ഇന്ന് ലോക ക്ഷീരദിനം: മലയാളിക്ക് സമ്മാനം വിലവര്‍ദ്ധന; സ്വയംപര്യാപ്തത വിദൂര സ്വപ്‌നം

മട്ടാഞ്ചേരി: ലോക ക്ഷീരദിനത്തില്‍ മലയാളിക്ക് സമ്മാനമായി ഇന്ന് മുതല്‍ പാല്‍ വില നാല് രൂപ കൂടി ലിറ്ററിന് 60 രൂപയാകും. ഭാരതം പാലുത്പാദനത്തില്‍ ഒന്നാമതാകുമ്പോള്‍ കേരളം പാലുത്പാദന സ്വയം പര്യാപ്തതയില്‍ ഏറെ പിന്നിലാണ്.

ഇന്നും കേരളം 20 ശതമാനം പാലിനായി അന്യസംസ്ഥാന ഡയറികളെ ആശ്രയിക്കുകയാണ്. ഇതുമൂലം വില കയറ്റത്തിലൂടെ പ്രതിവര്‍ഷം കോടികളാണ് അന്യസംസ്ഥാന ഡയറികള്‍ നേടുന്നത്. സംസ്ഥാനത്ത് പാലുത്പാദന വര്‍ദ്ധനവിനുള്ള പദ്ധതികളിലേറെയും ആസൂത്രണ പിഴവിന്റെ വിഫലശ്രമങ്ങളില്‍ പെടുമ്പോള്‍ അയല്‍ സംസ്ഥാന ഡയറികള്‍ വിപണികള്‍ കൈയടക്കുകയാണിപ്പോള്‍. പ്രാദേശികമായി മില്‍മയടക്കമുള്ള നാല് പ്രധാന ബ്രാന്റുകള്‍ക്കൊപ്പം ആറ് അന്യസംസ്ഥാന ബ്രാന്റുകള്‍ കേരള വിപണി പാല്‍വില്പനയില്‍ സജീവമാണ്.

പ്രതിവര്‍ഷം 70,000 കോടി രൂപയുടെ പാല്‍ വിപണിയുള്ള കേരളത്തില്‍ 33 മെട്രിക് ടണ്‍ പാല്‍ വില്പനയാണ് നടക്കുന്നത്. ഉത്പാദനം 25-26 മെട്രിക് ടണ്‍ മാത്രം. കാലിതീറ്റയുടെ കുറവും ഗുണനിലവാരമില്ലായ്‌മയും പരിപാലന തളര്‍ച്ചയും പാലുത്പാദനത്തില്‍ കേരളത്തിന് തിരിച്ചടിയാകുകയാണ്. 2031ല്‍ ക്ഷീരമേഖലയില്‍ ‘സ്വയം പര്യാപ്ത കേരളം’ സ്വപ്‌ന പദ്ധതിയായി ഇന്നും പ്രഖ്യാപനത്തില്‍ മാത്രമാണ്.

2003-04 വര്‍ഷം പാല്‍ സംഭരണ മേഖലകളില്‍ 1500 സൊസൈറ്റികളില്‍ നിന്ന് 2023-24 വര്‍ഷമിത് 3269 സൊസൈറ്റികള്‍ മാത്രമായാണ് ഉയര്‍ന്നത്. 2017-18 വര്‍ഷം (മില്‍മ മാത്രം) 981.3 മെട്രിക് ടണ്‍ പാല്‍ വിപണനത്തില്‍ നിന്ന് 2023-24 വര്‍ഷം 1660.28 മെട്രിക്ക് ടണ്‍ മാത്രമായാണ് ഉയര്‍ന്നത്. സംഭരണമാകട്ടെ 2017-18ല്‍ 1318 മെട്രിക് ടണ്ണില്‍ നിന്ന് 1276 മെട്രിക് ടണ്ണായി കുറഞ്ഞു. കഴിഞ്ഞ ഒരു ദശാബ്ദത്തിനകം സംസ്ഥാനത്ത് പാല്‍ വില വര്‍ദ്ധന 44 ശതമാനം കൂടി. 2022 ഡിസംബറിലാണ് ഒടുവില്‍ ലിറ്ററിന് ആറ് രൂപ വര്‍ദ്ധിച്ചത്.

കേരളത്തില്‍ പാല്‍ വില ലിറ്ററിന് ശരാശരി 56-68 രൂപ (പുതിയ നിരക്ക് )യാണെങ്കില്‍ തമിഴ്‌നാട്ടിലിത് 44-55 രൂപയും കര്‍ണാടകത്തില്‍ 52-60 രൂപയും ആന്ധ്രയില്‍ 48-60 രൂപയുമാണ്.

പാല്‍ വില വര്‍ദ്ധന മലയാളിയുടെ ദൈനംദിന ജീവിത ചെലവുകളില്‍ വര്‍ദ്ധനയുണ്ടാക്കുമ്പോള്‍ ക്ഷീരകര്‍ഷകന് കാര്യമായ നേട്ടമുണ്ടാകുന്നില്ലെന്നാണ് വിലയിരുത്തല്‍. നിലവില്‍ പാല്‍ സംഭരണവില (പുതിയത്) 46-47 രൂപ മാത്രമാണ്.
മില്‍മയടക്കമുള്ള പാല്‍ വിതരണ സൊസൈറ്റികളുടെ അനിയന്ത്രിതവും ആര്‍ഭാടവുമായുള്ള വിപണന ഇതരചെലവുകള്‍ പാല്‍ വില വര്‍ദ്ധനയ്‌ക്ക് ഇടയാക്കുന്നതായി പരാതികളുയരുന്നുണ്ട്.

പാലുത്പാദനത്തില്‍ ഭാരതം ഒന്നാമത്

ലോകത്ത് പാലുല്പാദനത്തില്‍ ഭാരതം ഒന്നാം സ്ഥാനത്താണ്. ലോകത്ത് 98.11 കോടി മെട്രിക്ക് ടണ്‍ പാലുത്പാദനത്തില്‍ 23.98 കോടി മെട്രിക് ടണ്‍ പാലാണ് ഭാരതത്തില്‍ ഉത്പാദിപ്പിക്കുന്നത്, 24.76 ശതമാനം വിഹിതം. 160ല്‍ ഏറെ ബ്രാന്റുകളിലായുള്ള പാല്‍ വിപണനത്തില്‍ കയറ്റുമതിയിലും മുന്നേറ്റം പ്രകടമാണ്. ഭാരതത്തിലെ പാലുത്പാദന സംസ്ഥാനങ്ങളില്‍ കേരളം 15ാം സ്ഥാനത്താണ്.