തിരുവനന്തപുരം: സംസ്ഥാന പോലിസിലെ വിവിധ ബറ്റാലിയനുകളെ മികവിന്റെ കേന്ദ്രങ്ങളാക്കാനുള്ള സെന്റര് ഓഫ് എക്സലന്സ് പ്രൊജക്ടിന് തുടക്കമായി. സംസ്ഥാന പോലീസ് മേധാവി റവാഡ ചന്ദ്രശേഖര് ഉദ്ഘാടനം ചെയ്തു.
ആധുനിക കാലത്ത് പോലീസ് ഉദ്യോഗസ്ഥര് അഭിമുഖീകരിക്കുന്ന വിവിധ പ്രതിസന്ധികളെ വിദഗ്ധ പരിശീലനത്തിലൂടെ മറികടക്കാനാണ് പദ്ധതിയിലൂടെ ലക്ഷ്യമിടുന്നത്. പ്രാരംഭഘട്ടത്തില് വിവിധ ബറ്റാലിയനുകളില് നിന്നായി തെരഞ്ഞെടുക്കപ്പെട്ട മാസ്റ്റര് ട്രെയിനര്മാര്ക്ക് മുന്കൂട്ടി നിശ്ചയിച്ചിട്ടുള്ള വിഷയങ്ങളില് പരിശീലനം നല്കും. ഇത്തരത്തില് പരിശീലനം ലഭിക്കുന്ന മാസ്റ്റര് ട്രെയിനര്മാരിലൂടെ മറ്റുള്ള സേനാംഗങ്ങള്ക്കും അതുവഴി വിവിധ ബറ്റാലിയനുകള്ക്കും വിവിധ മേഖലകളില് ഉയര്ന്ന നിലവാരമുള്ള പരിശീലനം ലഭ്യമാക്കുകയും ചെയ്യും.
ബറ്റാലിയനിലെ പോലീസ് ഉദ്യോഗസ്ഥരെ ലോക്കല് പോലീസ് സ്റ്റേഷന് ഡ്യൂട്ടികള്ക്കായി സജ്ജരാക്കുക, ഭൂമിശാസ്ത്രപരമായ നേട്ടങ്ങളെ പ്രയോജനപ്പെടുത്തുക വഴി സേനാംഗങ്ങളുടെ വ്യക്തിഗത കഴിവ് വികസിപ്പിക്കുക, വിവിധ ബറ്റാലിയനുകളിലെ പരിശീലനത്തിന് ഏകീകൃത സ്വഭാവം ഉറപ്പുവരുത്തുക, നിരന്തര പരിശീലനം നടപ്പിലാക്കുക, പ്രായോഗികവും കേസ് സ്റ്റഡി അധിഷ്ഠിതവുമായ പരിശീലനം പ്രോത്സാഹിപ്പിക്കുക, ഗവേഷണത്തിനും നവീകരണത്തിനുമായി പ്രത്യേക വിഭാഗം ആവിഷ്ക്കരിക്കുക തുടങ്ങിയ വിവിധ ലക്ഷ്യങ്ങളാണ് ഇതിലൂടെ ഉദ്ദേശിക്കുന്നത്. എസ്എപി, കെഎപി ഒന്നു മുതല് അഞ്ച് വരെയുള്ള ബറ്റാലിയനുകള്, ആര്ആര്ആര്എഫ്, എംഎസ്പി, ഐആര് ബറ്റാലിയന്, വനിതാ ബറ്റാലിയന് തുടങ്ങിയ പത്തു യൂണിറ്റുകളില് ഓരോ ബറ്റാലിയനേയും വിവിധ മേഖലകളിലായാണ് മികവിന്റെ കേന്ദ്രങ്ങളാക്കാന് ഉദ്ദേശിക്കുന്നത്.
ആംഡ് പോലീസ് ബറ്റാലിയന് എഡിജിപി ദിനേന്ദ്ര കശ്യപ്, എഡിജിപി എച്ച്. വെങ്കിടേഷ്, ഐജി എസ്. സതീഷ് ബിനോ, ഡിഐജി ഹരിശങ്കര്, പോലീസ് ആസ്ഥാനത്തെ മുതിര്ന്ന പോലീസുദ്യോഗസ്ഥര് തുടങ്ങിയവര് പങ്കെടുത്തു.
