അഹമ്മദാബാദ്: രണ്ട് മാസം നീണ്ട ഇന്ത്യന് പ്രീമിയര് ലീഗിന്റെ പതിമൂന്നാം പതിപ്പിന് ഇന്ന് കൊട്ടിക്കലാശം. തുടര്ച്ചയായ രണ്ടാം വട്ടവും ഫൈനലിലെത്തിയ ബംഗളൂരു റോയല് ചലഞ്ചേഴ്സിനെ ഗുജറാത്ത് ടൈറ്റന്സ് സ്വന്തം തട്ടകത്തില് നേരിടും.
ഐപിഎല് 2026 ഫൈനലില് ഏറ്റുമുട്ടുമ്പോള്, കഴിഞ്ഞ സീസണുകളിലെ ഏറ്റവും ശക്തമായ രണ്ട് ടീമുകള് തമ്മിലുള്ള പോരാട്ടമാണ് ആരാധകര്ക്ക് കാത്തിരിക്കുന്നത്. ഇന്ത്യന് ക്രിക്കറ്റിലെ കിങ് എന്നറിയപ്പെടുന്ന വിരാട് കോഹ്്ലിയുടെ ബംഗളൂരുവും രാജകുമാരനായ ശുഭ്മന് ഗില്ലിന്റെ ഗുജറാത്ത് ടൈറ്റന്സും തമ്മിലുള്ള പോരാട്ടം എന്ന രീതിയില് ഈ മത്സത്തിന്റെ ആവേശമുയര്ത്തും.
പശ്ചാത്തലം
ബാക്ക്-ടു-ബാക്ക് ഫൈനലിലെത്തുന്ന ആര്സിബി കഴിഞ്ഞ സീസണിലെ കിരീടജേതാക്കളെന്ന ആത്മവിശ്വാസത്തോടെയാണ് ഇറങ്ങുന്നത്. ലീഗ് ഘട്ടത്തില് ഒന്നാം സ്ഥാനവും ക്വാളിഫയര് 1-ല് ഗുജറാത്തിനെ വന് മാര്ജിനില് തോല്പ്പിച്ചതും അവര്ക്ക് വലിയ മാനസിക മുന്തൂക്കം നല്കുന്നു.
അതേസമയം ഗുജറാത്ത് ടൈറ്റന്സ് കടുത്ത പോരാട്ടങ്ങള് കടന്നാണ് ഫൈനലിലെത്തിയത്. ക്വാളിഫയര് 2-ല് രാജസ്ഥാന് റോയല്സിനെതിരെ 215 റണ്സ് പിന്തുടര്ന്ന് ജയിച്ചത് ടീമിന്റെ ആത്മവിശ്വാസം ഉയര്ത്തിയിട്ടുണ്ട്. ശുഭ്മന് ഗില്ലിന്റെ സെഞ്ചുറിയും ടോപ്പ് ഓര്ഡറിന്റെ മികവും ഗുജറാത്തിനെ വീണ്ടും ഫൈനലിലെത്തിച്ചു.
നിര്ണായക പോരാട്ടങ്ങള്
കോഹ്ലി -റബാഡ പോരാട്ടം ഈ മത്സരത്തിന്റെ പ്രത്യേകതയാണ്. പവര്പ്ലേയില് കോഹ്ലിയെ നേരത്തെ പുറത്താക്കാന് റബാഡയ്ക്ക് കഴിഞ്ഞാല് ആര്സിബിക്ക് വലിയ തിരിച്ചടിയാകും. മറുവശത്ത് ഗില്- ഹേസല്വുഡ് പോരാട്ടവും മികച്ചതാകും. ഗില്ലിന്റെ മികച്ച ഫോം അവസാനിപ്പിക്കാന് ആര്സിബി ആശ്രയിക്കുന്നത് ഹേസല്വുഡിനെയാണ്. അതുപോലെ മറ്റൊരു പ്രധാന പോരാട്ടമായിരിക്കും പതീദാറും സിറാജും തമ്മിലുള്ളത്, മിഡില് ഓവറുകളില് മത്സരത്തിന്റെ ഗതി നി
ര്ണയിക്കുന്ന പോരാട്ടം.
പിച്ച് റിപ്പോര്ട്ട്
അഹമ്മദാബാദിലെ പിച്ച് സാധാരണയായി ബാറ്റര്മാരെ സഹായിക്കുന്നതാണ്. 190-210 റണ്സിനിടയിലുള്ള സ്കോര് സുരക്ഷിതമെന്ന് കരുതാം. എന്നാല് രാത്രിയില് മഞ്ഞുവീഴ്ച വന്നാല് രണ്ടാമതായി ബാറ്റ് ചെയ്യുന്ന ടീമിന് ചെറിയ മുന്തൂക്കം ലഭിക്കാം. സ്വന്തം തട്ടകത്തില് കളിക്കുന്നതിന്റെ ആനുകൂല്യം ഗുജറാത്തിനുണ്ടെങ്കിലും ബംഗളൂരുവിന് തന്നെയാണ് കടലാസിലെ മുന്തൂക്കം. ക്വാളിഫയര് 1-ല് ഗുജറാത്തിനെ തകര്ത്തതും കൂടുതല് വിശ്രമസമയവും ആര്സിബിക്ക് ചെറിയ മുന്തൂക്കം നല്കുന്നു. എന്നാല് ഗില്ലും ടോപ്പ് ഓര്ഡറും വീണ്ടും അതേ ഫോമില് എത്തിയാല് ഗുജറാത്ത് കിരീടം സ്വന്തമാക്കാനും കഴിയും.
മത്സരം അവസാന ഓവറുകളിലേക്ക് നീളാന് സാധ്യതയുണ്ട്. കോഹ്ലി അല്ലെങ്കില് ഗില് എന്നിവരില് ഒരാള് വലിയ ഇന്നിംഗ്സ് കളിച്ചാല് ആ ടീം ട്രോഫിക്ക് കൂടുതല് അടുത്തെത്തും. നിലവിലെ ഫോമും ടീമിന്റെ ബാലന്സും കണക്കിലെടുത്താല് ആര്സിബി നേരിയ ഫേവറിറ്റുകളായാണ് ഫൈനലിലേക്ക് ഇറങ്ങുന്നത് എന്തായാലും നരേന്ദ്രമോദി സ്റ്റേഡിയം കാത്തിരിക്കുന്നത് വമ്പന് കലാശപ്പോരിനാണ്.
ആര്സിബിയുടെ ശക്തി
1. ആഴമുള്ള ബാറ്റിംഗ്
വിരാട് കോഹ്്ലി, രജത് പതീദാര്, ഫില് സോള്ട്ട്, ജിതേഷ് ശര്മ്മ, ടിം ഡേവിഡ് എന്നിവരടങ്ങുന്ന നിര ഏത് ബൗളിംഗ് ആക്രമണത്തെയും സമ്മര്ദ്ദത്തിലാക്കാന് കഴിവുള്ളതാണ്. ആദ്യം ബാറ്റ് ചെയ്താലും പിന്തുടര്ന്ന് ജയിച്ചാലും ആഴമേറിയ ബാറ്റിങ് നിര ബംഗളൂരിനെ വിജയത്തിലെത്തിച്ചിട്ടുണ്ട്. കടലാസില് ആര്സിബിയുടെ ബാറ്റിങ് ആഴം, ഫയര് പവര്, അനുഭവപരിചയം എന്നിവയുമായി പൊരുത്തപ്പെടാന് കഴിയുന്ന ടീമുകള് തന്നെ ചുരുക്കമാണ്. എന്നിരുന്നാലും, ടി20 ക്രിക്കറ്റില് പലപ്പോഴും സംഭവിക്കുന്നതുപോലെ, കഴിവ് മാത്രം ഒന്നും ഉറപ്പുനല്കുന്നില്ല. ശരിയായ നിമിഷങ്ങളില് ആര്സിബിയെ അനുകൂലിക്കാന് ഭാഗ്യം ആവശ്യമാണ്.
ആര്സിബിയെ സംബന്ധിച്ചിടത്തോളം, വിരാട് കോഹ്്ലിതന്നെയാണ് ശ്രദ്ധാകേന്ദ്രം. ഒരു ലക്ഷത്തോളം കാൈണികളുടെ ശ്രദ്ധയും അദ്ദേഹത്തില് പതിയും ഇത് സമ്മര്ദമുണ്ടാക്കിയേക്കാം. എന്നാല്, അതൊക്കെ മറികടക്കാനാവുന്ന തരത്തിലുള്ള പരിചയ സമ്പത്ത് കോഹ്്ലിക്കുണ്ട്. കോഹ്്ലി, ഭുവനേശ്വര് കുമാര്, ഹേസല്വുഡ് തുടങ്ങിയ താരങ്ങളുടെ അനുഭവസമ്പത്ത് ഫൈനല് പോലുള്ള വേദികളില് നിര്ണായകമാകാം.
2. സമതുലിത ബൗളിംഗ്
ജോഷ് ഹേസല്വുഡ്, ഭുവനേശ്വര് കുമാര്, യശ് ദയാല്, ക്രുനാല് പാണ്ഡ്യ, സുയാഷ് ശര്മ്മ എന്നിവരുടെ കൂട്ടുകെട്ട് ടൂര്ണമെന്റിലുടനീളം സ്ഥിരത പുലര്ത്തി. പല മത്സരങ്ങളിലും ആര്സിബിയുടെ ബൗളിംഗ് തന്നെയാണ് വിജയത്തിന്റെ അടിത്തറയായത്.
ഗുജറാത്തിന്റെ ശക്തി
1. അപകടകാരിയായ ടോപ്പ് ഓര്ഡര്
നായകന് ശുഭ്മന് ഗില്ലിനൊപ്പം സായി സുദര്ശനും ജോസ് ബട്ലറും മികച്ച ഫോമിലാണ്. ഇവരില് രണ്ടുപേര് ക്ലിക്കായാല് 200+ സ്കോര് പോലും എളുപ്പത്തില് പിന്തുടരാന് കഴിയുമെന്ന് രാജസ്ഥാനെതിരായ മത്സരം തെളിയിച്ചു. ആദ്യം ബാറ്റ് ചെയ്താല് സമ്മര്ദമില്ലാതെ ബാറ്റ് ചെയ്യാന് മൂവര്ക്കുമാകും.
2. പേസ് ആക്രമണം
കാഗിസോ റബാഡ മുഹമ്മദ് സിറാജ്, ജേസണ് ഹോള്ഡര് എന്നിവര് പുതിയ പന്തിലും ഡെത്ത് ഓവറുകളിലും വലിയ ഭീഷണിയാണ്. മൂവരുടെയും തീയുണ്ടകള് വലിയ വിനാശമാണ് എതിര് ടീമുകളില് വരുത്തിയത്.
3. ഗില്ലിന്റെ ക്യാപ്റ്റന്സി
ഈ സീസണില് ഗില്ലിന്റെ നേതൃത്വമാണ് ഗുജറാത്തിന്റെ ഏറ്റവും വലിയ പോസിറ്റീവ്. ബാറ്റിംഗിലും തന്ത്രങ്ങളിലും അദ്ദേഹം മികച്ച സ്വാധീനം ചെലുത്തി.
സാധ്യതാ ടീം
ആര്സിബി
വെങ്കിടേഷ് അയ്യര്, വിരാട് കോഹ്ലി, ദേവദത്ത് പടിക്കല്, രജത് പതിദാര്, ജിതേഷ് ശര്മ്മ, ടിം ഡേവിഡ്, ക്രുനാല് പാണ്ഡ്യ, ഭുവനേശ്വര് കുമാര്, ജേക്കബ് ഡഫി, ജോഷ് ഹേസില്വുഡ്, റാസിഖ് സലാം, റൊമാരിയോ ഷെപ്പേര്ഡ്
ഗുജറാത്ത്
സായ് സുദര്ശന്, ശുഭ്മാന് ഗില്, ജോസ് ബട്ട്ലര്, നിഷാന്ത് സന്ധു, വാഷിംഗ്ടണ് സുന്ദര്, ജേസണ് ഹോള്ഡര്, റാഷിദ് ഖാന്, സായ് കിഷോര്, കാഗിസോ റബാഡ, പ്രസിദ് കൃഷ്ണ, മുഹമ്മദ് സിറാജ്, രാഹുല് തെവാതിയ
