കോട്ടയം: മലയാളി ഏറെ പ്രതീക്ഷയോടെ കാത്തിരിക്കുന്ന ഇടവപ്പാതി (കാലവര്‍ഷം)ക്കാലത്ത് ഇക്കുറി മഴ കുറയാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (ഐഎംഡി). പ്രതീക്ഷിച്ചതിലും നേരത്തെ എത്തുന്ന എല്‍ നിനോ, കാലവര്‍ഷക്കാലത്തിന്റെ പകുതിയോടെ ശക്തമാകുന്നതും അനുകൂലമാകുമെന്ന് പ്രതീക്ഷിച്ച ഇന്ത്യന്‍ ഓഷ്യന്‍ ഡൈപോള്‍ (ഐഒഡി) ന്യൂട്രല്‍ സ്ഥിതിയില്‍ തുടരാനുള്ള സാധ്യതയുമാണ് രാജ്യത്താകെ കാലവര്‍ഷ മഴ കുറയാന്‍ ഇടയാക്കുന്നത്.
കേരളം ഉള്‍പ്പെടെ തെക്കേ ഇന്ത്യന്‍ സംസ്ഥാനങ്ങളില്‍ മഴ സാധാരണയേക്കാള്‍ കുറയാന്‍ സാധ്യതയുണ്ടെന്നും കാലാവസ്ഥാ വിദഗ്ധര്‍ പറയുന്നു. ജൂണ്‍ മുതല്‍ സപ്തംബര്‍ വരെ നീളുന്ന കാലവര്‍ഷത്തില്‍ ദീര്‍ഘകാല ശരാശരിയുടെ 94 ശതമാനമാകും ഇവിടെ ലഭിക്കുക. രാജ്യത്താകെ ഇത് 90 ശതമാനവുമായിക്കും. ഇതിനു പുറമെ ജൂണ്‍ മാസത്തില്‍ മാത്രം കേരളത്തില്‍ ഉള്‍പ്പെടെ രാജ്യത്താകെ ലഭിക്കുന്ന ശരാശരി മഴ സാധാരണയേക്കാള്‍ കുറവായിരിക്കാന്‍ സാധ്യതയുണ്ടെന്നും കാലാവസ്ഥാ നിരീക്ഷകന്‍ രാജീവന്‍ എരിക്കുളം പറഞ്ഞു.
സംസ്ഥാനത്ത്, ജൂണില്‍ ആദ്യ രണ്ടാഴ്ച സാധാരണയേക്കാള്‍ കൂടുതല്‍ മഴ ലഭിക്കാന്‍ സാധ്യതയുണ്ടെന്നാണ് യൂറോപ്യന്‍ കാലാവസ്ഥാ മാതൃക അനുസരിച്ചുള്ള പ്രവചനം.
ഇത്തവണ കാലവര്‍ഷക്കാലത്ത് എല്‍ നിനോ പ്രതിഭാസം രൂപപ്പെടാനും വരും മാസങ്ങളില്‍ ഇതിന്റെ തീവ്രത വര്‍ധിക്കാനും സാധ്യതയുണ്ടെന്നാണ് ഐഎംഡിയുടെ വിലയിരുത്തല്‍. ജൂണില്‍ ദുര്‍ബലമായ എല്‍ നിനോ സാധ്യതയാണ് കണക്കാക്കുന്നത്. ഇത് ജൂലൈ, ആഗസ്റ്റ് മാസങ്ങളില്‍ ദുര്‍ബലമായ അവസ്ഥയില്‍ നിന്നും മിതമായ അവസ്ഥയിലേക്ക് മാറും. സപ്തംബറില്‍ മിതമായ നിലയില്‍ നിന്നും ശക്തമായ അവസ്ഥയിലേക്ക് കടക്കാനുമാണ് സാധ്യത.
ഇന്ത്യന്‍ ഓഷ്യന്‍ ഡൈപോള്‍, ഇന്ത്യന്‍ മഹാസമുദ്രത്തില്‍ നിലവില്‍ ന്യൂട്രല്‍ അവസ്ഥയാണ് ഉള്ളത്. കാലവര്‍ഷക്കാലത്തുടനീളം ഈ ന്യൂട്രല്‍ അവസ്ഥതന്നെ തുടരാനാണ് സാധ്യതയെന്നും ഐഎംഡി പ്രവചിക്കുന്നു. ഇതനുസരിച്ച് രണ്ടു പ്രതിഭാസങ്ങളും കാലവര്‍ഷത്തിന് പ്രതികൂലമായ സാഹചര്യമാണ് ഉണ്ടാക്കുന്നത്.
കാലാവസ്ഥാ വകുപ്പ് ഇതേവരെ ഔദ്യോഗികമായി കാലവര്‍ഷ പ്രഖ്യാപനം നടത്തിയിട്ടില്ല. പ്രഖ്യാപനം ഒരാഴ്ചക്കകം വരുമെന്നാണ് സൂചന.
എല്‍ നിനോ, ഐഒഡി
പസഫിക് സമുദ്രത്തിലെ ജലത്തിന്റെ താപനില അസാധാരണ രീതിയില്‍ ഉയരമ്പോള്‍ രൂപപ്പെടുന്ന ആഗോള കാലാവസ്ഥാ പ്രതിഭാസമാണ് എല്‍ നിനോ. ലോക കാലാവസ്ഥയെ സ്വാധീനിക്കുന്ന പ്രധാന ഘടകങ്ങളിലൊന്നാണിത്.
പടിഞ്ഞാറന്‍ ഇന്ത്യന്‍ മഹാസമുദ്രഭാഗം കിഴക്കന്‍ ഭാഗത്തേക്കാള്‍ ചൂടാകുന്ന പ്രതിഭാസമാണ് ഇന്ത്യന്‍ ഓഷ്യന്‍ ഡൈപോള്‍ (ഐഒഡി).
ഉത്തരേന്ത്യ ചുട്ടുപൊള്ളുന്നു
മലയാളികള്‍ കാലവര്‍ഷ പ്രഖ്യാപനവും ഇടമുറിയാതെയുള്ള ഇടവപ്പാതി മഴയും പ്രതീക്ഷിച്ചിരിക്കുമ്പോള്‍ ഉത്തരേന്ത്യയില്‍ ചുട്ടുപൊള്ളുന്ന ചൂടാണ്. വ്യാഴാഴ്ച രാജ്യത്തെ ഏറ്റവും ഉയര്‍ന്ന താപനില (47.6 ഡിഗ്രി സെല്‍ഷ്യസ്) ഉത്തര്‍പ്രദേശിലെ ബാണ്ടയില്‍ രേഖപ്പെടുത്തി. ബുധനാഴ്ച ഇത് 48.2 ഡിഗ്രി സെല്‍ഷ്യസ് ആയിരുന്നു.
