെന്നിത്തലയും തുഷാര് വെള്ളാപ്പള്ളിയുമായി കൂടിക്കാഴ്ച നടത്തിയിരുന്നു.എന്ഡിഎ കണ്വീനര് കൂടിയായ തുഷാറിനെ ചെന്നിത്തല കണ്ടത് രാഷ്ട്രീയമായി ശരിയല്ല എന്ന വിമര്ശവുമുണ്ട്.
വെള്ളാപ്പള്ളിയുടെ മുസ്ലീം വിരുദ്ധ പരാമര്ശങ്ങളെ ശക്തമായി വിമര്ശിക്കാത്തതാണ് എല്ഡിഎഫിന് തിരിച്ചടിയായതെന്നും ഇത് നേതാക്കള് തിരിച്ചറിയണമെന്നും സി പി എം കമ്മിറ്റികളില് വിമര്ശനമുയര്ന്നിരുന്നു.വെളളാപ്പളളിയെ കണ്ട ബിന്ദുകൃഷ്ണയെ നേരത്തേ യൂത്ത് ലീഗ് നേതാവ് സി കെ ഷാക്കിറും വിമര്ശിച്ചിരുന്നു. യൂത്ത് കോണ്ഗ്രസ് ജനറല് സെക്രട്ടറി വി പി വി പി ദുല്ഖിഫിലും വിമര്ശനവുമായി എത്തിയിരുന്നു.
