കണ്ണൂര്‍: സര്‍വകലാശാല കാമ്പസുകളില്‍ രാഷ്ട്രീയ ഇടപെടല്‍ അവസാനിപ്പിക്കണമെന്ന് ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ പറഞ്ഞു.വിദ്യാഭ്യാസ സമ്പ്രദായം രാഷ്ട്രീയവത്കരിക്കുന്നത് മുഴുവന്‍ സംവിധാനത്തെയും നശിപ്പിക്കും.കണ്ണൂര്‍ സര്‍വകലാശാല കാമ്പസില്‍ പി.എം ഉഷ പദ്ധതി പ്രകാരം നടപ്പിലാക്കിയ വിവിധ പദ്ധതികളുടെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു ഗവര്‍ണര്‍.
ഓരോരുത്തര്‍ക്കും വ്യത്യസ്ത പ്രത്യയശാസ്ത്രങ്ങള്‍ ഉണ്ടാകാമെന്ന് പറഞ്ഞ ഗവര്‍ണര്‍ അവയെല്ലാം വിദ്യാഭ്യാസ സ്ഥാപനത്തിന്റെ അതിര്‍ത്തിക്ക് പുറത്ത് സൂക്ഷിക്കണമെന്ന് ചൂണ്ടിക്കാട്ടി. തന്റെ രാഷ്ട്രീയ ബന്ധം കാമ്പസിന്റെ അതിരുകള്‍ക്ക് പുറത്ത് സൂക്ഷിക്കുന്നു. കാമ്പസുകളെയും സര്‍വകലാശാലകളെയും രാഷ്‌ട്രീയവല്‍ക്കരിക്കുന്നത് എന്തുവിലകൊടുത്തും അവസാനിപ്പിക്കണം. അല്ലെങ്കില്‍, നമുക്ക് നല്ല ഭാവി ഉണ്ടാകില്ല.
നേരത്തെ മലയാളം സര്‍വകലാശാലയില്‍ ഗവര്‍ണറുടെ നിര്‍ദേശ പ്രകാരം കാമ്പസ് രാഷ്‌ട്രീയം നിരോധിച്ച് സര്‍ക്കുലര്‍ പുറത്തിറക്കിയിരുന്നെങ്കിലും വിവാദമായതോടെ പിന്‍വലിക്കുകയായിരുന്നു. കാമ്പസിനുള്ളില്‍ അനുമതിയില്ലാതെ രാഷ്ട്രീയ പ്രവര്‍ത്തനങ്ങളില്‍ ഏര്‍പ്പെടരുതെന്നും ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നുമായിരുന്നു സര്‍ക്കുലര്‍.
