പാലക്കാട്: മൂന്നര പതിറ്റാണ്ടിലേറെയുള്ള അദ്ധ്യാപക ജീവിതത്തിന് തിരശീലയിട്ട് പാലക്കാട് മൂത്താന്തറ കെഎസ്ബി സ്‌കൂളില്‍ നിന്നും എ.ജെ. ശ്രീനി പടിയിറങ്ങുന്നു. ആരവങ്ങളില്ലാതെ, ആഘോഷങ്ങളില്ലാതെ സ്വന്തം കുട്ടികളെ നേരില്‍ കാണാതെയാണ് പടിയിറക്കം. ഇംഗ്ലീഷില്‍ ബിരുദാനന്തര ബിരുദവും, പൊളിറ്റിക്കല്‍ സയന്‍സില്‍ പിഎച്ച്ഡിയും നേടിയ ഇദ്ദേഹം ആധ്യാത്മിക പ്രഭാഷകന്‍കൂടിയാണ്.
മികച്ച സംഘാടകനായ ഇദ്ദേഹം എന്‍ടിയുവില്‍ വിവിധ ചുമതലകള്‍ വഹിച്ച ശേഷം ഫെറ്റോയുടെ സംസ്ഥാന പ്രസിഡന്റും ആയിരുന്നു. കലാ-സാംസ്‌കാരിക-രാഷ്‌ട്രീയ-ആദ്ധ്യാത്മിക മേഖലകളില്‍ സജീവമായ എ.ജെ. ശ്രീനി 1990ലാണ് അദ്ധ്യാപകവൃത്തിയില്‍ പ്രവേശിച്ചത്. മൂന്നുപതിറ്റാണ്ടായി കലാ-ശാസ്ത്ര, കായിക മേളകളില്‍ ഉപജില്ല മുതല്‍ സംസ്ഥാനതലം വരെ വിവിധ കമ്മിറ്റികളില്‍ കണ്‍വീനറായി ചുമതല വഹിച്ചു. ദേശീയ അദ്ധ്യാപക പരിഷത്ത് (എന്‍ടിയു) ഉപജില്ലാ സെക്രട്ടറി, പ്രസിഡന്റ്, ജില്ലാ സെക്രട്ടറി, പ്രസിഡന്റ് ചുമതലകളും വഹിച്ചു.
2002ല്‍ അദ്ധ്യാപകരുടെയും ജീവനക്കാരുടെയും 32 ദിവസത്തെ അവകാശ സമരത്തിന് നേതൃത്വം നല്‍കി അറസ്റ്റ് വരിക്കുകയും ശിക്ഷാനടപടി നേരിടുകയും ചെയ്തു. 2025ല്‍ കേന്ദ്ര മാനവ വിഭവശേഷി വകുപ്പ് ദല്‍ഹിയില്‍ സംഘടിപ്പിച്ച അന്താരാഷ്‌ട്ര വിദ്യാഭ്യാസ സെമിനാറില്‍ കേരളത്തെ പ്രതിനിധീകരിച്ച് പ്രബന്ധം അവതരിപ്പിച്ചു.
ജില്ലാ പഞ്ചായത്ത് വിദ്യാഭ്യാസ സമിതി, അക്കാദമിക് കൗണ്‍സില്‍ അംഗമായും, വിദ്യാഭ്യാസ വകുപ്പിന്റെ ജില്ലാ ധനകാര്യ സമിതി കണ്‍വീനര്‍, പാഠ്യാനുബന്ധ സമിതി അംഗം, നിലവില്‍ സര്‍ക്കാരിന്റെ വിദ്യാഭ്യാസ ഗുണനിലവാര സമിതിയിലെ ജില്ലയിലെ സീനിയര്‍ അംഗമായും പ്രവര്‍ത്തിച്ചിരുന്നു. അദ്ദേഹം നിലവില്‍ ഫെഡറേഷന്‍ ഓഫ് എംപ്ലോയീസ് ആന്‍ഡ് ടീച്ചേഴ്‌സ് ഓര്‍ഗനൈസേഷന്‍ സംസ്ഥാന അധ്യക്ഷന്‍, ദേശീയ അദ്ധ്യാപക പരിഷത്ത് സംസ്ഥാന സെക്രട്ടറി എന്നീ ചുമതലകള്‍ വഹിച്ചുവരുന്നു.
2015ലെ തെരഞ്ഞെടുപ്പില്‍ പാലക്കാട് നഗരസഭയിലേക്ക് ബിജെപി സ്ഥാനാര്‍ത്ഥിയായി മത്സരിച്ചപ്പോള്‍ കേവലം അഞ്ച് വോട്ടിനാണ് പരാജയപ്പെട്ടത്. മൂത്താന്തറ കെഎസ്ബി സ്‌കൂളിലെ അദ്ധ്യാപിക വി. പ്രസീദയാണ് ഭാര്യ. ഗോവര്‍ദ്ധന്‍(ലണ്ടന്‍), തേജസ്വിനി(അദ്ധ്യാപിക, മൂത്താന്തറ കെഎസ്ബിഎസ്) എന്നിവരാണ് മക്കള്‍.
