വിജ്ഞാപനം, പ്രോസ്പെക്ടസ് https://hscap.kerala.gov.in ല്
ഓണ്ലൈനില് അപേക്ഷ ജൂണ് 3നകം
ആദ്യ അലോട്ട്മെന്റ് ജൂണ് 15ന്
ക്ലാസുകള് ജൂലൈ 2ന് തുടങ്ങും
സംസ്ഥാനത്തെ ഹയര് സെക്കന്ഡറി സ്കൂളുകളില് പ്ലസ് വണ് (ഏകജാലകം) പ്രവേശനത്തിന് ഓണ്ലൈനില് ജൂണ് 3 വരെ അപേക്ഷിക്കാം. പ്രവേശന വിജ്ഞാപനവും വിശദവിവരങ്ങളടങ്ങിയ പ്രോസ്പെക്ടസും https://hscap.kerala.gov.inല് നിന്നും ഡൗണ്ലോഡ് ചെയ്യാം.
എസ്എസ്എല്സി/തത്തുല്യ പരീക്ഷ കുറഞ്ഞത് ഡി+ഗ്രേഡോ/മാര്ക്കോടുകൂടി വിജയിച്ച് ഉപരിപഠനത്തിന് യോഗ്യത നേടിയവര്ക്കാണ് അപേക്ഷിക്കാവുന്നത്. 2026 ജൂണ് ഒന്നിന് 15 വയസ് പൂര്ത്തിയായിരിക്കണം.
പ്രവേശന നടപടികള് പൂര്ണമായും ഓണ്ലൈന് ഏകജാലക സംവിധാനംവഴിയാണ്. ഇന്റര്നെറ്റ് സൗകര്യമുള്ള കമ്പ്യൂട്ടര് വഴിയോ അതത് പ്രദേശത്തെ ഗവണ്മെന്റ്/എയിഡഡ് ഹൈസ്കൂള്/ഹയര് സെക്കന്ററി സ്കൂളുകളിലെ കമ്പ്യൂട്ടര് ലാബ് സൗകര്യം പ്രയോജനപ്പെടുത്തിയോ പ്രോസ്പെക്ടസിലെ നിര്ദേശങ്ങള് പാലിച്ച് അപേക്ഷ സമര്പ്പിക്കാവുന്നതാണ്. ഒരു റവന്യൂ ജില്ലയിലേക്ക് ഒരു വിദ്യാര്ത്ഥി ഒന്നില് കൂടുതല് അപേക്ഷകള് മെരിറ്റ് സീറ്റിലേക്ക് നല്കാന് പാടില്ല. ഒന്നിലധികം റവന്യൂ ജില്ലകളില് പ്രവേശനമാഗ്രഹിക്കുന്നവര് ഓരോ ജില്ലയിലേക്കും പ്രത്യേകം അപേക്ഷിക്കണം. അപേക്ഷ/രജിസ്ട്രേഷന് ഫീസ് 25 രൂപയാണ്. പ്രവേശന സമയത്തെ ഫീസിനോടൊപ്പം ഇത് കൂടി നല്കിയാല് മതി. അപേക്ഷാ സമര്പ്പണത്തിന് സ്കൂള്തല ഹെല്പ്പ് ഡെസ്ക്കുകളുടെ സഹായം തേടാം.
ഒന്നില് കൂടുതല് ജില്ലകളില് അപേക്ഷിച്ച് ഒരേസമയം അലോട്ട്മെന്റ് ലഭിച്ചാല് ഏതെങ്കിലുമൊരു ജില്ലയില് മാത്രം പ്രവേശനം നേടണം. മറ്റ് ജില്ലകളിലെ ഓപ്ഷനുകള് തനിയെ റദ്ദാകുന്നതായിരിക്കും. പ്രവേശനം നേടിയ ജില്ലയില് ആവശ്യമെങ്കില് താല്ക്കാലിക അഡ്മിഷന് നേടി തുടര്ന്ന് അതേ ജില്ലയില് മെച്ചപ്പെട്ട ഓപ്ഷനുകള്ക്കുവേണ്ടി കാത്തിരിക്കാം. എന്നാല് ആദ്യം ഒരു ജില്ലയില് മാത്രം അലോട്ട്മെന്റ് ലഭിക്കുകയും പ്രവേശനം നേടിയശേഷം തുടര്ന്നുള്ള അലോട്ട്മെന്റില് മറ്റൊരു ജില്ലയില് പുതുതായി അലോട്ട്മെന്റ് ലഭിക്കുന്നപക്ഷം അത് സ്വീകരിക്കുന്നതിന് തടസമില്ല. തുടര്ന്ന് പ്രസ്തുത ജില്ലയിലെ ഉയര്ന്ന ഓപ്ഷനിലേക്ക് മാറാനും കഴിയും. ഓരോ വിദ്യാര്ത്ഥിയുടെയും വെയിറ്റേജ് ഗ്രേഡ് പോയിന്റ് ആവറേജ് കണക്കാക്കിയാണ് പ്രവേശനത്തിനുള്ള അര്ഹത നിശ്ചയിക്കുന്നത്.
സബ്ജക്ട് കോമ്പിനേഷനുകള്: സയന്സ്, ഹ്യൂമാനിറ്റീസ്, കോമേഴ്സ് എന്നിങ്ങനെ മൂന്ന് ഗ്രൂപ്പുകളിലായി ഹയര് സെക്കന്ററി പഠനത്തിന് ആകെ 45 സബ്ജക്ട് കോമ്പിനേഷനുകള് ലഭ്യമാണ്. ഗ്രൂപ്പ് തിരിച്ചുള്ള സബ്ജക്ട് കോമ്പിനേഷനുകളും ഓരോ കോമ്പിനേഷന് തെരഞ്ഞെടുക്കുമ്പോഴും വെയിറ്റേജ് ലഭിക്കുന്ന എസ്എസ്എല്സി വിഷയങ്ങളും വെയിറ്റഡ് ഗ്രേഡ് പോയിന്റ് ആവറേജില് തുല്യത വന്നാല് വെയിറ്റേജ് ലഭിക്കുന്ന വിഭാഗങ്ങളും പ്രവേശന നടപടിക്രമങ്ങളുമെല്ലാം പ്രോസ്പെക്ടസിലുണ്ട്. സബ്ജക്ട് കോമ്പിനേഷനുകള് തെരഞ്ഞെടുക്കുന്നതിന് സ്കൂള്തല ഹെല്പ്പ് ഡെസ്ക്കുകളുടെ സഹായം തേടാവുന്നതാണ്.
ഫീസ് ഘടന: മെറിറ്റ് ക്വാട്ടയില് എല്ലാ സബജക്ട് കോമ്പിനേഷനുകള്ക്കും വിവിധ ഇനങ്ങളില് ഏറെയും ഫീസ് ഒരേപോലെയാണ്.
അഡ്മിഷന് ഫീസ് 50 രൂപ, ലൈബ്രറി ഫീസ 25 രൂപ, കലണ്ടര് ഫീസ് 25 രൂപ, വൈദ്യപരിശോധന ഫീസ് 25 രൂപ, ഓഡിയോ വിഷ്വല് യൂണിറ്റ് ഫീസ് 30 രൂപ; സ്പോര്ട്സ് ആന്റ് ഗെയിംസ് ഫീസ് 75 രൂപ, സ്റ്റേഷനറി ഫീസ് 25 രൂപ, അസോസിയേഷന് ഫീസ് 25 രൂപ, യൂത്ത് ഫെസ്റ്റിവല് ഫീസ് 50 രൂപ, മാഗസിന് ഫീസ് 25 രൂപ, കോഷന് ഡിപ്പോസിറ്റ്- സയന്സ് ഗ്രൂപ്പിന് 150 രൂപ, ഹ്യൂമാനിറ്റീസ്, കോമേഴ്സ് ഗ്രൂപ്പുകള്ക്ക് 100 രൂപ. ലാബറട്ടറി ഫീസ്-ലാബ് സൗകര്യം ആവശ്യമുള്ള വിഷയങ്ങള്ക്ക് 50 രൂപ വീതം, കമ്പ്യൂട്ടര് സൗകര്യം ആവശ്യമുള്ള വിഷയങ്ങള്ക്ക് 50 രൂപ വീതം.
പ്രവേശന ഷെഡ്യൂള്: (മെരിറ്റ് ക്വാട്ട) ഓണ്ലൈനില് അപേക്ഷ സ്വീകരിക്കുന്ന അവസാന തീയതി- ജൂണ് 3, ട്രയല് അലോട്ട്മെന്റ് ജൂണ് 8, ആദ്യ അലോട്ട്മെന്റ ജൂണ് 15, മുഖ്യ അലോട്ട്മെന്റ് അവസാനിക്കുന്ന തീയതി- ജൂലൈ ഒന്ന്, ക്ലാസുകള് തുടങ്ങുന്ന തീയതി- ജൂലൈ 2.
സപ്ലിമെന്ററി ഘട്ടം- ജൂലൈ 13 മുതല് ഓഗസ്റ്റ് 5 വരെ. അഡ്മിഷന് അവസാനിപ്പിക്കുന്ന തീയതി- ഓഗസ്റ്റ് 5.
സ്പോര്ട്സ് ക്വാട്ട, കമ്മ്യൂണിറ്റി ക്വാട്ട, മാനേജ്മെന്റ് ക്വാട്ട അടക്കമുള്ള മറ്റ് വിഭാഗങ്ങളിലെ പ്രവേശന ഷെഡ്യൂള്, പ്രവേശന നടപടികള്, അപേക്ഷിക്കേണ്ട രീതി എന്നിവ പ്രോസ്പെക്ടസില് ലഭിക്കും.
